AP) — Tres bus di famianan migrante recien yega for di Texas cerca di cas di vice-presidente Mericano, Kamala Harris, den friu cu a kibra record riba bispo di Pasco. Autoridadnan di Texas no a confirma nan participacion, pero e drop-off di migrante riba bus ta den linea cu accionnan anterior di gobernadornan di estadonan fronteriso halando atencion na e politicanan di migracion di administracion di Biden.
E busnan a yega diasabra laat pafo di residencia di e vice-presidente transportando entre 110 pa 130 persona, segun Tatiana Laborde, managing director di SAMU First Response, un agencia di ayudo trahando cu ciudad di Washington pa sirbi miles di migrantes kende a wordo “dropped off” den lunanan recien.
Organisadornan local tabata spera cu e busnan lo yega diadomingo, pero a haya sa riba diasabra cu e grupo lo yega Washington trempan, Laborde a bisa. E personanan abordo tabata inclui muchanan chikito.
Algun migrante tabata bisti T-shirt a pesar di e temperaturanan rond di -9 grado Celsius. Tabata e Bispo di Pasco mas friu den record pa Washington, segun the Washington Post.
Laborde a bisa cu empleadonan tabatin clechinan cla pa hende cu a yega riba bispo di Pasco y rapidamente a move nan den busnan wardando pa hiba nan na un iglesia den e area. Un restaurant den e area a haci donacion di cena y desayuno.
Mayoria di esnan yegando tabata bayendo otro destinacionnan, y tabata spera di keda na Washington brevemente.
Oficina di gobernador Greg Abbott no a responde na un solicitud pa comentario diadomingo mainta. Su oficina a bisa siman pasa cu Texas a duna ticket di bus gratis na mas di 15mil persona desde april pa bay Washington, New York, Chicago y Philadelphia.
Abbott y gobernador di Arizona, Doug Ducey – ambos Republicano – ta criticonan fuerte di presidente Joe Biden riba su trato di e frontera entre Merca y Mexico, unda miles di hende ta purba crusa tur dia, hopi di nan pa busca asilo. Oficialnan na ambos banda di e frontera ta buscando ayudo di emergencia pa pone shelter y servicionan pa migrantenan, algun di cual ta drumi riba caya.
Republicanonan ta argumenta cu Biden y Harris, designa como persona clave di e administracion riba e causanan raiz di migracion, a relaha restriccionnan cu a induci hopi hende pa bandona nan pais di origen. Biden a bandona algun politica pero a mantene otronan implementa pa ex-presidente Donald Trump.
Vocero di Cas Blanco, Abdullah Hasan a yama e drop-off un “acto cruel, peligroso y bergonsoso.”
“Manera nos a bisa ripitidamente, nos ta dispuesto pa traha cu cualkier persona – Republicano of Democrata – riba solucionnan real, manera un reforma comprensivo di inmigracion y medidanan di seguridad di frontera cu Presidente Biden a manda Congreso riba su prome dia a cargo, pero e weganan politico aki no ta logra nada y solamente ta pone bida den peliger”, Hasan a bisa den un declaracion diadomingo.
