ATIA como representante y e bos di comercio di Aruba no ta compronde dicon sector publico ta keda cera si sector priva si por a habri awe 30 juni, un dia despues di PTC2.
Sector priva ta depende di sector publico den varios area pa fungi efectivamente. Por pensa riba DOW, Aduana, Arubus, DIP, DIMAS, DPL y DIMP, cu ta departamentonan clave pa sector priva por ta productivo.
No tin ni un rason pa empleadonan di sector publico sinta na cas awe si tur cos ta “back to normal” manera Min Pres a anuncia ayera tardi den e conferencia di prensa di 5pm. Den e conferencia MinPres a anuncia cu lo kita e “shelter in place” pa 6am y trabou nan por cuminsa bek. Pues tawata tin amplio tempo pa e empleadonan publico haya e informacion y presenta na pia di trabou awe pa un dia productivo pa nos economia.
ATIA
Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y nos rednan social.
