Diabierna mainta Minister di Turismo y Salud Publico Sr. Dangui Oduber a tene un reunion cu miembronan di Pan American Health Organization. E reunion aki tabata den cuadro di diferente proyectonan cu lo wordo ehecuta den e siguiente lunanan.
Pan American Health Organization semper tabata un gran ayudo den nos sector di salud. Nos tin hopi aña ta traha hunto pa asina por mehora e servicio y calidad di salud na Aruba. Na e momentonan aki nos ta trahando riba diferente maneho di prevencion, den cual NCDs (Non-Communicable Disease) ta un parti bastante grandi.
Na 2006 PAHO a haci un estudio na Aruba cu diferente puntonan cu a wordo tresi dilanti y a wordo uza pa genera data tocante salud di nos pueblo. Conhuntamente cu PAHO, Ministerio di Salud Publico lo ta organisando un estudio cual lo bay tuma lugar na cuminsamento di 2023 y lo wordo uza como e baseline pa adkiri data den nos comunidad.
E proyecto aki ta premira di consisti di data for di alrededor di 5000 persona den nos comunidad y lo wordo tuma per “huishouden”. Proyecto nan manera esaki ta sumamente importante pa por implementa medida den salud publico na tempo y eficiente.
Minister Dangui Oduber ta orguyoso di e cooperacion entre PAHO y Aruba, mirando cu durante e reunion Aruba a haya hopi elogio pa ta constantemente ocupa na un manera pro activo den e area di prevencion di salud. Prevencion ta un prioridad pa e mandatario y e ta sigur cu hunto nos lo por logra esaki. Mas informacion tocante e estudio aki lo wordo comparti cu pueblo pronto.
