DPS (1).jpg

Manera mayor di e alumno di Reina Beatrix School a menciona, el a cana e caminda corecto pa locual a pasa cu su yiu. E mayor a entrega keho riba e tratamento di su yiu, esta di tentamento (bullying).

 

Dienst Publieke Scholen (DPS) ta reacciona y ta bisa cu nan ta curasha tur mayor cu tin keho riba e forma con docentenan ta sea trata cu e alumnonan of e calidad di les cu ta duna den klas, pa pone DPS na altura. “Meta ta pa haci tur lo posibel pa salvaguardia interes di e alumno.”

Segun e relato di DPS nan a ricibi e keho di e mayor y nan a actua segun e procedura fiha. Manera den tur caso di keho, a duna e juffrouw “toegangsontzegging” pa 6 siman, esta cu e no ta permiti pa bay trabou mas. Pa asina DPS y Inspeccion di Enseñansa por haci e investigacion.

 

Na tres ocasion e mayor concerni a pidi pa cambia su yiu di klas. A tene cuenta cu e deseo di mayor, pero siman pasa diamars e mayor ta pidi pa e yiu keda den e mesun klas. Y despues diabierna siman pasa e mayor a cambia di idea atrobe y a pidi pa su yiu cambia di klas, segun DPS.

Ta bon pa enfatisa cu diabierna siman pasa, contrario na locual e mayor ta bisa den prensa, scol no a papia cu e alumno dilanti 4 adulto, pasobra den situacionnan asina no ta papia cu e alumno concerni sin presencia di su mayornan. Dialuna dia 17 di october 2016 mayor a bolbe pidi pa cambio di scol.

 

DPS ta enfatisa cu ningun momento minister di Enseñansa a bisa cu juffrouw ta bay bek den klas y cu yiu di e mayor, mama S. ta cambia di klas. DPS como directiva di scol ta atendiendo e caso aki.

E alumno concerni desde e momento cu e keho a drenta ta ricibiendo guia di trahado social di scol, segun e directiva di e scolnan publico.