Den reunion publico di 25 di juni ultimo na Parlamento di Aruba den cual tabatin como discusion e tratamento di e presupuesto complementario, den esaki, e parlamentario Raymond Kamperveen a entrega un mocion pa asina adultonan mayor por ricibi nan remedinan sin mester paga pa nan.
Den e mocion firma y entrega pa partidonan Raiz y MEP ta señala cu recientemente director di AZV, Edwin Jacobs, a indica cu estado financiero di e fondo di AZV tin e capacidad pa cumpli sin problema cu su obligacionnan y pa ta un organisacion solido y AZV a indica cu den añanan venidero lo genera un reserva.
For di aña 2004 AZV a introduci un lista di remedi a base di conseho di Advies Commissie Geneesmiddellijst AZV (AGA), e lista aki ta bisa na e dunadonan di cuido cua remedinan AZV ta cubri (lista positivo) y cua remedinan AZV no ta cubri.
Na aña 2021 y 2022, AZV a adapta e lista positivo y asina a saca afo tur remedi “over the counter” (OTC) cu ta ser considera remedi pa cuido propio, ora cu Parlamento di Aruba a trata e adaptacion di e lista positivo a indica na Gobierno cu na tur momento mester garantisa cuido di adultonan mayor y esnan cu ta sufri di un of mas malesa cronico, asina por mantene accesibilidad na e remedinan necesario.
Gobierno a indica cu a base di instruccion di nan specialista e remedinan cu no ta riba e lista positivo mester keda cubri, dado caso ta trata di malesa cronico.
Segun Gobierno, parti di nan maneho y vision “ta pa mehora e poder di compra di e pensionadonan y pa aumenta esaki responsablemente ora tin espacio y cu e presupuesto di Gobierno di Aruba pa dos aña consecutivo (2023 y 2024) a presenta un surplus di mas di 1% respectivo 2,2%”
Nan ta sigura cu ta importante pa entrada di adultonan mayor keda vigila y stimula pa por sigura nan bienestar y alivia e presion riba nan, e cuido medico, incluyendo remedinan, ta bon pa keda accesibel financieramente pa e adultonan mayor.
Pa e motibonan aki a solicita Gobierno di Aruba pa den un cuadro financiero responsabel stimula e bienestar di adultonan mayor y adapta a lista positivo di remedinan di AZV segun analisis di AZV mes, den forma di rebaho of exclusion pa adultonan mayor.
AZV cu surplus pa aña 2023
Segun relato anual di AZV di aña 2023 e cual a ser presenta na april ultimo, ta di relevancia pa cuido pero tambe pa fondo di AZV, cu nan a cuminsa aña 2023 cu un surplus chikito di 7 miyon florin, despues a sigui cu un reunion importante entre Colegio di Supervisornan di CAft hunto cu minister di Salud Dangui Oduber, den e reunion aki minister a haya for di AZV e conseho pa elimina e recorte di 5.5% dia 1 di mei 2023 mirando e recuperacion economico unda no por a usa pandemia mas como motibo pa haci recorte.
Na juli 2023 a trece dilanti un acuerdo di cuido denomina “Zorgakkord” unda tur dunado di cuido hunto cu ministerio y AZV, den bista di e demanda cu nan ta premira pa proximo añanan, nan a delinea e areanan den sector di cuido cu lo mester haya atencion inmediato, den termino medio y largo, “e Zorgakkord aki ta bay bira e base pa nos sigui fortifica nos sector di cuido cu e meta pa nos por cumpli cu e demanda cu nos ta premira cu ta bay tin pa nos poblacion pa loke ta trata servicio di cuido medico,” el a sigura.
Nan a yega na conclusion cu nan no ta bay yega na e recorte di 60 miyon florin cu a keda imponi riba nan den cuadro di e prestamo cu a haci cu Hulanda pa cu pandemia di Covid-19 pa motibo cu no tin espacio pa esey, nan a propone pa bin cu e instrumento Cuadro Financiero Multi Anual pa por contene e gastonan, lo cual nan a haci cu un conhunto di expertonan y nan a present’e na gobierno y na secretario di estado di Hulanda Alexandra van Huffelen na november di aña pasa.
Desaroyo relativo di aseguradonan 65+
Pa loke ta trata e porcion di personanan riba 65 aña di aseguradonan, Jacobs a informa cu aña pasa nan a yega na 18.4%, pues di cada 100 asegurado cu AZV tin, 18.4% tin 65 aña bay ariba, compara cu aña 2022 esaki tabata na 17.5% y tambe lo sigui aumenta durante e proximo añanan, nan expectativa ta cu na momento cu importacion di trahado tin cu tuma luga pa nan por yena e espacio pa hendenan por traha den e cantidad di cambernan di hotelnan cu ta bin “esaki ta bay mengua y no ta bay sigui crece mesun rapido cu lo cual nos a mira den ultimo añanan caminda cu no tabatin mucho movecion den migracion di trahado.” Jacobs a expresa.
Compara cu aña 2022, na 2023 AZV a haya casi 60 miyon florin adicional di entrada y esaki ta basa den e dos entrada principal cu tin cu ta prima di seguro cu aseguradonan ta paga e cual a aumenta pa 283.2 miyon florin y na 2022 tabata na 261 miyon florin.
