Un organisacion vibrante, cu proposito pa complementa y engrandece folklore y cultura Arubano cu actividadnan desaroya y guia pa boluntario, ta organisando actividadnan grandi, entre nan e Gran Parada Folklore Cultura cu lo tuma luga den luna di september.
Francisco, miho conoci como “Chico” Harms, a splica cu pa dia 17 di juli awor nan ta preparando e Parada Acustico cu door di pandemia Covid-19 a ser cancela pa dos aña. E aña aki ta bay ta un actividad hopi grandi caminda no ta bay usa speaker ni ningun otro instrument cu ta rekeri di coriente, sino cu e participantenan mes ta bay usa nan mesun instrumentonan y nan mes ta bay canta y toca instrumental.
E parada aki ta bay cuminsa band’i misa di Brazil y caba na sede di bario di Brazil, unda ta bay sigui celebra.
Pa dia 23 di juli y 30 di juli tin organisa e Festival Cantica di Caya Arubano, e cual a cuminsa cu varios grupo cu e mesun cantica, unda cu despues nan a dicidi di hacie den contexto di cantica di caya. Na e momentonan aki nan tin 9 mucha hoben participante cu ta bay canta dia 23 y ademas 13 hende grandi cu tambe ta bay canta dia 30 di juli.
Pa esnan cu ta interesa pa participa den Festival di Cantica di Caya, Harms a declara cu dia 16 di juli lo tuma luga e inscripcionnan pa hende grandi y dia 9 di juli pa muchanan hoben.
Di su parti, Leo Harms hunto cu Marcia Dirks a trece dilanti informacion tocante eleccion di Reina Folklore Cultural di Aruba, unda cu eleccion di reina ta plania pa dia 20 di augustus den e categoria di mucha y dia 27 ta bay tin eleccion pa Dama Cultural y Gran Dama Cultural.
Inscripcion pa muchanan por participa den eleccion di reina ta habri te dia 15 di juli. Ta importante pa menciona cu e participantenan mester bin cu nan mesun show, pero cu e paña no mester bira algo hopi costoso, importante ta pa representa e parti folklorico y cultural.
Pa dia 27 di augustus ta bay tuma luga e show pa Dama of Gran Dama, y pa esaki e paña tampoco mester bira algo caro. “Nos ta purba mantene e costo mas abao cu ta posibel. Si e mester ta un bunita paña cultural y di folklore, den esey nos ta pone hopi enfasis” Dirks a señala.
Pa loke ta trata e show di e categoria aki, mester tuma na cuenta cu “no hopi hende mester ta riba stage, sino cu mester ta algo cu ta representa loke ta e cultura y custumbernan di Aruba”, Dirks a expresa.
Na momento cu candidatanan pa reina registra, nan ta bay haya un lista cu e reglanan di kico nan mes mester tene pa nan mes y kico no, pa asina nan tin conocemento con nan mag di bisti y pa nan ta bon prepara.
Tambe a informa cu pa dia 2 di september nan ta organisando e Parada cu Lanterna den Brazil, cu e aña aki ta cumpli cinco aña den cual nan ta subi caya cune y “el a haya un bon acogida y ta hopi bunita, pasobra e lanterna den oranan di anochi ta hopi bunita”, Harms a bisa.
E organisacion a haci un peticion pa esnan cu lo kier participa den parada aki pa por cumpra nan lanterna na tempo, pa motibo cu e gruponan ta bira grandi y nan kier mira hopi lanterna riba caya.
Pa dia 4 di september proximo nan a anuncia e parada grandi mes, “Folklore Cultural di Brazil” den cual nan a informa cu 9 grupo grandi ta bay participa. Den e parada aki ta bay tin cinco banda y cinco disco. “E ta bay bira un parada hopi bunita e aña aki y mirando e entusiasmo cu tin, e lo bira algo super bunita sigur”, el a comenta.
Cu tur e actividadnan aki cu ta bay tuma luga proximamente, nan ta haci un yamada na comunidad di Brazil y Aruba en general, pa motibo cu nan mes a sigura cu “locual cu nos ta haci, a nos cu ta akinan ta esunnan cu ta purba di conserva nos folklore cultural. Ta p’esey cu nos ta invita Aruba completo pa bin wak e parada y asina ey yuda nos pa conserva nos folklore cultural” Harms a finalisa.
