InselAir ta anuncia cu nan ta corta den nan vuelonan pa asina facilita e rutanan principal entre e islanan Aruba, Corsou y Boneiro y St. Maarten.
Motibo principal ta cu te ainda autoridad di aviacion civil di Aruba no a duna InselAir e permiso pa bula cu 6 avion. Locual Insel mes a indica ta cu nan ta haya straña cu e autoridad te ainda no a duna e luz berde pa entre otro e MD-80 nan (avionnan mas grandi) por reanuda servicio. Insel a cambia di director, esta cu awor Gilles Filiatreault a asumi e posicion for di Albert Kluyver. E director nobo a priminti di drecha e compania mas pronto posibel. E prome medidanan ta cu el a scrap e vuelonan pa Barranquilla y pa San Juan. Ademas el a baha e cantidad di vuelonan riba e ruta Aruba – Santo Domingo – St. Maarten di dos pa un biaha pa siman. E compania tambe ta uzando avionnan di otro companianan manera Swift Air y Dominican Wings pa asina por garantisa vuelonan.
Cu e medidanan aki e compania kier drecha e servicio di e vuelonan y asina logra cu nan ta sali na ora. E director ta bisa cu pasaheronan cu a cumpra un ticket pa e destinacionnan cu a keda cancela, mester tuma contacto cu nan. E compania ta ofrece nan pa haya nan placa bek completo. “Nos ta lamenta e echo cu nos a decepciona nos pasaheronan. Sinembargo nos ta garantisa cu nos lo actua den un forma adecua. Nos ta tumando decisionnan cu lo drecha nos operacion mas pronto posibel y asina duna nos pasaheronan y tambe trahadonan locual nan ta merece: un aerolinea confiabel”, asina director Filiatreault ta expresa den un relato di InselAir pa prensa.
