Preocupacion ta keda cu maximalisacion ta nifica cambio di structura di tur salario den entidad semi publico

Ley norma Wever Croes tabata iniciativa di Aruba, pero a bira un condicion di Hulanda pa sosten di likides

E norma di salarionan top tabata un iniciativa di Gabinete Wever Croes I y no di Hulanda. Pero e asina yama LNT, Landsverordening Normering Topinkomens a bira un condicion si di Hulanda na 2020, pa asina Aruba por a haya sosten di likides. Y awor ta un di e cuater condicionnan cu Gobierno mester cumpli cune pa por duna 5 porciento di e recorte di 12.6 porciento na trahadonan di sector publico y semi publico.

Asina Prome Minister Evelyn Wever Croes a mustra durante tratamento di e LNT, kende a bisa cu for di prome cu e pandemia a ripara cu e situacion di salarionan a bay robes den curso di tempo, unda tin Director ta gana 50 pa 60 mil florin pa luna. Y e LNT ta pa coregi locual a bay robes. Sinembargo, Prome Minister a enfatisa cu e LNT no ta afecta resto di salarionan di esnan den e sector semi-publico, particularmente pasobra e ley ta pa un grupo chikito so. Esnan cu ta cay bao di e liña maximo, lo no mira cambio den salario.

Fraccion di AVP tabata hopi critico riba e ley, pasobra den concepto di mayoria den e fraccion, e ley lo pusha otro salarionan bay abao. Lider di fraccion di AVP, Mike Eman a bisa cu no mester papia di baha e salario top, sino hisa e salarionan mas abao pa un nivel aceptable. Pa logra esey mester tin vision.

Di su banda, Gerlien Croes a ilustra cu e LNT ta crea excepcion, pero no tin un clarificacion di kico ta e criterianan pa excepcion. Pasobra ta Prome Minister segun ley, por determina ken ta keda exclui for di e maximalisacion. En todo caso pa e Parlamentario, e ta inaceptable cu oficinanan di abogado ta exclui di e maximalisacion. E LNT ta esencial pa duna e 5 porciento, pero di otro banda ta aumenta gasto di goederen en diensten, cu a subi 40 miyon den e presupuesto multianual.

AVP ademas a señala cu a tuma un dia pa trata e ley, pero de facto ya Prome Minister a firma pa e ley cu Hulanda. “Hasta coalicion ta di acuerdo cu e gruponan afecta pa e ley, manera Schiphol Group, ATA y otronan, pero nan ta mara na man y pia. Pasobra ya Prome Minister a bay di acuerdo cu e norma Wever-Croes,” tabata locual Benny Sevinger a bisa. E Parlamentario a enfatisa cu si ta critica e salarionan di e Directornan, mester puntra ta ken a duna nan esey. Pasobra tur entidad semi publico tin representante di Gobierno den dje. Si papia di WEB y Elmar, e unico accionista ta Gobierno, cu ta nombra e miembronan di hunta di supervision cu a determina e salarionan, “midi a conforme normanan regional y internacional.”

Pa Lider di fraccion di MAS, Marisol Lopez Tromp, e problema mas grandi ta e falta di transparencia pa a yega na e leynan. El a señala cu Prome Minister a bisa cu tabatin abuso cu salario, pero e aspecto ey ta un secreto pa Parlamentarionan. Tampoco Parlamento a ricibi e resultado di e asina-yama quickscan pa señala cuanto hende ta gana riba e norma Wever Croes, “pero si ta spera di nos pa dicidi riba cortamento di nan salario.”

E Parlamentario ta bisa cu companianan semi publico mester ta independiente di Gobierno, segun ‘good corporate governance’ cu algun hende den hunta di supervision cu mester ta responsabel. “Ta e mesun Minister President, kende na 2017 a bin cu e meta pa introduci good corporate governance, pa tene tur esaki mas leu di politica, pa bin cu ley pa perfil di miembronan di e hunta. Pero nunca el a bin. Mi ta apoya e ‘good corporate governance.’” Pues pa Lopez Tromp, dificil pa spera di Parlamentarionan e ora pa dicidi riba algo cu no tin bista riba dje.

