E ta miho pa Gobierno y pa Aruba ta si e gastonan publico baha, pa Gobierno depende menos riba crea mas entrada. Asina Presidente di College Aruba financieel toezicht, CAft, dr. Raymond Gradus a bisa Bon Dia Aruba.

“Ta ora pa realmente mira sistematicamente na e gastonan, pa por fin baha esakinan. Nos sa di e bien y e servicionan cu a bira mas caro, nos sa di e gasto di personal, nos sa di e peso financiero di e proyectonan PPP.

No tin splicacion suficiente pakico Gobierno no por baha e gastonan, segun Gradus. Berdad ta warda e contesta di Gobierno pero locual CAft ta mira ta aumento continuo di gasto. E Presidente di CAft a mustra fisicamente con e liña di huur di edificio, subsidio, di gasto di PPP y di ‘goederen en diensten’ ta bay. Tur ta subi so. “E fondonan cu ta pasa pa Serlimar y otro entidad publico/ semipublico ta unicamente aumenta. Pero locual ta esencial cu mester cambia e direccion di e tendencia aki, cu por yega na un consolidacion fiscal.”

Gradus ta enfatisa cu berdad Aruba ta autonomo den Reino y tin plannan cu ta hopi bon riba mes. “Y Aruba mester bin cu accion, accion y accion. Y ta eynan ta unda e pais ta keda atras.”

E ta spera cu den e carta cu Gobierno mester manda ta inclui algun accion y den nos conviccion, nos ta kere cu nos a presenta e miho argumentonan. Pasobra e debe di Aruba ta mucho halto. Economia ta draai hopi bon, pero Presupuesto di Gobierno no ta keda a paso. E deficit di 2021 tabata 11 porciento mientras cu economia a crece cu 17 porciento. E aña aki economia lo crece cu 4.7 porciento segun IMF, pero deficit di Gobierno ta 4.2 porciento di e Producto Interno Bruto, GDP. “Esey ta areanan cu mester traha riba dje. No solamente pasobra e debe ta halto, pero pasobra tin hopi prestamo riba mercado internacional cu mester keda refinancia, cu ta mas caro awor. Mi ta kere cu ta na interes di tur hende, cu Aruba ta manda e señal cu kier tuma e toro na su cacho.”

Gradus ta admiti cu no ta facil pa corta den gasto, pero ta enfatisa cu tin fruta cu ta colga hopi abao y cu por piki nan hopi lihe. “Ta cuestion di keda consistente y duna Aruba oportunidad pa crece.” E tin speransa cu por, pasobra si mira con turismo ta bay bon, e ta mustra cu tin capacidad pa tuma pasonan necesario, Gradus a bisa.

BTW

Aruba a dicidi na 2021, sin ningun deliberacion cu CAft of Hulanda pa baha e tarifanan di belasting, tanto di loon como inkomstenbelasting. Y e colegio a bisa cu mester bin compensacion pa e reduccion aki, particularmente pa motibo cu na e momento ey Aruba tabata depende di sosten di likides di Hulanda. “Cu tur respet, pero si ta depende di sosten financiero di Hulanda, nos a bisa cu e lo bay den e totalidad.”

Den otro palabra, e reduccion na loon y inkomstenbelasting a nifica reduccion di e suma cu Hulanda a duna tambe na sosten, basa riba conseho di CAft. “Nos memorisa e paso aki den un total di nuebe (9) conseho y loke ta wak atrobe cu cada biaha ta pospone pa tuma e medida. Esaki ta e problema di Aruba.” Por ehempel, lo por mira unda ta bay subi otro cobranza di belasting. Pero en principio, Raymond Gradus y CAft ta di pensamento cu si kier baha belasting un caminda, e ta sensato pa bin cu compensacion y ta ora pa active esaki.

Sinta den stoel di Gobierno

Tanto Minister di Finanzas Xiomara Maduro como Lider di RAIZ y actual Minister di Transporte, Integridad, Naturalesa y Asuntonan di Adulto Ursell Arends a bisa publicamente cu CAft no por sinta den stoel di Gobierno. Y dr. Gradus ta de acuerdo cu e ponencia aki. “Nos ta un organo di conseho pa Conseho di Minister di Reino y tambe consehero di Conseho di Minister di Aruba. E ta na Gobierno di Aruba pa resolve e asuntonan, pero si den cuadro di e protocol sera cu Hulanda y e ley Aruba College financieel toezicht, LAft.”

