(AP) — Polis di Atlanta brevemente a pone director di pelicula, Ryan Coogler den boei despues cu a confundie cu un ladron na momento cu el a duna un cahero un nota mientras e tabata purbando di retira un cantidad grandi di placa for di su cuenta, segun polis.
E director di Black Panther, kende ta color scur, a drenta un sucursal di Bank of America dia 7 di januari y a duna e cahero un slip pa haci retiro cu un nota skirbi patras, pidiendo pa e ‘haci discreto na momento di dun’e e placa’, segun e reporte di polis.
E tabata purbando di retira mas di $10mil y e cahero a ‘ricibi un notificacion di alerta’ riba su computer y rapidamente a alerta su manager cu Coogler tabata purbando di horta e banco, segun e reporte. E empleado di e banco ta un muhe color scur, segun e reporte.
Polis respondiendo na e sucursal den e bario afluente Buckhead a mira un SUV Lexus preto parkea pafo cu e motor cendi. Un oficial a papia cu e chauffeur kende a bisa cu e tabata wardando pa Coogler kende tabata paden di e banco. Un descripcion di Coogler duna pa e chauffeur tabata match e descripcion di e homber reporta di ta purba di horta e banco, segun e reporte. E oficial a detene tanto e pasahero como e chauffeur den auto di polis, pero no a boei nan.
E dos agente a bay paden di e banco y a trece Coogler pafo na boei.
Mientras e tabata sali, Coogler a bisa cu e tabata djis purbando di lanta placa di su mesun cuenta.
Polis a determina cu henter e cos tabata un eror di e cahera, y Coogler ‘nunca a haci nada fout’ segun e reporte. Inmediatamente a retira e boei y a libera e otro dos persona.
Coogler a splica polis cu un assistent medico cu ta traha p’e ta prefera di haya su pago cash. Ora e lanta placa pa pag’e, e ta pasa un nota na e cahera pasobra e no kier pa pasa e placa door di un mashin di conta placa pasobra e ta hala atencion y ta pon’e sinti insigur.
