Ayera mainta WEB Aruba NV a anuncia cu entrante awe, 1 di juli 2022, tarifa di awa lo subi di prijs. Segun nan a informa den nan comunicado di prensa, esaki ta debi na un aumento drastico di Heavy Fuel Oil (HFO) di alrededor di 126%, compara cu aña pasa. Un noticia cu a impacta comunidad completo y cu lo tin un efecto ariba e costo di bida pa ciudadanonan di nos pais.
Cu apenas un dia di anticipacion WEB Aruba NV a haci e anuncio cu nan lo ta introduciendo un structura di tarifa nobo, cual segun nan ta splica, lo conduci na un particion mas husto entre consumidornan grandi y consumidornan chikito.
Segun e comunicado ta sigui indica, te aworaki WEB a absorbe e aumento di gasto di HFO, pero e punto a yega cu esaki no ta responsabel mas. Como parti di e medidanan pa modera e aumento di tarifa, segun nan ta señala, nan a baha otro gastonan operacional caba cu 6.5 miyon y adicionalmente nan a acepta di genera menos entrada pa 2022 y a vries salario di tur empleado pa aña 2022.
Sin bisa menos e noticia a cay manera un baño di awa friu pa hopi cu ainda ta lucha pa para riba nan pia despues di e golpi duro cu e isla completo a ricibi economicamente pa motibo di e pandemia di COVID-19.
Despues di e publicacion di e anuncio oficial ariba rednan social, e reaccionnan tabata demostra e malcontento di comunidad. Hopi ciudadano a expresa cu e aumento aki ta inhusto, inhumano y cu e aumento, cu pa hopi ta casi dobel di loke nan ta paga actualmente, lo “kibra nan cartera” tur fin di luna.
Minister President, Evelyn Wever-Croes, durante e conferencia di prensa di ayera a contesta un pregunta ariba e topico aki di un miembro di prensa indicando cu Gobierno di Aruba a wordo desagradeblemente sorprendi pa e anuncio di WEB sin cu nan a haya aprobacion di gobierno y mientras cu nan ta na mesa cu WEB y Elmar ariba e tema aki.
El a agrega cu no ta un secreto y cu su mes a yega di menciona varios biaha cu nan a pidi pa hisa e tarifanan, pero gobierno a bisa nan cu nan kier mira di nan banda cierto trabounan wordo haci. “Nos ta na mesa cu nan, nos a sinta na mesa cu nan e siman aki prome cu retract pa atende cu e crisis y e palabracionnan no ta cu awe nan ta sali anuncia algo asina”, el a bisa.
Minister President a indica cu e caso ta den man di Minister Glenbert Croes, ken ta e minister di energia y asina cu Minister Croes tin algo mas di bisa e mes lo duna e comunicacion eynan.
Pa loke ta otro pregunta tocante si e anuncio di WEB tin di algo di haber cu e aprobacion di e ley LNT cu a wordo aproba pa probablemente evita cu e prijsnan por sigui aumenta. Na esaki Minister President a contesta; “Mi no ta kere cu WEB Aruba lo haci algo asina pasobra un ley a pasa. Mi no por specula riba esey”.
Gina Maduro, presidente di sindicato ABV, a publica su reaccion ariba su cuenta di Facebook caminda e ta expresa cu e aumento di e tarifa no a wordo haci na un manera husto.
“E pensionado cu ta biba su so cu un solo entrada cu yama AOV, e grupo vulnerabel aki bo ta castiga. Mi ta spera por evalua esaki prome cu introduci e tarifa nobo per 1 juli 2022”, Maduro a indica.
El a agrega cu e fundacionnan cu a wordo afecta pa e recorte di 60 miyon, mester haya un tarifa special, y cu e expansion di hospital y ImSan coriente y awa a subi drasticamente y cu eynan mester bin cu tarifa special pa yuda comunidad.
Sindicato di Maestro di Aruba (SIMAR) a manda un carta pa Minister Presidente den nomber di tur nan miembronan y sector di enseñansa vociferando nan malcontento y preocupacion pa e impacto cu e aumento aki lo tin pa e clase trahado.
“Tin famianan cu hopi biaha no tin e recursonan ni cu esakinan ta suficiente. Hopi miembro a indica cu ainda nan ta luchando cu nan finanzas y cu ta haci hopi esfuerso pa yega fin di luna cada luna”, e sindicato ta señala.
SIMAR ta menciona tambe cu e recorte salarial cu tin desde mei 2020 pa sector publico y semi-publico, ta un sla fuerte pa hopi y mas ainda cu tin falta di claridad y tin un gran incertidumbre si realmente e empleadonan aki lo haya e 5% back den luna di juli.
E aumento di tarifa di WEB Aruba, SIMAR ta señala, lo afecta ainda mas e costo di bida. Nan ta sigui indica cu ta wordo bisa cu e aumento di costo di bida ta alarmante, pero e impresion general ta cu ningun siguimento extensivo ta wordo realisa of ta wordo realisa di manera insuficiente den e sector priva.
“Directiva di SIMAR ta lamenta cu e anuncio di WEB lo influi negativamente den e situacion economico di diferente famia cu mester sobrevivi cu tiki recurso. Nos kier señala cu AWA ta un di e necesidadnan primario di e ser humano. Di otro banda e ta indiscutiblemente probabel, specialmente den educacion, cu e problemanan social lo aumenta considerablemente. Ta premira cu e final ainda no ta den bista”, el a agrega.
Por ultimo SIMAR a solicita urgentemente na Minister Presidente pa e interveni den e tema, no solamente como stakeholder den nomber di Gobierno di Aruba, pero den su calidad como Prome Minister, cu su deber ta sirbi principalmente e interes nacional y e bienestar general di e pueblo, cu mester ta central.
