Aruba a caba di pasa den un susto cu e menaza di un tormenta, cu felizmente no tabata mas cu yobida cu tabata haci falta di tur manera. Ta bon cu e situacion a resulta di ta asina modera; ningun hende lo ta desea pa realmente nos keda confronta cu un berdadero tormenta, mucho menos un horcan. E situacion di emergencia a mustra cu debidamente a prepara pa algo mas grave, mientras cu e alivio despues a conduci na cierto critica cu a haci tanto preparacion, y a urgi e poblacion tambe pa haci esaki, mientras tur e gastonan ey a resulta innecesario. Aunke por tin comprension pa e pensamento aki, sigur den un tempo cu tur cos ta birando mas caro, pero mester bisa si cu ora autoridadnan ta prepara pa e tipo di evento aki, ta dificil pa bisa di antemano cu e situacion lo bay ta mas modera. Esey ta algo cu na caminda a resulta asina, pero ta requeri adaptacion adecua si.

Sin embargo, despues cu den marduga di diarazon pa diahuebs a resulta cu e situacion no ta di gravedad, gobierno tabata sumamente lento pa caba trabao, pa tuma accion pa restablece normalidad. Nos economia no ta den un situacion di gloria ainda y cada dia cu no por opera ta uno mas cu no ta contribui na su recuperacion. Y no por pensa cu sector priva no mester di sector publico y cu, mientras e empleado publico por relaha un par di dia extra na cas, falta di acceso na varios entidad gubernamental no tin su efecto riba funcionamento di sector priva. Esaki no ta solamente e caso pa departamento manera aduana, sino tambe tur e departamentonan unda ta tramita permiso pa sector priva, añadiendo atrobe varios dia di inactividad y di retraso pa e empresanan involucra. Pero ta parce cu keto bay preocupacion pa funcionamento di sector priva ta un asunto practicamente irelevante pa gobierno, unda fabricacion di un regalo extra di dia liber pa ambtenaar, cu vista riba eleccion, ta mas importante cu pone tur cos funciona mas pronto posible. A proposito, ta bon pa bisa si cu no ta tur ambtenaar lo a keda contento cu e situacion crea pa lentitud di gobierno, pasobra esnan consciente entre nan sa tambe cu nan trabao a sufri atraso. No tur empleado publico ta cay den e categoria cu ta duna bida na e imagen di caricatura di empleado publico na henter mundo.

Otro aspecto cu ta bin dilanti den un situacion di posible emergencia ta e estado problematico di nos infrastructura. Comentario riba esaki cada vez ta mas bien un automatismo necesario, pero despues cu awa seca y a yena e buraconan mas grave den caminda, nos ta parce di ta lubida cu tin mas trabao pa haci, pa preveni un situacion berdaderamente lamentable dia cu di berdad bin un tormenta di categoria. E conclusion den un caso asina ta masha simple: nos no ta prepara e tipo di calamidad ey, en todo caso no den sentido di mehoracion di infrastructura pa kita cierto preocupacion for di caminda. Pa bon comprension: tin preparacion oportuno pa e medidanan di emergencia cu mester tuma pa e poblacion ta bon prepara pa e calamidad mes. Sin embargo, aki nos ta referi explicitamente na e mehoracion di infrastructura, loke ta requeri inversion cuantioso den eliminacion di peligro den e zonanan cu cada biaha cu tin yobida fuerte ta core riesgo di inundacion y di perdida di nan pertenencianan. Asina leu cu nos conocimento ta yega, no ta mira avance den preparacion y ehecucion di plannan di mehoracion, mucho menos inclusion di e gastonan den presupuesto.

Awor, ta facil pa bisa cu “no tin placa pa esey”, pero e ora nos ta yega na e circulo vicioso di semper: pasobra ta gasta miyones den asunto innecesario, no tin placa pa inverti den loke si ta necesario. Tambe ta facil pa bisa den e contexto aki, como gobierno di turno, cu “ta esey ta e situacion cu nos a bin hereda”. Esey ta un argumento no semper valido. E hecho ta cu e dos partidonan grandi a domina escenario politico den e ultimo 36 aña di tal forma cu den hopi aspecto nan no a hereda solamente di e contrincante cu a goberna net promer cu nan, sino di nan propio gobierno anterior na e ultimo ey.

Ademas cu esey no ta e pregunta clave; e pregunta clave ta: si ningun gobierno no a mishi cu e problemanan aki, mucho menos resolve nan, esun actual so por actua… Nan ta dispuesto, cu prueba, pa inverti den soluciona e asuntonan aki? Si e contesta ta positivo, anto ta surgi e siguiente pregunta: di unda e fondonan lo bin pa realiza esaki? Nan lo mester bin di un saneamento di finanzas publico, pa haci posible inverti den e cosnan necesario aki. E problema no ta pa haya un gobierno asina leu cu nan ta admiti esaki. E problema mayor ta pa logra cu nan ta cuminza move. Nos tur conoce for di cabez e lema cu a palabra cu Hulanda algun aña atras: “Mester reforma nos economia y nos pais, pa nos ta mas resiliente den un siguiente calamidad.” E tristo realidad ta cu nos ta keda pega den e slogan aki, pasobra no ta tuma decision cu por causa perdida di voto. Aki si por bisa, ironicamente, cu tin un maneho continuo y persistente…