Ayera mainta den Parlamento di Aruba a tuma luga un reunion publico tocante e ley pa formalisa e ayudo financiero cu a wordo duna pa negoshi chikito y mediano durante pandemia di Covid-19, tempo cu a duna e suma total di 44 miyon florin.

Den presencia di minister di Asuntonan Economico Geoffrey Wever, minister di Finanzas Xiomara Maduro y prome minister Evelyn Wever-Croes ayera den parlamento a trece dilanti informacion di e ley aki, specificamente di ken tin derecho riba e ayudo aki. Por ehemplo companianan di 1 pa 50 empleado, cu ta inscribi na SVb, na Departamento di Impuesto, cu no ta den un surseance van betaling, esaki tabata e criterionan cu nan mester cumpli ora di haya un ayudo financiero temporal.

Minister Geoffrey Wever a splica cu e sistematica di e ley tabata con ta wak kico e companianan tabatin na entrada y kico nan tabatin di ganashi den e mesun kwartaal di e aña anterior. Den e caso aki e dos kwartaal di 2020, pa motibo cu e prome kwartaal no tabata aplicabel. Den e di dos kwartaal SVb a otorga 4.000 florin na cada empresa cu tabata inscribi sin cu a haci e aplicacion, debi cu na e momento ey e situacion tabata di tal forma cu no por haci e analisis necesario y e companianan tabatin necesidad. Pa e di tres kwartaal e aplicacion si a tuma luga. Den esaki, e compania mester a demostra cu nan tabatin un caida di benta di 25% of mas.

E procedura tabata cu a encarga SVb cu ehecucion di e areglo aki e tempo ey basa riba un MB, caminda a pone e elementonan di mas importante, segun minister Wever, y tambe a publica den landscorant pa asina tin mas transparencia.

Si e compania tabata cumpli cu e criterionan, nan tabata haya e ayudo financiero basa riba un decision di minister di Economia e tempo ey, cu tabata Xiomara Maduro. Tambe a informa cu companianan tabatin un periodo stipula di cinco dia pa por aplica pa esaki via online, debi cu e pais tabatin e medidanan di lockdown, y den e siguiente dos siman, minister y SVb mester a aproba esaki transferiendo e ayudo na e cuenta di e compania.

Igualmente minister Wever a indica cu e ley aki den su parti huridico y parti financiero ta identico na e landsverordening di Loonsubsidie.

Di su parti, minister Xiomara Maduro a trece dilanti cu e motibo pakico ta trece e informacion aki na Parlamento despues di tres aña di pandemia, ta pasobra dia 15 di maart ta e dia cu Covid-19 a haci su entrada na Aruba, na unda 90% di economia ta consisti di negoshinan chikito y mediano. Na e momento ey a surgi un crisis cu e peticion pa Gobierno yuda pa por salba economia di pais Aruba.

Nan a forma un comision cu a hiba e nomber di Comision Comercio den cual tabatin departamentonan como esun economico, di impuesto, SVb, Central Bureau Statistics Aruba, ATIA, Ahata, Camara di Comercio y Bureau Rampenbestrijding Aruba, cu a cuminsa reuni di manera online pa traha y por yuda e companianan aki. Asina a bin e yudansa di 4.000 florin pa kwartaal pa paga otro gastonan cu no ta di personal, ya cu na e momento ey ya caba tabatin palabracion cu Hulanda pa mira con por concretisa e subsidio di salario.

Prome minister tambe a hiba palabra den e reunion publico aki, el a señala cu esaki ta un ley cu a brinda ayudo na miles di compania mediano y chikito, “y nos ta convenci cu ta danki na e sosten aki, awe nos economia ta fuerte y ta birando mas fuerte.”

E ley aki, segun prome minister a afirma, a sigui e mesun linea cu e ley di FASE y ley di Loonsubsidie, e ta e di tres ley den total y e ultimo tambe cu nan tin cu trata. E leynan aki ta basa riba circunstancianan hopi excepcional cu a wordo causa pa pandemia cu consecuencianan grandi pa Aruba y p’esey no por warda pa cumpli cu e reto legislativo formal prome pero, cu si mester a tuma accion inmediatamente.

Dia 1 di juni 2020 nan a informa parlamento por escrito kico tabata locual nan tin cu haci pa bay yuda den e situacion economico aki. “Parlamento no tabatin ningun obhecion y cu esey nos ta conclui cu parlamento tambe a sostene esaki y p’esey den e ley aworaki ta papia di un gedektverklaring y no di un machtiging,” prome minister a declara.

El a bisa cu ta importante tambe cu e pagonan a tuma luga caba y nan tabata presupuesta, loke prome minister ta sigura cu esaki tabata hopi positivo pa economia y e aña aki nan ta bay surpasa e nivel di economia prome cu pandemia.

Prome minister a admiti cu nan ta laat pa trece e discusion aki na parlamento despues di tres aña pero esey no ta nifica cu algo a bay fout “akinan nos no ta pa purba di tapa algo cu por a bay malo si of no,” el a bisa.

E meta cu e ley aki ta pa hancra den ley e procedura cu a wordo hiba cu a yuda miles di persona, manera prome minister a sigura.

A aproba e ley aki cu 10 voto na fabor y un den contra.