Aruba, Corsou, Sint Maarten y Hulanda a traha hopi intensivo hunto pa enfrenta e pandemia di Corona na e mihor manera posibel den Caribe. E experencia den e temporada di crisis a mustra nos bon cla con importante e ta pa tin un bon cooperacion pa mehora e atencion medico pa e residentenan di e parti di Reino Caribense. E cuater paisnan e siman aki na Aruba a haci palabracionnan pa tuma pasonan nobo den e proximo periodo.

Algun di e palabracionnan cu a wordo haci ta riba e mehoracion di preparacion di un pandemia den e region di Caribe, e cooperacion cu tin den situacion di crisis manera por ehempel horcan, maneho di prevencion, manera combati e problematica di sobre peso y tambe un mihor cooperacion hospitalario pa e calidad di cuido por wordo mehora y por ehempel e personal di enfermería por ricibi nan entrenamento conhuntamente.

Representantenan di ministerio di Salud di Aruba, Corsou, Sint Maarten y Hulanda y representantenan den e veld di salud a reuni na Aruba den e siman di 20 di juni pa e di cuater reunion di e cuater paisnan. E paisnan a constata cu tin similaridad y diferencianan den e sistema di salud y tin mas posibilidad pa traha hunto pa di e manera aki fortalese e atencion medico den e parti di Reino Caribeño.

A papia di e siguiente topiconan: Implementacion di e “International Heath Regulations”, preparacion di pandemia, Cooperacion den crisis y calamidad, legislacion den salud mental, prevencion, structura di calidad y acreditacion pa profesionalnan den cuido y institucion, entrenamento y educacion den cuido y e cooperacion entre e hospitalnan den forma di Dutch Caribbean Hospital Alliance (DCHA).

Cooperacionnan mas intensivo

Varios accionnan a keda formula durante e vierlanden overleg y diferente grupo di trabou lo wordo institui den e periodo nos dilanti pa duna contenido na e palabracionnan cu a keda haci. E palabracionnan cu a keda haci ta: ta bay inverti den un sistema di vigilancia pa monitoria malesanan contagioso y malesanan no transmisibel (NCD’s), pa traha hunto riba e acceso pa haya medicamento y material medico den preparacion pa un pandemia of calamidad den regio, pa intercambia conocemento riba intervencionnan cu ta promove salud, pa establece un structura/sistema y pa crea un trayecto pa studiantenan di Caribe por completa un specialisacion medico den henter Reino Hulandes.

Den e context di e cooperacion entre hospitalnan di DCHA, e lo ta posibel pa tin cooperacion mas intensivo den otro areanan cu e miras pa promove eficiencia, calidad y sostenibilidad di cuido den regio. Topiconan cu tin cooperacion lo continua y expandi inclui e compranan den conhunto, entrenamentonan, preparacion di pandemia y un organisacion eficiente di e cuido hospitalario den e islanan.

Entusiasmo pa futuro

Minister Oduber (Aruba), Minister Pietersz-Janga (Corsou), Minister Ottley (Sint Maarten) y StaatsSecretaris Van Ooijen (Hulanda) ta confidente, motiva y entusiasma pa cu e colaboracion entre e paisnan den Reino. E colaboracion aki lo garantisa cu Aruba y tur e paisnan den reino por ofrece nan comunidad un systema di salud publico y cuido medico mas sostenibel y di mihor calidad.