Manera cu sr. Rocco Tjon a anuncia siman pasa, el a entrega un mocion pa urgi Gobierno pa aloca fondo adicional pa KIA. Ta den reunion di comision fiho di asuntonan hudicial a haci peticion na Minister di Husticia, pa entrega un plan di emergencia pa eleva siguridad na KIA.
Esaki despues cu 2 detenido a logra scapa for di e instituto.
Segun un comunicado di prensa, durante reunion publico, Minister di Husticia, Andin Bikker a presenta un plan di emergencia, den cual el a elabora riba diferente medidanan cu el a tuma pa eleva siguridad. Sinembargo, pa por implementa tur paso di e plan aki, tin mester di alrededor di 3.6 pa 4 miyon florin adicional.
Mirando e situacion alarmante na KIA y e importancia pa eleva siguridad na e centro coreccional pa e personal, Tjon a presenta un mocion den cual ta urgi gobierno pa aloca e fondonan necesario pa e plan di emergencia. Asina aki e plan di emergencia por bira un realidad den su totalidad.
E mocion a wordo aproba door di tur 11 Parlamentario presente. Na mes momento, mirando e maneho responsabel di Gabinete Wever-Croes, Bikker a splica cu el a compronde di departamento di Finansas cu tin espacio pa aloca e fondonan adicional, segun e comunicado ta finalisa.