Di otro banda, Miguel Mansur di Accion21 si ta kere cu mester bin regulacion riba salarionan di Directornan di compania of entidadnan estatal. El a ilustra a base di dos ehempel con Directornan tabata gana te hasta 17 luna di salario, mas pago di gasto di coriente y biahenan cu famia. “E companianan ta traha den ambiente monopolistico. Pa mi, e ta bisto cu tabatin abuso y mester regula. Mi no kier bisa cu tur ta abusa. Laga esaki no-regula, ta produci contractnan cu no por hustifica. Mi sentido comun ta bisa cu mester bin regulacion.”

Pa Mansur ta inaceptabel cu no tur entidad a participa na e quickscan y a propone dos amienda den e ley. E prome ta riba e derecho cu Minister ta haya pa excepcion di e ley. Pues cu den casonan excepcional, e Minister por desvia di e norma. “Tur desviacion of exoneracion mester ta un autoridad di Parlamento y no di Minister.” E otro ta e exoneracion pa cumpli cu cierto condicion specifico, esta un tipo di ‘benchmark’ pa determina pa paga, manera productividad.

Pa Mansur, ni APFA ni Banco Central di Aruba por ta exonera di e ley, pasobra ambos ta maneha pa un ley y mester tin mecanismo pa controla e salarionan. “Na e momentonan aki mester wak con pa usa recurso limita pa yuda pais Aruba. E ta husto y ta necesario y mester mira con ta funciona miho. Pa interes di pueblo mester mira cu nan ta keda regula den forma husto. Nos ta aki pa crea un miho Aruba. No por generalisa, pero si tin caso di abuso y no tin ningun mecanismo awor aki pa usa fondonan limita mas eficiente posibel pa yuda comunidad.”

Parlamentario Darlaine Guedes Erasmus a mustra cu e ta kere den e norma, pasobra e ta mira e interes di esnan den sector publico y semi publico cu si ta afecta pa e recorte di 12.6 porciento, particularmente esnan cu ta gana poco. Pa e Parlamentario, e LNT ta esencial, si e ta duna trahadonan 5 porciento back.

Mester bisa si cu algo comun entre partidonan di coalicion y oposicion tabata cu e ley falta informacion y detaye. Hasta coalicion cu ta sostene e ley ta admiti cu a keda falta detayenan pa e LNT, particularmente riba e aspecto di structura di salario cu no ta pa e Directornan y tambe e peliger di perde profesionalnan. Ta pa tal motibo mes, fraccion di MEP a entrega amienda pa aumenta e salario maximo di 261 mil pa 329 mil, cu ta 130 porciento di e salario di Prome Minister sin su recorte. Esaki lo traduci na 24 mil florin pa luna. Tambe ta kere cu mester extende e periodo di transicion di dos pa cinco aña. E periodo aki lo permiti pa berdad studia un posibel efecto di trickle down cu ta un preocupacion di tur actor y tur parlamentario.

Hendrik Tevreden di fraccion di MEP a bisa si cu e ta lamenta cu oposicion no por duna contribucion pa yuda Pais Aruba, cu excepcion di Sr. Mansur, aunke cu e no ta di acuerdo cu e amiendanan sugeri pa e lider di Accion 21.

Di otro banda, Raad van Advies, despues di e nader rapport cu ta e reaccion di Gobierno riba su conseho inicial a puntra si pa un estudio riba e efecto ‘trickle down.’ Raad van Advies a puntra si tin un estudio cu a haci pa mira si e norma Wever Croes, cu ta maximalisa e salario di e Director, lo afecta henter e structura di salario di otro trahadonan. Particularmente pasobra e splicacion di e ley ta papia cu eventualmente e ley lo mester produci un revision di e structuranan di salario di e entidadnan semi publico. Pa fraccion di MEP, nan amienda di extende e periodo di transicion pa permiti un estudio asina.

E ley ta exonera no solamente bufetenan di abogado di e norma Wever Croes, pero tambe personal di Ministerio Publico, tanto personal cu ta bin di Hulanda y Aruba, mescos cu dokternan cu ta inclui psikiatranan. Esaki a bin dilanti ya cu Fundacion Respaldo ta cay bao e norma.