Manera ya caba Bon Dia Aruba a reporta, luna pasa Colegio di Supervision Financiero di Aruba (CAft) a ricibi e rapport di ehecucion (uitvoeringsrapportage) cu ta corresponde na e prome trimester di 2024. CAft a reacciona riba e rapport aki via un carta den cual nan ta subraya cu a pesar cu ta mustra positivo, e uitvoeringsrapportage no ta cumpli completamente cu acuerdonan.

Den un articulo anterior Bon Dia Aruba a elabora ariba e prome parti di e carta di reaccion di CAft den cual ta resalta cu aunke ta mustra un resultado positivo, CAft ta constata cu esaki no ta cumpli cu e acuerdonan cu a cera cu Aruba.

A continuacion informacion riba e splicacion di e comentarionan di CAft manera inclui den e carta.

Beneficio

CAft ta indica cu Aruba lo realisa AWG 411 miyon den e prome kwartaal di 2024 na beneficio. E ta AWG 63 miyon mas cu den e mesun periodo di 2023. E beneficionan di impuesto a subi pa AWG 46 miyon na final di maart 2024 compara cu e prome kwartaal di 2023. E otro ingresonan a aumenta cu AWG 17 miyon den e mesun periodo.

Beneficio di impuesto

E ingreso di impuesto directo den e prome kwartaal di 2024 ta AWG 134 miyon. Esaki ta un aumento di AWG 18 miyon compara cu e prome kwartaal di 2023. E aumento aki ta wordo causa pa mas ingreso di impuesto di salarionan (AWG 10 miyon), impuesto di ganashi (AWG 3 miyon), impuesto di entrada (AWG 2 miyon) y impuesto di transferencia (AWG 2 miyon). E ingreso di impuesto di salario ta mas halto den 2024 compara cu 2023 debi na mas accionnan di cobransa y e posibilidad di compra di pensioen cu un tarifa mas abou.

E ingreso di impuesto di ganashi ta un tiki mas halto den e prome kwartaal di 2024 compara cu 2023. Normalmente, impuesto di ganashi ta subi den e di dos kwartaal, ora e declaracionnan di impuesto di ganashi wordo entrega. Pero, e aumento ya ta visibel den e prome uitvoeringsrapportage di e aña.

CAft ta resalta cu den e uitvoeringsrapportage no tin un declaracion pa e ingreso mas halto di impuesto di entrada. E ingreso mas halto di impuesto di transferencia ta un resultado di un aumento den compra di casnan di vakantie. Aruba ta realisa AWG 201 miyon den impuesto indirecto den e prome kwartaal. Esaki ta un aumento di AWG 28 miyon compara cu 2023. E aumento ta primordialmente causa pa un aumento di BBO (AWG 23 miyon) y impuesto di accijns (AWG 5 miyon). E aumento di BBO ta causa pa e introduccion di BBO na frontera.

CAft ta remarca cu Aruba no ta duna un clarificacion den e uitvoeringsrapportage pa e ingreso mas halto di accijns compara cu 2023. E ingreso ta bin principalmente di benta di bebidanan alcoholico y sigaria, cu tin un curva instabiel durante e aña.

Otro ingreso

Den e prome uitvoeringsrapportage ta mustra un ingreso di AWG 76 miyon di otro fuente. Esaki ta un aumento di AWG 17 miyon compara cu e prome kwartaal di 2023. CAft ta nota cu e aumento aki ta bin principalmente pa mas ingreso di impuesto di turista (AWG 11 miyon) y e provision di divisa (AWG 9 miyon). Sinembargo, e ingreso na e sector di derecho, boet y otro cu a baha cu AWG 3 miyon den e mesun periodo aki, debi na un caida den e ingreso di Direccion di Telecomunicacion.

Gasto

Pa loke ta gasto, CAft a resalta cu den e prome kwartaal di 2024, Aruba a realisa un gasto di AWG 349 miyon, cual ta un caida di AWG 4 miyon compara cu e prome kwartaal di 2023.

Gasto di personal

Gasto di personal ta un aspecto cual CAft a enfatisa, na mas di un ocasion, cu gobierno mester reduci. Na final di maart 2024 gasto di personal ta AWG 111 miyon. Esaki ta un reduccion di AWG 1 miyon compara cu e mesun periodo di 2023. E reduccion aki ta principalmente resultado di un gasto mas abou pa e subsidio pa mucha, pago di vakantie, otro compensacion y contribucion na e fondo di pensioen general.

