A cancela vuelonan for di Europa y scol lo cera desde dialuna: Dos caso di coronavirus confirma na Aruba

Ayera atardi, minister presidente Evelyn Wever-Croes a ofrece un conferencia di prensa pa duna di conoce e prome dos caso di coronavirus den nos isla.

Wever-Croes a afirma cu un di e dos caso cu a duna resultado positivo pa test di coronavirus ta un persona cu ta haci trabounan di consultancy pa un compania di Estado cu a bin Aruba pa motibo di trabou y algun dia prome tabata di vakantie na Egipto y New York. E di dos caso ta un persona Arubiano cu a bay New York y a bin bek cu e virus.

Asina mes, Wever-Croes a declara cu e dos persona aki ta den bon condicion. Un di nan no ta manifestando sintoma mas y e otro tin tosamento, si por mira e medidanan riba e status aki segun Wever-Croes a sigura, nan hasta por bay cas.

Tambe el a afirma cu ambos caso ta den isolacion siguiendo e palabracion di protocol, pero mester haci otro test pa por verifica ainda cu Hulanda. Cu esaki, Wever-Croes a decreta e situacion aki como un crisis mediante un decreto cu lo firma y cu ta duna mas autoridad y espacio pa por preveni y evita mas caso.

Pa loke ta trata biahe, Wever-Croes a informa cu tanto avion como cruceronan lo restringi pasaheronan cu ta bin di paisnan di Europa, for di 16 di maart te dia 31 di maart, asina como tambe pa otro paisnan cu ta wordo menciona den e lista di WHO (Organisacion Mundial di Salud). Esaki cu excepcion di Arubianonan residencia na Aruba cu ta den exterior y ta bin bek.

E medida aki lo drenta vigor mañan 15 di maart y lo keda efectivo, por lo pronto, te dia 31 di maart, momento den cual lo evalua esey di nobo. Sinembargo, desde awe mes tin un control na aeropuerto riba tur pasahero cu ta drenta ainda y na waf cu e turistanan di crucero.

Ademas, Wever-Croes a declara cu tur actividad publico ta wordo cancela na Aruba for di ayera te cu dia 31 di maart. Esaki ta actividadnan deportivo, cultural, social, actividad di Gobierno y priva.

Wever-Croes a declara cu tambe a dicidi, como medida di precaucion, pa cera scolnan otro siman, for di dialuna 16 di maart te diabierna 20 di maart.

Esaki ta decisionnan cu Wever-Croes a señala cu a tuma ayera den oranan di atardi. Sinembargo ta keda evalua e desaroyo constantemente ya cu situacion por cambia hopi lihe. El a pidi comprension den esaki, pa motibo cu autoridadnan ta haciendo lo miho posibel pa tuma na cuenta tur escenario.

“Te ainda nos tin e situacion bou control; pero esey ta depende di cada ciudadano y precaucion cu e mester tuma”, Wever-Croes a manifesta.

El a comenta tambe cu tur departamento di Gobierno ta hayando un carta pa nan por ta prepara y asina contene expansion di e virus pa no afecta mas persona.