Prome Minister Evelyn Wever-Croes durante conferencianan di prensa a enfoca riba e gastonan di salario di empleadonan di Gobierno. E plan di rebaho di e gastonan aki ta di 2018 y e yama Beleidsplan Verlaging Personeelskosten, BVP. E ta den ehecucion desde 2018. Y ta e plan aki a percura cu cada aña Gobierno a baha e gastonan di personal.
Prome Minister a duna di conoce cu e unico cos cu Gobierno no a implementa ta stop periodieke verhogingen, pasobra mester haci esey den dialogo cu sindicato y Gobierno no a haya e momento oportuno ainda. Ademas, cu e aumento di costo di bida debi na e guera di Ucrania, tampoco ta prudente pa stop e periodieknan awor. “Mas importante ta cu nos a baha gasto di personal tur aña y pues nos ta den cumplimento cu e plan apesar cu nos no a implementa e plan full. Implementacion parcial di e plan mes a pone cu no a cumpli, manera por mira riba e grafico adhunto,” Wever-Croes a declara, segun un comunicado di prensa.
“Mi ta scucha politiconan ta cuestiona cu tin un plan di 2018 cu no ta wordo ehecuta, siendo cu regularmente mi ta informa Parlamento di ehecucion di e plan. Cada aña den e mi cuentanan anual di mi Ministerio y cada kwartaal den e Uitvoerings Rapportage cu Minister di Finanzas ta manda pa Parlamento. Si e politiconan tuma djis tiki tempo pa studia e documentonan aki, nan por evita di papia di cosnan robes asina.
Nos enfasis ta dirigi riba mehora calidad di bida di tur hende. Den e caso aki, empleadonan publico no merece e trato aki di politiconan di oposicion. Nos a baha e gastonan di personal y nos lo sigui traha pa sigui baha e gastonan aki”, Prome Minister Evelyn Wever-Croes a enfatisa.
