“Mi ta asina contento cu mi trabou como job coach, e tension pa logra balans entre e necesidad di un dunado di trabou y e interes di un persona cu limitacion ta duna mi hopi energia,” ta con Lionel Rumnit (55) di Trampolin pa Trabou ta mira su responsabilidad.

Y den e dianan aki, Rumnit ta sinti cu tin un coriente den aire pa reconoce cu personanan cu limitacion, por duna un contribucion grandi na sector laboral. En todo caso, e interes ta bin di uitzendbureau’s relativamente chikito cu mescos cu Flexo a reconoce un mercado yamativo. Esta cu un persona cu limitacion kizas ta net e trahado cu un compania mester mirando e deseo grandi di ta mas independiente posibel. “Mi tin hopi peticion, tin compania cu a invita mi pa bay papia cu nan, na Cas di Cultura ta bay habri un café nobo y a acerca mi pa mira si clientenan di Trampolin por haya trabou. Tur eseynan ta combersacionnan interesante.”

Flexo tabata e prome uitzendbureau cu a mira e potencial di clientenan cu limitacion pa drenta mercado laboral. Fuera di sostene e fundacion, tabata trata di yuda e clientenan haya trabou. “E cooperacion tabata bay con den sentido cu nan tabata duna mi clientenan un oportunidad, y nan ta brinda pa un chance na diferente doño di trabou cu nan tin den nan portfolio, ademas di un donacion anual.” Rumnit a bisa cu e ta gusta traha cu uitzendbureau’s pasobra “nan tin mas tempo, e ta mas facil pa nan acerca e dunadonan di trabou. Pero locual mi a ripara ta cu e agencianan grandi ya ta cubri. Nan ta fuerte, pero ta e companianan chikito mester di hende y awor nan ta ofrece pa busca trabou pa mi clientenan.”

Di otro banda, hopi hende ta kere cu Trampolin pa Trabou tambe ta un tipo di ‘uitzendbureau’ y e pensamento ey ta cuadra un poco tambe, segun Lionel Rumnit. “Pero e ta na un escala hopi chikito. Nos ta un fundacion chikito, cu un administracion chikito cu no por maneha tur detaye di personal. Pero nos a logra pone hende na trabou via Trampolin. Pero locual nos ta haci, ta proteha nos clientenan.”

Mayoria tin un asistencia di Gobierno (handicaptenuitkering) cu ta nifica cu nan tin un entrada chikito sigura y si mester traha mas cu 20 ora pa siman, nan lo haya un salario riba 500 florin cu ta nifica cu nan lo perde e asistencia ey. “Asina nan ta haya e sentido cu nan ta contribui, nan ta gana algo extra, pero e 500 tambe ta e nivel pa cuminza paga belasting. Si keda bou di dje, no tin problema.” E meta di un ehercicio asina ta pa hisa e calidad di bida di e persona cu di otro forma ta na cas. “E construccion via Trampolin ta pa duna e grupo aki un tipo di siguridad. Pues, cu si e funcionamento den sector laboral no logra, nan semper lo por bin back.” Di otro banda, Rumnit a ripara un desaroyo den sentido cu e prome grupo tabata mas insigur, y cu tempo, clientenan di Trampolin ta hayando mas siguridad den nan mes pa tuma un trabou. “E portanan ta habri y mayoria di nan ta cla pa sali. Y esaki particularmente despues cu na Trampolin a descubri e talentonan cu cada uno tin.”

E experiencia personal di Rumnit

Lionel Rumnit sa con e ta pa biba cu un persona cu limitacion. Su ruman tabata sordo. Pero nunca el a pensa di traha den e ramo aki. El a bay MTS na Aruba y despues a drenta un ciclo di trabou na Utrechtse Werkbedrijven, un compania cu ta similar na Trampolin pero na un escala mas grandi. Y eynan Rumnit a haya su rol como ‘job coach.’ E no ta un trahado social, y kizas pa e motibo ey, su enfoca no ta unicamente pa percura pa cuida personanan cu limitacion, sino pa busca e forma practico pa tanto e cliente como e dunado di trabou por ta contento cu otro. Y su trabou por duna hopi alegria tin biaha, pero tambe frustracion. E alegria grandi ta ora cu clientenan di Trampolin logra trabounan fiho, pero tambe frustracion ora cu pa diferente motibo, nan no por haya un espacio. Y Lionel Rumnit no ta culpa ningun hende. Pasobra e realidad ta cu e proceso no ta facil. Aruba ainda no tin un sistema cu ta recompensa of hasta motiva companianan pa tuma personanan cu limitacion na trabou. Y e areglonan aki, cu si tin na Hulanda por ehempel ta esencial. Lionel Rumnit no solamente ta mira e balor pa su clientenan por traha, e ta compronde tambe e reto di un dunado di trabou, un empresario cu mester di hende cu por yuda e compania bay dilanti. Den otro palabra, no ta cuestion di djis haya un cupo di trabou, pero percura cu tanto e cliente di Trampolin ta protegi y sigur den su sapato, cu e garantianan cu un dunado di trabou por duna. Di otro banda pa e dunado di trabou mester por haya e motivacion pa medio di ley, cu ta stimula esaki. Particularmente pasobra e ta rekeri tempo pa percura cu un persona cu limitacion por haya e ritmo adecuado pa funciona. “Ami a traha na Hulanda y mi a mira cuanto hende cu limitacion tin trabou. Pero na Aruba no tin incentivo y no tin motivacion. Hopi biaha un persona cu limitacion ta haya su asistencia financiero y na mesun momento e mensahe pa nan no bay traha, pasobra nan ta perde e bijstand.” Den otro palabra, ta un sistema cu ta mantene su mes. Aki ta unda lo mester cambia leynan pa e grupo aki, cu ta hopi grandi. Aunke no tin cifranan ainda conoci di Censo 2020, e cifra di 2010 tabata papia di 7 mil hende cu limitacion cu ta depende di bijstand. “Si logra cu un tercera parti di e grupo aki haya trabou, Gobierno lo por spaar como 3 a 4 miyon florin pa aña.” Den otro palabra, e ta algo di sentido comun pa yega na leynan pa incentiva dunadonan di trabou emplea trahadonan cu limitacion y percura cu tin e condicionnan pa siguridad di tur.

Lionel Rumnit cu tin su mesun famia, a logra e balans di trabou y cas. E por pone e preocupacionnan di trabou un banda pa asina por ta presente na cas y ta fresco tur dia pa traha cu hendenan cu mester por confi’e. Y kizas e retonan ta grandi, pero locual sigur ta motiva Lionel Rumnit ta e logronan di hendenan manera Lisa Tromp cu a pesar di ta ciego, awor ta trahando como un coki cu Sizzlers, na Gloria. Algo cu kizas pa hopi dunado di trabou ta dificil pa imagina, pero unicamente dor di duna oportunidad na personanan cu kier demostra cu nan ta kier ta autosuficiente a pesar di retonan, ta yega na e balans cu pa Lionel Rumnit ta asina esencial. Pasobra berdad a tuma un dunado di trabou tempo pa descubri kico mester adapta pa un persona ciego funciona como coki, pero alabes a haya un trahado cu no kier djis saca su man y cobra, sino realmente mustra cu e por haci su trabou.

“Eseynan ta experiencianan cu ta duna mi hopi animo pa sigui cu mi mesun trabou,” ta locual Rumnit a bisa Bon Dia Aruba.