Diadomingo anochi dia 26 juli 2022 nos prome minister a hiba un discurso nacional riba e ley di topinkomen di empleadonan di companianan estatal. No tabata tin un motibo real pa un discurso nacional. E mihor motibo pa un discurso nacional lo tabata cu gobierno ta bay cas y cu aki 3 luna lo tin eleccion. Lo ta un berdadero motibo pa celebracion.

E gobierno ta haciendo su salto mortal paso si mira e reaccion riba e discurso nacional por a mira casi 100% di e comentario ta contra di e gobierno aki. Por bisa 100% di no ta kere of no tin confiansa mas den e gobierno. Mas nan keda na poder mas daño nan ta haci na nan mes, pero vooral na Aruba. E imperio aki ta cayendo den otro y nos no sa cu ki cara nan lo bay cana den pueblo. Eleccion pasa caba nan a manda hende nan dilanti pa mira ken ta habri nan porta pa ricibi nan bishita cu yen di promesanan falso. Tur cos cu nan a priminti nan a haci lo contrario. Nos di partido Curpa a avisa pueblo di e promesanan falso aki, pero awe nos ta consciente cu pueblo su wowo a habri paso pueblo ta pasando hopi duro.

E ley LNT ta bay linea recto contra di partido mep mes. Mayoria empresanan a bira N.V bao di gobierno cu signatura di partido mep. Partido mep tin custumber di kita director di empresanan y pone nan hendenan. Nos por a lesa den rapport di CAFT cu gastonan y contribucion di pais na companianan di gobierno a aumenta innecesariamente. Esaki ta un otro motibo pakico mester a kita directornan pa asina nan por haya caminda liber pa haci y deshaci. Un mentalidad di un partido comunista. E manera di proceder aki ta hinca nos empresanan estatal den problema financiero sin tin mester. Aruba sigur no ta moviendo den e direccion di progreso paso unda cu e gobierno aki pone su man ta daña so e ta daña.

Nos salubridad tambe ta bay den un direccion robes. Hopi di esnan cu ta traha den cuido ta trahando den un stress cual sigur no ta na bienestar di esnan cu tin cu wordo cuida. Nos por a mira cu dokternan a bandona nos isla caba pa un mihor trabao. Awor kier duna trahadornan di hospital un pakete pa retira. Segun nos por a compronde ya caba e trahadornan ta traha bao di un stress y den un ambiente hostil. Esaki bo por mir’e como un maltrato di parti di doño di trabao. Un ambiente na trabao mester ta bon pa asina por tin produccion. Si ambiente ta malo solamente mal trabao lo bo haya na final. Pueblo ta paga un capital na seguro di AZV y a cambio mester por haya un bon cuido.

Riba dje nos ta mira cu nada no ta wordo haci pa esnan cu problema di salud mental. Mas cu un aña a pasa caba y nos ta mira cu gobierno en bes di yuda ta haci e situacion pio. Fuera di e crisis social no tin un crisis den e salud mental y esaki ta trece henter e siguridad di nos pueblo den peliger. Hopi hende ta spera riba ayudo y si no actua awor e problema lo bay for di control. Nos ta perde un grupo grandi pa negligencia di parti di gobierno. Esaki ta hopi tristo.

Gobierno no por culpa ningun hende. Nan mester saca e balki for di nan wowo y mira e realidad. Minister no kier duna cuenta na Parlamento y asina nos por sigui menciona tur scandalnan. No tin temor di Dios y ta sigui haci maldad. Ora e copa di maldad yena locual cu ta bin su tras ta huicio. Nan por scapa for di e huicio terenal pero for di esun divino nan lo no scapa. Nos di partido Curpa ta manda un mensahe pa esnan cu ta den Parlamento y cu ta bisa cu nan ta Cristian. Esaki ta e momento pa hala for di maldad y brasa e berdad pa asina bo no forma parti di maldad. Tan ten cu tin rosea por pidi pordon y hacie cambio. Esaki ta e momento pa nos para banda di pueblo y bisa ta basta.