Dia 26 di juni ta conmemora e Dia Internacional Contra Abuso di Droga y Traficacion Ilicito. Den cuadro aki Fundacion Anti Droga Aruba (FADA) conhuntamente cu otro instancianan a uni den un conferencia di prensa ayera mainta, pa asina para keto riba conscientisacion y prevencion.

Organisacion di Nacionnan Uni ta para keto pa reforsa accion y cooperacion pa un sociedad liber di droga. For di su aprobacion na aña 1987, e dia aki ta pretende reuni persona, comunidad y organisacionnan na henter mundo pa crea consciencia riba e problema importante cu substancianan ilicito ta representa pa sociedad.

Rulienne Arends, trahado preventivo di FADA, a bisa cu dia 26 di juni ta un dia hopi importante pa nan y pa otro instancianan unda nan ta celebra e Dia Internacional Contra di Abuso di Droga y Traficacion Ilicito. Nacionnan Uni pa aña 2022 a pone e lema “Care in Crises”, un campaña enfoca riba e parti humanitario.

Pa e motibo aki, Nacionnan Uni ta convoca gobierno, organisacionnan internacional, sociedad civil y tur persona interesa pa tuma accion urgente pa protege e hendenan. E campaña ta destaca e datonan di rapport Mundial di Droga di United Nations Office on Drugs and Crime (UNODC) unda ta proporciona hecho y solucionnan practico pa e problema actual aki di droga y pa sostene un vision sanitario pa tur basa riba ciencia.

Arends a expresa cu e dos aña cu a pasa tabata hopi intensivo relaciona cu pandemia Covid-19 y FADA a haya hopi yamada di personanan sea pa nan mes of pa nan familiaranan, pa motibo cu nan por a perde trabao, entrada fiho, familiaranan cu a fayece, y den esey nan a cay back den adiccion.

Manera ta conoci, pa hopi aña caba FADA ta traha den e parti di prevencion, unda cu nan ta duna charla na muchanan for di 4 aña bay ariba, pa splica nan kico tur ta e peligernan cu uso di substancianan legal of ilegal por trece pa salud di un persona. Arends a splica cu nan a yega di duna charla hasta na adultonan di 80 aña pa nan por tin tur e informacion necesario.

Pero tur esfuerso aki no ta solamente trabao di FADA, sino tambe di otro instancianan cu cada dia ta combati y preveni e uso y traficacion ilicito di droga. Den e conferencia di prensa tambe tabata presente Departamento di Aduana, representa pa Kathleen Faro, kende ta manager assistent y tambe Denice Kelly, ken ta fungi como hondengeleider di Aduana. Pa esaki, Kelly a expresa cu nan trabao ta enfoca principalmente riba arma, droga y placa trahando conhuntamente cu e seis cacho cu ta den e departamento.

Tambe el a señala cu nan ta traha hunto cu Cuerpo di Polis y Kustwacht. Igualmente nan ta controla pasaheronan cu ta drenta na aeropuerto y barconan crucero.

E situacion di traficacion di droga – manera el a sigura – ta continua keto bay, unda personanan ta purba di mil manera con pa saca of drenta cu substancianan ilicito. Kelly a sigura cu mayoria di casonan cu nan ta haya ta di personanan cu ta purba di biaha cu e substancianan.

Ademas tambe tabata presente e trahado social di Stichting Hunto, Michelle Lont ken a conta cu compara cu e parti di FADA enfoca riba prevencion, Stichting Hunto ta traha riba e parti curativo, unda nan tin dos cuido cu ta e parti ambulatorio y intermural.

Di e parti ambulatorio, Lont a comenta cu door di otro partnernan cu ta referi nan clientenan cerca nan, Stichting Hunto ta traha cu sector priva, gubernamental, area di hotel, scol of comunidad di Aruba mes.

Ora un cliente ta wordo referi na e Stichting aki nan ta haci diferente test di droga, di alcohol y di consumo pa asina identifica e grado di gravedad di e persona su adiccion. Nan ta traha cu psico-educacion, psychopedagoog, trahadonan social y psychiater cu na momento cu ta determina ki tipo di ayudo e persona tin mester, nan ta sigui, dependiendo di e cantidad di sesion cu e cliente mester.

Den e caso cu e parti ambulatorio no ta traha mas den e persona, nan ta bay na e parti di intermural, cu segun el a declara, ta manera un centro di rehabilitacion. Eynan nan ta conseha e cliente, mas no exigi pa e drenta den e area di rehabilitacion den base di tres, seis of nuebe luna, caminda nan ta haya psico-educacion pa asina nan por drenta back den comunidad; pa motibo cu algun di nan por lubida cierto necesidad basico con pa nan por integra nan mes.

Nan criterio di admision, segun Lont a menciona, ta cu ora un persona drenta den un centro di rehabilitacion e mester tin mas cu 18 aña y nan no ta permiti personanan di mas di 65 aña. Esaki debi cu muchanan bao 18 aña ta rekeri di cierto profesionalnan cu na e momentonan aki nan no tin disponibel. Tampoco nan ta acepta personanan cu tin problema di salud mental of fisico.

“Si nos ta pone un mucha menor di 18 aña conhuntamente aworaki cu un persona mayor di edad, e pensamento y e cuido ta totalmente diferente”, Lont a expresa.

Lont tambe a bisa cu World Organisation Drugs and Alcohol ta menciona cu na aña 2019 mas di mey miyon persona a fayece a causa di adiccion y nan ta premira cu pa 2030 e cifra aki ta bay aumenta hasta cu un 11%.

Como representante di Stichting Hunto el a sigura cu nan a ripara y a wak un aumento di clientenan unda cu na aña 2020 nan atende 960 cliente y na 2021 nan a atende mas cu 1.500 cliente, 4% di nan a pidi ayudo intermural y 96% a pidi un ayudo ambulatorio.

Ta p’esey cu nan ta para keto riba dia 26 di juni pa asina personanan por mira kico adiccion y droga por causa no solamente na e sernan humano sino tambe na comunidad henter.