CAft ta resalta cu a pesar di e reduccion den gasto di personal den e prome kwartaal di 2024, e cantidad di empleadonan a subi cu 15. E contratacionnan nobo aki ta envolve KPA y empleadonan di proyecto den e Departamento di Impuesto, cu ta financia pa TWO (Organisacion Temporario di Trabou).

Gasto di bienes y servicio

E gasto pa bienes y servicio na final di maart 2024 ta keda casualmente igual cu e prome kwartaal di 2023 y 2022. Gastonan pa entre otro medicamento, paña di trabou, articulo di oficina, producto di compania, huur/lease di vehiculo y gasto bancario a bay atras compara cu e presupuesto. CAft ta observa pa un tempo caba un sub-agotamento den e sector aki y a recomenda Aruba pa ahusta e presupuesto e presupuesto pa abou.

Servicio capital

CAft a destaca cu e servicio capital ta mustra un resultado positivo di AWG 7 miyon den e prome kwartaal di 2024. E ingreso ta AWG 12 miyon y ta bin principalmente di devaluacion libera. E gasto di AWG 5 miyon ta bin principalmente di prestamo di studiante.

CAft ta indica cu Aruba tin presupuesta AWG 21 miyon pa inversion den 2024. Den e prome kwartaal, solamente 3% di esaki a wordo realisa. E demanda pa contratista den e sector di construccion ta halto aworaki pa motibo di e crecemento economico fuerte. Esaki, nan ta resalta, ta retrasa e proceso di destaho pa proyectonan financia pa gobierno. Ta existi un riesgo cu no tur inversion lo wordo realisa e aña aki.

Maneho financiero

E presupuesto 2024 a ser aproba na tempo y a wordo cambia cu e Voorjaarsnota. CAft ta indica cu esaki ta positivo, pero di otro banda Aruba no ta logra entrega e informacion di ehecucion y responsabilisacion na tempo. Pa e motibo ey CAft no por evalua si e documentonan di presupuesto ta realista. Ademas, e rapportnan financiero for di 2019 no ta cla ainda. Sin rapportnan actualisa y verifica pa un accountant, ni CAft ni Parlamento por tin un bista confiabel di e situacion financiero real di e pais.

CAft ta aplaudi e hecho cu Aruba ta trahando pa mehora e maneho financiero den cuadro di e rekisito di e Landspakket, y nan tin confiansa den e desaroyo aki y ta enfatisa e importancia di sostenibilidad di e resultadonan.

Sector colectivo y entidadnan di gobierno

Den e tabel number 2 CAft ta mustra e resultado presupuesta pa 2024 di tur sector colectivo di Aruba, den comparacion cu e realisacion den e prome kwartaal di 2022–2024. Nan ta indica cu pa e entidadnan den e sector colectivo, e resultado positivo di e prome kwartaal di 2024 ta bin di e surplus di AZV, SVb y ATA.

Den e prome kwartaal di 2024, AZV a logra un surplus di AWG 13 miyon. AZV ta spera di logra un resultado positivo di AWG 27 miyon na final di 2024. E crecemento economico fuerte ta trece mas ingreso di prima y impuesto di AZV. SVb ta spera un resultado di AWG 53 miyon na final di 2024. Mirando e realisacion di e prome kwartaal y e desaroyo faborabel di ingreso di prima, CAft ta spera mas entrada pa AZV y SVb.

A pesar di e resultado positivo di ATA di AWG 33 miyon na final di 2023 y e aumento di turismo cu spera den 2024, Aruba a presupuesta un resultado cero (nihil) pa final di 2024. E prome uitvoeringsrapportage ta mustra un resultado di AWG 18 miyon. Considerando e aumento di turismo, CAft ta spera cu e resultado lo ta mas halto na final di 2024.

Por ultimo, CAft ta indica cu Aruba hunto cu Hulanda dos bes pa aña ta designa, cu recomendacion di CBS di Aruba y cu ayudo di CBS di Hulanda, prome cu di 1 di april, cual organisacion lo forma parti di e sector colectivo den e aña presupuestario nobo. E sector colectivo pa 2024 no a wordo aproba ainda pa e minister di Asuntonan Interno y Relacionnan di Reino (BZK). CAft ta yama atencion riba e importancia di un metodo cla pa Aruba, Corsou y Sint Maarten.