Siman pasa, minister demisionario di Naturalesa, Ursell Arends (Raiz) a publica riba su pagina di Facebook algun imagen di e momento unda a habri e ofertanan financiero di cada participante den e destahe publico pa e proyecto pa transformacion di Parkietenbos.
Segun e minister, conforme normanan di integridad y transparencia a haci esaki na Notariskantoor Rodriguez-Taekema. “Un proyecto cu seguramente mester mira continuacion y completacion den e proximo gobernacion pa e bienestar di nos medio ambiente na Aruba.”
Anteriormente na e mesun oficina di notario a tuma lugar e momento oficial di habri e envelopnan cu e oferta tecnico di varios compania cu ta participando den e destaho publico pa e ‘deelproject: herprofilering stortplaats te Parkietenbos’.
Segun minister Arends a publica, pa un destaho publico, transparencia den e proceso ta esencial y mester por garantisa esaki. For di e perspectiva aki, tur compania cu a busca e bestek tambe tabata presente pa e momento importante aki.
Manera minister Arends a informa, e stap aki den e proceso di saneamento di Parkietenbos ta pa evita e riesgo di un desaster ambiental, ya cu e cero di e dump na banda di lama (zuid y west) ta mucho stijl, y lo por cay den otro, asina aki causando daño inmenso na nos naturalesa y bida marino. “Pa motibo aki, hunto cu e saneamento di asbestos, e dos proyectonan aki a wordo identifica como prioridadnan halto y mi Ministerio, hunto cu tur e profesionalnan di tanto gobierno pero tambe expertonan internacional, a traha cu prioridad pa por cuminsa e proceso mas pronto cu ta posibel pa mitiga e riesgonan aki pa ambos salud publico y pa nos medio ambiente.”