Locual Gradus ta desea pa Aruba, el a bisa Bon Dia Aruba ta logra espacio financiero pa baha su debe. Tin un momento importante cu e presupuesto di 2022, unda CAft enfaticamente ta kere cu mester reduci e deficit di 232 miyon florin, pa asina por anticipa na e presupuesto di 2023 unda mester tin un surplus di 1 porciento. E buraco ta mucho grandi pa logra e meta di 2023, segun CAft.

Y esey ta e meta tras di e recomendacionnan nombra den e carta di 10 di Juni. “Unabez cu baha e debe, e interes ta baha tambe.” Den presupuesto tin un serie di interes cu den e proximo añanan lo mester baha cu 50 miyon.

Pero e calculacion no ta cuadra, pasobra e nivel di interes ta basa riba e punto di salida cu presupuesto lo tin un porciento di surplus na 2023. Den otro palabra, pa e meta di baha gasto di interes mester bin surplus, pa asina bin espacio pa otro asunto importante manera enseñansa y necesidadnan local. Locual ta mira awor aki ta cu e gasto di interes ta pusha afo e inversion den asuntonan cu ta importante pa Aruba, segun dr. Gradus.

AZV, RWZI y Dump

Aruba ta confronta retonan grandi cu e planta di procesamento di aw ana Bubali y tambe e dump di Parkietenbos, cu ta rekeri sumanan cuantioso. Pero sin fondo y sin e posibilidad pa crea fondonan special of un proyecto PPP, e ta un reto mas grandi ainda pa yega na un solucion. CAft a bisa cu kier mira e proposicionnan pa inversion ta mas eficiente y cu eficacia. Y unabez cu presupuesto ta cumpli cu norma, ta crea espacio pa inverti den e proyectonan. “Hulanda e ora lo ta interesa e ora pa participa den financiamento cu un interes abao, cu ta beneficioso pa presupuesto di Aruba. Hulanda a bisa cu e aña aki ainda e ta interesa pa inverti den proyectonan di necesidad.” No por traha mas cu fondonan separa di presupuesto. Pasobra locual ta haci ta sconde e gastonan publico for di presupuesto, pero toch ta afecta e posicion financiero di Aruba negativamente. Consequentemente, por ehempel, intencion di Gobierno pa yuda e grupo financieramente vulnerable pa e gasto di contribucion propio pa cuido medico, ta algo di compronde pero e mester bira parti di e presupuesto. Maneho financiero di Aruba no ta permiti cu tin un cantidad di fondo cu ta dificil pa controla.

Sinembargo, dr. Raymond Gradus ta mustra cu pa e RWZI, ta hotelnan ta esnan cu mas ta probecha. Pues, lo por pensa riba un sistema di prefinanciamento, unda Hulanda lo por pone fondonan disponible, pero basta cu tin un proyecto bon describi, cu fondonan pa mantencion riba presupuesto. “E hotelnan mester por duna nan contribucion pa e financiamento multianual di un proyecto asina. Mi kier bisa Aruba, cu Hulanda kier yuda, pero e ta esencial cu e resto di presupuesto ta na ordo. Pero ban wak con e desaroyo lo ta den e proximo dianan.

Van Huffelen

CAft ta keda pendiente pa mira si Aruba ta cumpli completamente of cu un parti di e normanan palabra den e protocol, y unabes cu esaki ta cla, lo por haci un declaracion. Pero, den su carta di 10 di Juni, dr. Gradus a bisa di lo conseha Conseho di Minister di Reino pa duna Aruba un ‘aanwijzing’ si no cumpli. Bon Dia Aruba a puntra kico un ‘aanwijzing,’ lo nifica, pero dr. Gradus a bisa cu esey no ta su competencia. E organo lo por duna conseho unicamente y ta keda na Gobierno di Reino pa dicidi. “Si ta asina leu, e ta un pregunta pa Ministerio pa Asuntonan Interior y Relacionnan di Reino.” En todo caso, dr. Gradus a enfatisa cu Secretario di Estado Alexandra van Huffelen no tabatin ningun papel den e decision pa duna Aruba mas tempo pa reacciona