Na december di aña 2000, Asamblea General di Nacionnan Uni a proclama e Dia Internacional di Migrante e cual ta celebra cada aña den riba e fecha 18 di december. E mesun dia aki na 1990, Asamblea a adopta e Convencion Internacional riba proteccion di derecho di tur trahado migratorio y di nan famia.

Den ultimo añanan, conflictonan, insiguridad y efectonan di cambio climatico a contribui den gran medida na un movemento forsoso den e paisnan of a traves di e fronteranan. Mas di 59 miyon persona a wordo desplasa te na final di aña 2021.

Aunke nan tin motibonan di diferente cu ta obliga nan pa nan desplasamento, migrantenan y personanan desplasa ta entre e gruponan mas vulnerabel y marginalisa di e sociedad, cu pa hopi biaha ta wordo exponi na abuso y explotacion. Nan tin acceso limita na servicionan esencial, incluyendo cuido di salud y nan mester enfrenta agresion di xenofobia y stigmatisacion pa via di publicacion di noticianan falso.

Ademas, hopi trahado migrante ta haya trabounan temporal, informal of sin proteccion, lo cual ta expone un riesgo mayor di insiguridad ademas di explotacion di parti di doñonan di trabou cu ta paga nan menos debi cu nan no tin documentonan legal.

Debi na e falta di rutanan migratorio sigur y regular, miyones persona ta continua haciendo nan biahenan peligroso aña pa aña. For 2014, mas di 50.000 migrante a perde nan bida den e rutanan migratorio na henter mundo.

Sinembargo, migrantenan a demostra ta un fuente di prosperidad, innovacion y desaroyo sostenibel pa e paisnan di transito y na unda nan ta yega. Nan contribucion financiero a traves di remesa ta ofrece un ayudo pa nan famia y ta stimula e mercadonan local, specialmente pa e paisnan cu ta conta cu poco y mita di nan entrada. Nan rol den mercado laboral ta sigui valioso, manera a wordo evidencia den e prome linea di contesta na pandemia di Covid-19, nan conocemento y capacidad a contribui den un medida grandi na e desaroyo di comunidadnan resiliente.

Fortalece e contribucion di e migrantenan na un desaroyo sostenibel ta rekeri di esfuersonan colectivo pa mehora e gobernacion di migracion y pa aborda e desafionan cu migrantenan ta enfrenta. Pacto Mundial pa un Migracion Sigur, Ordena y Regular (GCM) ta ofrece e oportunidad y orientacion necesario pa actualisa e mobilidad humano y pa probecha oportunidadnan cu ta wordo presenta.

Den e Dia Internacional di Migrante y tur dia, International Organization for Migration (IOM) ta reafirma nan compromiso di promove un gestion humano y ordena di migracion na beneficio di tur, incluyendo e comunidadnan di origen, di transito y di destino di e migrantenan.

For di epocanan antiguo, e ser humano ta den un constante transito. Algun personanan ta wordo desplasa pa trabou of oportunidadnan economico nobo, pa nan reuni cu nan famia of pa studia. Otronan ta bay pa scapa di conflictonan, persecucion, terorismo, violacion of abuso di derechonan humano.

Actualmente, e number di persona cu ta biba na otro pais unda nan no a nace ta mayor cu nunca. Segun rapport tocante migracion na mundo di 2020 di IOM te na juni di 2019 tabata calcula cu e number di migrante internacional tabata di casi 272 miyon na henter mundo, 50 miyon mas cu na 2010.

Ken ta un migrante?

IOM ta defini un migrante como cualkier persona cu ta desplasa of a wordo desplasa, a traves di un frontera internacional of den un pais, pafo di su luga habitual di residencia independiente door di: situacion huridico, caracter boluntario of imboluntario di desplasamento, causanan di desplasamento of duracion di nan estadia.

Agenda di desaroyo sostenibel pa prome biaha ta reconoce e contribucion di migracion na desaroyo sostenibel, 11 di 17 obhetivo di desaroyo sostenibel ta contene metanan y indicador cu ta adecua pa migracion of desplasamento, e principio basico di e agenda ta “pa no laga ni un hende atras” y esaki ta inclui e migrantenan.

Accion Mundial

E desplasamento grandi di refugiado y migrantenan ta afecta tur Estado Miembronan di Organisacion di Nacionnan Uni (ONU), pa loke ta necesario estrecha e cooperacion entre nan y establece un asignacion di responsabilidad. Dia 16 di september 2016 Asamblea General di ONU a acoge e Cumbre di ONU tocante

Refugiadonan y Migrantenan cu e fin di uni e paisnan cu un enfoke mas humanitario y coordina, den e Cumbre aki, Secretario General a prepara un rapport cu ta yama “Den condicionnan di siguridad y dignidad: Respuesta na e desplasamentonan grandi di refugiado y migrantenan” cu ta conta cu recomendacion den materia di migracion.

Durante e Cumbre aki, Estadonan Miembro di Nacionnan Uni a adopta un conhunto di compromisonan, conoci como Declaracion di New York pa Refugiado y Migrantenan cu ta expresa e boluntad politico di e dirigentenan mundial di salba bidanan, protege derechonan y comparti e responsabilidad na escala mundial.

E declaracion aki ta reconoce e contribucion positivo cu migrantenan ta haci na desaroyo sostenibel y ta nan a compromete nan mes pa protege e siguridad, dignidad y derechonan humano, ademas di libertad fundamental di tur migrante, independientemente di nan status migratorio.

Actualmente, e dos grupo di migrante y refugiado mas grandi ta di nacionalidad Venezolano y Sirio, segun e Plataforma Regional di Coordinacion Interagencial pa Refugiado y Migrante di Venezuela (Plataforma R4V) nan a publica nan cifranan reciente dia 12 di december unda nan ta indica cu tin 7.131.435 migrante y refugiado Venezolano rond di mundo, 5.986.946 ta concentra na paisnan di Latino America y Caribe.

Pa loke ta trata esun di Siria, segun United Nations High Commisioner for Refugees (UNHRCR) 6.2 miyon Sirio a wordo desplasa den nan mesun pais, nan a bandona nan hogar pa via di e guera, tin 5.6 miyon refugiado Sirio rond di mundo y 13 miyon persona mester di ayudo humanitario na e pais aki.

Na Aruba, Dia Internacional di Migrante a wordo celebra pa fundacionnan como Fundacion Venearuba Solidario diabierna 16 di december na Centro di Bario Playa Pabao cu e participacion di IOM y Aruba Adventist Academy unda e personanan a comparti un dia diferente y den famia, igualmente a sucede na Visstraat den centro di Oranjestad caminda Stichting Rancho a celebra e dia aki cu un Fiesta Tipico den Bario Rancho cu gruponan di musica local y tipico cu benta di cuminda y hende cu kier a bende nan productonan.