Mervine Kock ta un hende muhe cu a pesar di ta un persona di edad halto, ta demostra cu cualkier cos ta posibel si tin dedicacion y disciplina pa logra cualkier meta. Despues di mas di 35 aña Mervine ta subi un scenario back pa competi den un competencia di fisico. Den un entrevista e ta conta di su preparacion pa e competencia aki y con e ta compara cu su preparacion 35 aña pasa.

E ta conta cu ultimo biaha cu el a subi stage pa competi tabata na 1985 na Europa. El a stop di competi pa su estudio, cual tabata hopi importante p’e, y el a stop pasobra e ta tuma hopi tempo y dos e ta un deporte hopi costoso.

Mervine ta splica cu hopi hende no sa con hopi placa ta bay den e deporte aki, vooral den loke ta cuminda y suplemento. “Esey ta e dos nan cu ta mas importante. Hopi hende ta kere e ta e trainig, pero no ta e training ta e cuminda ta haci tur e trabao. Bo mester come on point, bo mester comer precies locual nan ta bisa bo.”

Pero el a remarca cu tin un diferencia grandi entre awo y tempo cu el e a competi mas cu 35 aña pasa. E tempo ey, el a comenta, ciencia den proteina cu suplemento no tabata mesun leu cu aworaki y e dieet tabata hopi diferente cu awo.

“Awendia nos ta come hopi mas berdura, pero no tur sorto di berdura tampoco. Te ainda ora mi tin mi low carb diet mi ta come berdura y pa high carb mi ta come arroz blanco combina cu batata dushi, pisca blanco, pisca cora y cu galiña. Nos ta come bastante. Nos ta come cada cuater ora, depende con serca bo ta yega di e competencia”, Mervine a señala.

Un di e metanan di Mervine ta pa tin un figura netjes, un figura fit, pero door di su edad, hopi biaha nan no sa con pa guia. E ta splica cu constantemente nan ta busca un balance con pa mi keda flaco (lean) bunita y flaco cu cuero ta colga. E ta consciente cu e por ta lean te na un cierto nivel y no lo bira seco seco mas.

“Mi ta wak mi ta lean bon, pero e no ta bay manera antes mas. E ta bay hopi mas poco poco, mester tin hopi mas pasenshi. Bo mester ta disciplina y bo mester tin bo compromiso pasobra si no, bo no ta yega. Den e deporte aki loke ta hacie duro ta e dieet. E dieet ta esun di mas duro cu tin na mundo. Y p’esey hopi hende no por want’e”, el a comenta.

Otro meta cu e tin ta pa mustra mundo eyfo, vooral e hende muhenan cu ora nan caba cu menopauze y door di nan edad no ta haci mucho mas y asina ta bira bieu mas lihe. Mervine ta enfatisa cu tur hende ta bira bieu, esey ta e proceso di bida, pero e hende muhe mester dicidi con nan kier bira bieu, “esey ta un decision cu bo ta haci”.

Pa loke ta su preparacion pa e competencia den luna di juli, Mervine ta conta cu e preparacion ta bayendo hopi bon. Aunke aworaki e ta un poco for di ritmo door cu e dianan cu e no por come carbohidrato e curpa ta bira hopi zwak, e no tin energia. Pero esey ta parti di e proceso, el a señala. “Nos mester keda push mescos cu nos ta train tur dia”.

El a remarca cu pa tur hende, tur atleta e proceso di training, alimentacion y preparacion ta diferente y ta depende di cada hende individual. “Nos tur como atleta tin un meal planning diferente y un plan di training diferente. E ta bay segun con bo desaroyo ta bayendo y segun bo ta pisa bo coach ta bisa bo kico ta cambia den bo plan. Dus cada biaha e ta algo otro”, el a enfatisa.

Den su caso, el a splica cu e tin un dieet hopi specifico cu cantidad specifico di cada alimento cu e mag di come. Por ehempel e mag di come 6oz di batata dushi, 3.6oz di galiña y pisca por ta ta bira 4oz. E ta varia, segun su desaroyo y con cerca e ta yegando di e dia di competencia.

Mervine tin mas cu seis luna preparando pa e competencia aki pasobra en realidad e mester a competi na december, pero door cu el a bira malo, esey no a bay door. “Pero bo ta sigui. Y si bo kier haci e deporte aki bon, bo ta wanta bo meal planning hopi largo”, el a agrega.

E parti di cardio tambe ta hopi importante, el a subraya. El a sigui splica cu aworaki e ta haci cardio pa baha vet y e ta haci cardio dos biaha pa dia, segun cu e competencia ta yegando. Mainta e ta core y e mester a baha su tempo di coremento te na 25 minuut pasobra despues di 25 minuut e cardio ta cuminsa come di e musculonan, y anochi e ta core su bicicleta pa 20-30 minuut pa kima e resto di vet.

Mervine su mensahe ta cu hende muhe na Aruba mester siña cuida nan mes mas. “Si ami por, hopi por. No mester ta manera ami, pero nan mester haci algo pa nan mes, nan mester biba pa nan mes. Esey ta hopi importante. Nos tur ta bira bieu, pero con bo ta bira bieu, cu hopi dolor of bieu cu ta fit ainda, eseynan ta decision cu bo ta haci den bo bida, vooral cuminda. Cuminda ta e problema di hopi.”

El a comenta tambe cu e ta bay atende un curso pa e por duna training personal pa yuda e hende muhe alimenta nan mes y asina nan por pasa door di e menopauze. Su enfoke lo ta pa yuda train e hende muhe di mas edad pa siña nan con nan ta come, con nan ta wanta nan mes. “Ami tin e experiencia, ami a pasa den tur e procesonan aki”, el a expresa.

Rene Wild, coach di Mervine, ta comenta cu Mervine ta un ehempel pa tur y pa hopi hende muhe na mundo. E ta un muhe di 65 aña cu ta train, ta sinti y tin e forsa y energia mescos cu un hende muhe di 30 y algo aña. “Eynan bo ta wak cu edad no ta hunga un rol, e ta depende di con fuerte bo mente ta, con disciplina bo ta y tambe con hopi bo kier e.”, el a bisa.

“Mervine na su 65 aña ta gosando su bida, tin e energia pa haci hopi cos. E por traha, e por studia, e ta drumi bon, e ta come bon y eynan bo ta wak e importancia di salud combina cu ehercicio”, el a agrega.

Wild ta señala cu Mervine su preparacion ta bayendo hopi bon. Aunke e ta un muhe di 65 aña y no un proceso facil, pero e desaroyo ta papia pa su mes. “Mi ta bisa tur hende muhe eyfo, si Mervine por abo tambe por, bo djis mester kier e”, el a finalisa.