Departamento di Salud Publico mester a tuma e medida pa cera EPB na Santa Cruz pa motibo di un situacion ahigienico cu a presenta su mes.
GKMB di Departamento di Salud Publico a wordo informa tres siman atras cu EPB Santa Cruz tin molester di hopi sangura. Tabatin sospecho cu sangura tabata sali for di beerput habri. E pos a keda trata cu kimico door di GKMB.
Siman pasa Seccion di Higiena di Departamento di Salud Publico a wordo informa cu dek di e pos di EPB Santa Cruz a cay den otro ocacionando cu e pos no ta funciona cu consecuencia cu alumno y docentenan no por haci uzo di wc. Tambe a keda indica cu holor desagradabel ta reina na scol y e pos habri ta crea peliger pa tur presente na scol.
Seccion di Higiena mesora a acudi na EPB Santa Cruz y por a tuma nota di e situacion reinante. Riba peticion di Seccion di Higiena GKMB a haci otro inspeccion di e pos, a trata esaki cu kimico contra sangura y a fumiga tambe den e klasnan.
Conhuntamente cu Director di scol Seccion di Higiena a palabra cu pa dialuna lo tin wc portable na scol pa tur alumno por sigui scol normal. Lamentablemente pa dialuna a constata cu e scol no tin wc portable ni pa alumno ni docente, den e klasnan cu poco ventilacion e holor di fumigacion a keda den e klasnan y ta insoportabel. E situacion ta keda uno no higienico. Seccion di Higiena a nota cu no tin awa potabel disponibel. Mirando e situacion aki Seccion di Higiena di Departamento di Salud Publico conhuntamente cu Minister di Salubridad Publico a conseha pa laga cera e scol inmediatamente y pa busca un solucion mas lihe posibel pa asina alumnonan por sigui cu nan lesnan y maestronan por sigui eherce nan labor den un ambiente saludabel.
