Dienst Publieke Scholen tabata hiba un maneho inapropia unda tabata anda cu hopi descuido cu datonan di personal. Esey ta un di e conclusionnan cu Direccion di Recurso Humano, DRH a saca for di un investigacion riba e maneho di personal di DPS.

E investigacion di Direccion Recurso Humano riba e problemanan den Dienst Publieke Scholen, DPS a bin a base di peticion di Minister di Enseñansa, Ciencia y Desaroyo Duradero, dr. Armando Rudy Lampe y Minister pa Asuntonan General, Integridad, Administracion Publico, Innovacion y Energia mr. Evelyn Wever Croes riba 11 di Februari 2021. Esaki ta contrario na locual Prome Minister, Evelyn Wever Croes a bisa den Parlamento mientras el a bisa cu tabata e Minister actual di Enseñansa, Endy Croes a pidi e investigacion. Pa dr. Lampe, e ta otro muestra con Prome Minister ta gaña cu facilidad.

E rapport di DRH riba DPS a haya atencion ayera ora cu diferente hende tabata comparti esaki pa medio di diferente medio di comunicacion. Rudy Lampe a ripiti locual el a laga atras den su documento di traspaso ora cu el a baha como Minister, esta cu “mesora ora cu mi a bira Minister, mi a mira e caos pa loke ta DPS.” Segun Lampe, DPS tabata politiza desde su concepcion y no tabata funciona. Consecuentemente, e personal, entre otro e docentenan di scolnan publico, a keda negativamente afecta.

DRH a saca afo cu e dossiernan di personal tabata incompleto of algun tabata perdi. Nombramentonan no a keda formalmente registra, cu ta trece problema pa pensioen di e personanan aki. “Ta pa e motibo aki mes cu mi a bin cu e proposicion pa independisa DPS, percura pa un directiva profesional di un fundacion keda encarga cu e monitor diario di e organisacion, los di politica. A bin protestanan y Parlamento a tuma un mocion na 2018 contra independisacion di DPS.”

Rudy Lampe a bisa cu e mocion aki tabata contra interes di e docentenan, y como tal e no a duna su mes por vencido y el a busca contacto cu DRH pa mira con e departamento por yuda DPS pone asunto na ordo. “E conseho a drenta dia 7 di Januari 2020 y asina a cuminza cu e investigacion cu a produci e relato di 2021. Mi a percura pa mesora pa ehecuta e recomendacionnan y tabata bao di mi iniciativa cu DRH a interveni den DPS,” Lampe a mustra.

E rapport

DRH a bisa e investigacion a tuma lugar entre 16 di Februari 2021 pa April 1, 2021, y a señala cu e tarea di DPS ta caracterisa pa tres proceso nucleo, cu ta procesonan PIR na interes di tur personal di enseñanza publico; procesonan educativo, cuido di calidad di scolnan publico, y tambe procesonan financiero unda ta responsabel pa institui, ehecuta y maneha presupuestonan di scolnan publico.

DPS ta conta cu 842 empleado y e investigacion di DRH tabata riba e tereno di recurso humano. A analisa procesonan educativo y financiero den e investigacion specifico unicamente si nan tabatin conexion cu e procesonan di recurso humano.

E investigacion a inicia cu un muestra di 20 dossier di personal, di tur nivel di enseñanza. DPS tin cuater funcionario cu ta maneha e datonan di personal, y como tal a scoge cinco dossier di e cuater funcionarionan pa investiga. Locual por a nota mesora ta cu di e 20 dato di personal, tres tabata bashi. E dossiernan tabata na e funcionario di Recurso Humano cu segun DRH ta un riesgo grandi, ya cu e datonan no tabata den archivo, sino riba un mesa of den un cashi di un funcionario di Recurso Humano di DPS. Segun procesonan di personal, e documentonan aki mester ta den archivo, cu excepcion di esun cu ta trahando riba dje. Esaki ta crea riesgo cu ta perde e documentonan, ora cu no ta warda nan den un lugar central.

Mas ainda, no tin un sistema di registracion ken ta traha riba un dossier of ken a saca documentonan di e archivo di personal. “No ta maneha e datonan di personal na un forma sigur. Un dossier bashi no por keda controla,” drs. Omaira Lares a skirbi den e relato di e investigacion. “Esaki ta ilustra cu risiconan no ta imaginabel, sino real.”

