Na 2021, Algemene Rekenkamer Aruba a realisa un evaluacion basa riba su propio prestacion cu tabata segun Supreme Audit Institution (SAI) Performance Measurement Framework (PMF).
Basa riba e resultado di e evaluacion interno aki y e acuerdonan aplicabel cu ta inclui den e Landenpakket Aruba, Algemene Rekenkamer Aruba a busca posibel sosten di Algemene Rekenkamer di Hulanda.
Den e contexto aki Algemene Rekenkamer di Hulanda ta actualmente na Aruba pa un bishita oficial, den forma di un mision exploratorio cu e obhetivo di formula un programa di sosten pa algun aña. E bishita aki ta tumando lugar den e siman di 27 di juni pa 1 di juli 2022. Parti di e bishita aki ta inclui conversacionnan na nivel oficial cu stakeholders y un sesion di informacion tecnico na Parlamento di Aruba. E sesion aki a tuma lugar awe mainta y a informa Parlamento tocante e investigacion di eficiencia y eficacia cu Algemene Rekenkamer a realisa referente e ayudo di emergencia FASE.
E rapport a wordo publica dia 5 di mei 2022, y a wordo presenta awemainta na Parlamento den presencia di Algemene Rekenkamer Hulanda y Curaçao. E secretaris di Algemene Rekenkamer Curaçao tambe ta na Aruba pa mira e posibilidadnan pa traha huntu cu e rekenkamers nan den Caribe y Hulanda y fortalece e relacion.
Den e sesion di awe mainta e introducion y motibo di e rapport a wordo presenta door di e secretaris di Algemene Rekenkamer Aruba, y unda cu despues e resultadonan di e investigacion a wordo presenta door di e lider di e proyecto. Na final e voorzitter di Algemene Rekenkamer Aruba a presenta e recomendacionnan y despues ta tin posibilidad pa haci pregunta. Akinan a haci bon uzo di e posibilidad. Algemene Rekenkamer por mira bek un mainta fructífero.
