DIMAS: “Nos tin un retraso y nos ta trahando riba esey”

Durante un conferencia di prensa e siman aki vocero di DIMAS, Marilyn Wout, a brinda informacion na comunidad di Aruba tocante peticionnan pa carta di re-entrada, peticionnan incompleto y a toca e tema di retrasonan cu tin cu peticionnan di permiso actualmente.

Temporada di vakantie ta den yegando y hopi hende ta bay biaha, pero tambe tin hopi permisonan cu mester wordo renoba. Pa e motibo aki, Wout ta splica cu DIMAS ta pidi tur persona cu ta biahando cu no a entrega un peticion di renobacion di permiso pa haci esaki na tempo prome cu biaha.

Den caso cu a entrega un peticion di renobacion y ainda no a ricibi un respuesta for di DIMAS, por haci peticion pa un carta di re-entrada.

Wout a splica cu pa haci peticion pa un carta di re-entrada, e solicitante mester download e formulario “bewijs van terugkeer” for di e website di Dimas, yena, firma esaki y hib’e na un oficina di MFA caminda mester paga e suma di Awg. 40. Na momento cu e solicitante tin e comprobante aki y a scan tur documento ta upload esakinan via e servicio di e-helpdesk di e website di Dimas y den algun dia e carta di re-entrada lo wordo procesa.

Personanan cu por aplica pa un carta di re-entrada ta clientenan cu a haci nan ultimo peticion di permiso, di prolongacion of di cambio di garante prome cu nan ultimo permiso a vence, personanan cu a entrega un prolongacion of cambio di garante y a ricibi un negacion, pero e a entrega un apelacion y ta wardando riba un contesta di Dimas. Tambe personanan cu a entrega nan renobacion di permiso of un cambio di garante laat, pero nan por prueba cu durante e ultimo cinco añanan nan tabatin un permiso valido y nan ta residente na Aruba inscribi na Censo.

Wout a remarca cu un carta di re-entrada por wordo usa solamente un biaha. Si un persona ta biaha mas cu un biaha y mester un carta di re-entrada, lo mester haci un peticion di nobo pa cada biahe cu e mester haci. E carta di re-entrada ta valido pa un periodo maximo di cuater luna y na momento cu un persona haci e peticion pa e carta e mester indica pa cuanto tempo e lo ta biahando y Dimas lo tene cuenta cu esaki na momento di procesa e carta di re-entrada.

No tur persona por haci uso di un carta di re-entrada. Personanan cu nos por haci e peticion aki ta personanan cu nan permiso a caduca y no a entrega un peticion di renobacion of cambio di garante. Personanan cu no ta inscribi ainda na Censo y personanan cu apenas aworaki ta haci peticion di un prome permiso.

Wout a tuma e oportunidad pa enfatisa y recorda tur nan clientenan cu na momento di haci cualkier tipo di peticion pa entrega tur documento necesario segun e rekisitonan pa di e forma aki evita cualkier inconveniente y cualkier retraso den e proceso di e permiso.

Na mesun momento el a remarca cu DIMAS ta encontra cu hopi caso di personanan cu ta entrega peticionnan incompleto.

“Hopi caso nos tin cu ta bin dilanti na unda personanan ta entrega peticionnan cu falta algo. Den caso cu falta un documento, nos ta manda notificacion via e-mail y ta pidi pa entrega e documento faltante via e-mail mes tambe y evita di bin personalmente na DIMAS na e servicio di helpdesk pa entrega cualkier documento cu por a falta”, Wout a indica.

Ta conoci cu durante e pandemia DIMAS tabatin un retraso den loke ta trata procesamento di permisonan y segun Wout ta splica nan a logra soluciona esaki, pero den e ultimo lunanan nan a encontra un otro retraso pa loke ta peticionnan di permiso.

“Nos tin un retraso, pero retraso di cuanto siman mi no por indica pasobra mi no tin e cifranan ey, pero ta klop cu nos tin un retraso y nos ta trahando riba esey. Den weekend nos tin tambe empleadonan cu ta bin oficina pa traha y purba haal esaki in y nos ta trahando di diferente forma pa asina por mehora esaki”, Wout a informa.

Tin casonan cu a presenta na unda un cliente lo por a ricibi dos orden di pago pa su permiso. Wout a splica cu tin biaha e sistema por tin algun fayo y en berdad un solicitante por ricibi, pa eror, dos orden di pago. Den caso asina ta pidi e cliente pa por fabor na momento cu ricibi dos orden di pago no paga tur dos, paga uno so y notifica DIMAS cu a ricibi dos orden di pago pa asina den sistema por elimina un di e dos orden di pago.

Den caso cu e cliente a paga dos biaha caba, e cliente por pidi un restitucion. E procedura pa pidi un restitucion ta como lo siguiente; e cliente ta bay riba e website di DIMAS, e parti di e-helpdesk, yena e formulario di restitucion na unda e mester indica cu el a paga dos biaha. DIMAS ta ricibi e formulario aki y despues ta manda e cliente un carta di restitucion cu cual e cliente mester bay Directie Financien pa reclama e placa cu el a paga di mas.

Tin casonan tambe ta presenta na unda cu e cliente no ta ricibi e orden di pago. Den casonan asina loke e persona por haci ta entrega un keho of pasa personalmente na e helpdesk na oficina di DIAMS y asina ta print e orden di pago pa e persona.

“E por sucede cu e no ta yega pa via di e sistema, pero e por sucede tambe cu e ta wordo manda y e ta bay den un spam folder, e e-mail adres no ta corecto of e persona no ta pendiente di e-mail”, el a agrega

Wout a aclara tambe cu personanan cu ta haci peticion pa permiso di empleado domestico no mester pasa na DPL, DIMAS mes ta encarga di procesa e permisonan aki.

Por ultimo, Wout a remarca cu ta suplica na clientenan di DIMAS pa desde aworaki entrega tur peticion di permiso di forma digital y asisti na helpdesk na oficina solamente ora cu tin pregunta, duda of keho.