Ayera nochi durante conferencia di prensa di gobierno, a duna informacion tocante e ultimo cifranan di infeccion di coronavirus. Ademas, a anuncia reintroduccion di medida di toque de queda.

Prome minister, Evelyn Wever-Croes a bisa: “E crisis aki ta demostra cu e no ta para pa nada otro, y nos ta weita cu awe nos ta na 1,165 caso activo, di cual tin 26 persona den hospital y 7 persona den ICU.”

Pa motibo cu kier mira e cantidad di caso positivo diario baha, Wever-Croes a bisa cu mester cuminsa implementa medida atrobe. Actualmente tin alrededor di 70 caso positivo nobo pa dia, y esaki mester baha. “E bon noticia ta cu nos no tin hospital yen manera nos a kere. Nos tin suerte cu esaki no ta e caso ainda. Pero nos no kier yega eynan tampoco.”

Wever-Croes a bisa cu a constata cu e origen di e casonan positivo actual, pa 25% di caso ta desconoci, esta cu no sa di unda nan a contagia cu e virus. P’esey, entrante diabierna 28 di augustus a introduci toque de queda, for di 12or di anochi pa 5or di marduga. Esaki ta nifica cu despues di 12or di anochi no mag di tin hende riba caya, ni prome cu 5or di mainta. E medida aki lo ta na vigor en principio pa dos siman, pa mira si asina por reduci e contagionan diario pa e casonan di origen desconoci.

Ademas, e medida tambe tin intencion pa limita e cantidad di pashent di covid-19 cu ta bay den ICU, pa asina laga espacio pa otro tipo di pashent cu tin mester di cuido intensivo, por ehempel victima di accident di auto of hincamento. “Con bo ta evita esaki? Cu un toque de queda. Nos a weita cu esaki a funciona biaha pasa, y nos ta spera cu aworaki tambe e lo traha. Pasobra nos a mira cu den oranan di marduga, specialmente pa motibo di consumo di alcohol, ta haya pashentnan di trauma, cu por a evita.”

El a aclaria cu e toque de queda ta cuminsa mey anochi, cu ta nifica cu for di diahuebs anochi, pa 12or, e toque de queda ta cuminsa y hende no mag di ta riba caya.

Alrededor di 50% di tur contagio, segun Wever-Croes ta entre famia. “Esaki no ta tempo pa ricibi bishita, organisa fiesta… Esaki ta tempo cu hunto nos tin cu bay hala faha mara.” E kier pidi pa no ricibi mas di cuatro persona pa un bishita of fiesta. El a bisa cu ta keda responsabilidad di ciudadano pa cumpli cu esaki.

Finalmente, Wever-Croes a informa cu a constata cu un cantidad grandi di contagio a tuma luga na pia di trabou, pa cual a suplica pa doñonan di trabou no tene mucho hende na pia di trabou y tene na medidanan di distanciamento social. “Nos ta pidi pa no tene hopi hende hopi largo cerca di otro”, el a enfatisa. Den proximo dianan gobierno lo ta dunando informacion adicional na doñonan di trabou relaciona cu e medidanan en cuestion.