(NTN24) – Por lo menos cuatro persona a muri y mas di 300 a sufri di heridanan pa via di e caida di varios tribuna di un plasa di toro cu a tuma luga durante un corida diadomingo ultimo na municipio El Espinal, na sur di Colombia.
Segun agencia AFP, hospitalnan di e region a atende un total di 322 persona cu lesion, cuatro di nan “ta permanece den cuido intensivo”, manera Martha Palacios, secretaria di salud di departamento di Tolima, na unda El Espinal ta ubica a bisa.
E tribunanan di e plasa cu tabata yen di personanan a cay durante un “corraleja” un tipo di fiesta popular den cual e publico ta baha te e veld pa enfrenta cu toronan chikito.
“Nos plasa di toro ta conforma pa 44 tribuna di e cual 8 a cay, cada un cu 100 persona”, alcalde di El Espinal Juan Carlos Tamayo a señala.
Un bisiña cu a graba e momento teribel cu su drone a bisa cu “mi a mira hende paden di tur e structura cu a cay cu tabata purba di sali, hopi dificil”.
Tamayo a sigura cu alcaldia a firma un “contract” cu e organisadonan di e evento aki.
“Nos lo pidi un investigacion di e hechonan, solidaridad cu e famianan”, e presidente Ivan Duque a skirbi riba su Twitter.
Gobernador di Tolima, Ricardo Orozco,a anticipa cu lo pidi e suspension di tur clase di fiesta cu ta yama “corraleja” unda el a expresa cu “nan ta atenta contra bida” y “ta fomenta maltrato animal”.
Un dia prome cu e hecho aki varios persona a sufri di accidentenan cu toronan den “corraleja” di El Espinal, un pueblo di casi 78.000 habitante ubica na 150 kilometer di Bogota.
