Aña escolar aki ya casi ta caba, scol poco poco ta bira mas facil den dianan aki y tempo pa hunga ta aumenta, specialmente den e prome etapanan educativo, algo cu tambe por ripara den cas cu mayornan.

Vakantie ta den porta y muchanan lo disfruta di mas tempo pa hunga den proximo simannan. Expertonan di desaroyo infantil ta indica cu hungamento ta un parti esencial den e desaroyo di personanan, specialmente den e etapanan infantil y hubenil.

UNICEF ta señala cu “weganan mester di tempo y espacio: un tempo substancial pa dia y un espacio sigur unda por hunga.” Si e condicionnan aki ta limita pa diferente motibo, sea violencia, pobresa of inhusticia, “e derecho aki tambe ta wordo afecta”.

Aunke hungamento ta habri caminda pa situacionnan menos faborabel, ta straño pa wak dos mucha na un luga ta warda pa algo, sin cu nan cuminsa papia y hunga cu otro.

Hungamento ta un di e miho metodologia di aprendisahe pa cualkier edad y tambe un di e miho forma di enfrenta un recuperacion psicosocial despues di un trauma.

Mas cu un simpel oportunidad pa diversion, hungamento ta algo serio pa loke ta trata salud y desaroyo di un mucha. Tin hopi manera di hunga cu ta fortalece e cerebro, curpa y bida di e mucha di manera hopi importante.

Hungamento su funcion pediatrico ta pa mehora e desaroyo di e muchanan chikito, igualmente ora nan ta hunga cu nan mayornan y cu otro muchanan ta fundamental pa forma miho nan cerebro, curpa y vinculonan social, tur esaki ta hopi importante den e mundo actual.

Aunke tin hopi beneficio, estadisticonan ta mustra cu e cantidad di tempo cu muchanan ta dedica pa hunga a bin disminuyendo for di algun decada. Orarionan familiar y escolar ta structura, mayornan ta traha pafo di cas y tambe tin luganan menos sigur pa hunga, aparte di aumento di uso di dispositivonan electronico y e tempo dilanti un pantaya ta algun di e motibonan.

Cinco beneficio di hunga

Desaroyo cognitivo: Wega ta stimula imaginacion y creatividad, locual ta permiti muchanan relaciona nan propio accion cu e resultadonan obteni.

Desaroyo di habilidadnan social: Ora un mucha ta hunga, ta interactua cu otro personanan, locual lo permiti pa compronde importancia di relaciona cu otronan.

Miho comprension y capacidad di concentracion: Pa hunga, muchanan tin cu compronde e reglanan di e wega, nan interes pa participa ta haci nan keda pendiente di tur aspecto, aumentando nan capacidad di concentracion.

Siña otro idiomanan di un forma mas lihe y cu mas vocabulario mas amplio: Pa tin interaccion cu amigonan y compañeronan di scol, muchanan ta obliga di expresa corectamente, esey ta nifica cu nan mester sa scucha y pone atencion, loke tambe ta permiti siña palabranan nobo pa comunica miho.

Fomenta e capacidad di expresa nan mes den publico: E diferente situacion cu ta bin dilanti den weganan, ta implica cu e mucha den diferente ocasion tin cu indica su punto di bista riba con por resolve un reto, custumbra di expresa y defende su opinionnan di un forma claro pa su compañero y amigonan, sea mucha of adulto.

Pa loke ta trata nan capacidadnan fisico, weganan ta permiti haci diferente movemento cu ta ehercita nan y ta yuda nan coordinacion psicomotriz, ta yuda disminui sobrepeso y obesidad y tambe ta permiti pa nan drumi miho durante anochi. Tambe ta faborece nan desaroyo sensorial y mental pa forma, grandura, color, holor y textura, nan ta expresa nan emocion como sorpresa, alegria y la creatividad ta forma parti esencial di hungamento cu ta permiti nan desaroyo y fortalecemento.

Como mayornan ta importante pa fomenta y haci uso di materialnan como caha di carton, blokinan di palo of plastic e cual nan por wordo adapta di acuerdo cu e crecemento y formacion di nan capacidadnan.

Tambe ta importante pa mayornan forma parti di e weganan cu nan yiu, debi na e papel fundamental cu tin den e desaroyo di e muchanan for di chikito asina como fortalece e laso afectivo entre mayornan y yiunan.