Di e 19 dossier cu a controla, 12 persona tabata den servicio permanente, tres den servicio temporal y cuater tabatin contract. Di e 19 dossier aki, unicamente uno (1) tabata completamente na ordo. A constata diferente problema y/of falta di informacion di e otronan. E problemanan tabata varia, por ehempel cu a transferi un trahado di Bureau Traimerdia na un scol sin cu tabatin un decision formal, pa medio di un decreto ministerial of decreto nacional. No a establece e ‘Ter Beschikkingstelling’ pa SKOA di otro, tampoco e procedura con esski a sucede. Mas ainda, tabata falta e peticion di SKOA pa e docente, como tambe e conseho di Direccion di Enseñansa, cu mester percura pa e fondonan sali di un presupuesto pa e areglo di subsidio pa salarionan. No tabatin un acuerdo laboral pa e cuater persona cu tabatin contract laboral, cu a crea e riesgo pa acuerdonan di largo duracion. Tambe a señala cu un empleado di DPS tabatin añanan trahando como Director di scol, pero su nombramento no a keda estableci formalmente pa medio di un decreto ministerial. Riba dje, no a haci un investigacion di antecedente di parti di Servicio di Seguridad na momento di a nombra un Director di Scol.

Otro caso straño tabata nombramento di un persona den servicio fiho (vaste dienst) a pesar cu e trahado tabatin apenas un aña den servicio, a base di dispensacion ya cu e tabatin un diploma na nivel di MBO. A cambio, documentonan di otronan cu tabatin derecho pa drenta servicio fiho tabata perdi of no a caba di traha riba nan peticion.

E rapport a ilustra un administracion hopi desordena unda no a tene cuenta cu cautela, unda hasta tabata falta e funcion, y e nivel di salario cu e persona ta cay aden.

DRH a bisa cu aunke cu e investigacion a base di e muestranan aki no ta suficiente pa conclusion general a base di estadistica, nan ta indica si cu mester di intervencion na nivel di Recurso Humano pa mehora e trabao.

DHR como tal a tene combersacionnan cu tur e personal cu ta traha na DPS, cu a ilustra cu no tabatin procedura cu ta describi procesonan. A tuma paso pa e procesonan financiero, pero for di e combersacionnan a sali cu cambionan continuo den maneho a stroba continuidad pa cual motibo no por a caba di traha riba e descripcion di procesonan. E conclusion na e momento ey tabata cu e forma con tabata trata cu documentonan di personal no tabata bay hunto cu e procesonan of proceduranan cu ta describi, algo cu ta necesario pa sigura calidad di e datonan aki.

Tampoco a traha riba digitalisacion y no tabatin sistema di registracion. Tur documento ta riba papel y algun tabata perde pasobra no tabata pone nan na e luga corecto. DPS a indica di no a ricibi e sosten pa e digitalisacion necesario y a tuma iniciativa su mes pa un asina yama ‘leerlingvolgsysteem,’ y a cumpra laptop, pero cu nan no ta instala na un red. Pero falta un vision general riba implementacion di con mester traha a base digital.

DRH a conseha DPS pa cuminza cu e procedura di seleccion pa e funcion di Director di DPS, kende hunto cu dos gerente temporario lo forma un comision di maneho temporario pa traha riba e tereno di recurso humano. Nan mester traha riba e plan di formacion di DPS y yena e funcionnan a base di nombramento, pa asina para e asina yama ‘terbeschikkingsstellingen’ for di enseñanza publico na servicionan publico. DRH tambe ta bisa cu mester elabora e guia di procedura, simplifica administracion, y implementa de inmediato un sistema di control interno di e documentonan di s humano. Y crucial ta e fortificacion di e sistema digital y pa haci inversion den sistemanan di IT. Finalmente, tur nombramento, promocion, retiro den enseñanza y otro decisionnan mester keda discuti den Conseho di Minister. DRH a bisa cu e Ministernan mester pidi Direccion Legislativo y Asuntonan Huridico adapta e reglamento di ordo di Conseho di Minister pa e punto aki.

Conseho di Minister a tuma recomendacion na Mei 2021

Rudy Lampe a bisa cu e como Minister encarga na Mei 2021 a trece e recomendacionnan aki den Conseho di Minister, cu a bay de acuerdo cu nan tambe. Como tal, e no por acepta cu Prome Minister Evelyn Wever Croes awor kier duna su colega di partido y miembro di e gabinete actual, Endy Croes e credito pa algo cu a sucede caba, bao responsabilidad di Rudy Lampe.