(AP) – Amazon su Alexa pronto lo por replica e bos di familiarnan, hasta si nan no ta na bida mas.
E capacidad aki, revela na Amazon su Re:Mars Conference na Las Vegas, ta den desaroyo y lo permiti e assistent virtual imita e bos di un persona specifico basa riba menos di un minuut di grabacion.
Rohit Prasad, vice presidente y cientifico lider pa Alexa, a bisa na e evento riba diaranson cu e deseo tras di e funcion aki ta di crea un confiansa mas grandi entre e interaccion di e usuarionan cu Alexa pa medio di pone “mas atributonan humano di empatia y afecto.”
“E atributonan aki a bira hopi mas importante durante e pandemia ora cu hopi di nos a perde e personanan cu mas nos ta stima,’ Prasad a bisa. “mientras cu Inteligencia Artificial no por elimina e dolor di e perdida, e por definitivamente haci cu e memorianan dura.”
Den un video di Amazon na e evento, e mucha hoben ta puntra “Alexa, wela por caba di lesa Wizard of Oz pami?” Alexa despues ta ricibi e peticion y ta cambia na otro bos, imitando e mucha su wela. E assistent virtual aki despues ta continua ta lesa e buki den e mesun bos aki.
Pa crea e funcion, Prasad a bisa e compania mester a siña con pa haci un “bos di calidad halto” cu un grabacion cortico, na luga di grabacionnan di oranan largo den un studio. Amazon no a provee mas detaye tocante e funcion, cual definitivamente lo trece dilanti preocupacionnan pa cu privacidad y preguntanan etico tocante consentimento.
Amazon su movida ta bini despues cu Microsoft anteriormente e siman aki a bisa cu nan lo disminui e funcionnan cu nan ta ofrece di bos sintetico y lo implementa guianan mas estricto pa “sigura e participacion activo di e persona cu ta papiando” ken su bos ta keda recrea. Microsoft a bisa diamars cu nan lo limita cua clientenan por usa e servicio, mientras tambe resalta e usonan aceptabel manera e personahe interactivo di Bugs Bunny na tiendanan di AT&T.
“E tecnologia aki tin un potencial hopi emocionante den educacion, accesibilidad y entretenimento, sinembargo, e ta facil pa premira con esaki lo por ser usa inapropiadamente pa impersona personanan y estafa esun cu ta tende,” Natasha Crampton, ken ta hefe di Microsoft su division di etica di Inteligencia Artificial a expresa.
