Dialuna merdia a tuma luga un encuentro entre e sindicatonan di Aruba, Corsou y Sint Maarten cu Secretario di Estado, Alexandra van Huffelen y Minister Presidentnan di Aruba, Corsou y Sint Maarten. Durante e reunion, e sindicatonan tabatin e oportunidad pa discuti diferente punto y preocupacionnan. Presidente di SIMAR, Josephine Albertus, a splica na Bon Dia Aruba con e reunion aki a bay y kico tabata e puntonan di prioridad cu a trece pa dilanti.

Pa loke ta trata e sindicatonan di Aruba, manera ya ta conoci e grupo aki tin 2 aña caba ta entregando e 12.6%, cu na principio di e pandemia nan a cuminsa entrega a base di solidarismo. Na e momentonan aki, dos aña despues, ainda e recorte salarial t’ey. Den e ultimo temponan aki, comunidad por a tuma nota di e lucha fuerte cu e sindicatonan ta hibando pa asina logra recupera nan salario completo back, ya cu segun gobierno, Aruba ta recuperando economicamente danki na turismo.

Albertus, presidente di SIMAR, a splica cu sindicatonan di tur tres isla a entrega un carta na Secretario di Estado Van Huffelen y na mesun momento nan a entrega e mesun carta na Minister President di Aruba, Corsou y Sint Maarten tambe.

Durante e reunion, Albertus a comenta, e sindicatonan a trece nan puntonan pa dilanti y cada Minister President como tambe e Secretario di Estado a trece nan puntonan pa dilanti. Como sindicato di Aruba a pidi pa Prome Minister, Evelyn Wever-Croes, pone por escrito loke el a sali bisa den rueda di prensa algun siman atras, pasobra ta den rueda di prensa sindicatonan na Aruba a tende cu otro luna lo ricibi 5% back; y otro aña e resto, cu ta 7.6%, lo wordo duna back y di e forma aki e recorte salarial ta wordo elimina.

Ariba dia 20 di mei, Prome Minister Wever-Croes a publica un video ariba su pagina oficial di Facebook indicando cu Aruba a yega na un acuerdo cu Hulanda na unda cu entrante 1 di juli 2022 lo stop e recorte di 5% y entrante prome di januari 2023 lo elimina full e recorte di 12.6%. Pero durante e reunion a sali na cla cu e punto aki en realidad no ta concretisa.

E punto principal di e grupo di sindicatonan di Aruba tabata pa Wever-Croes pone esey por escrito, preto riba blanco, y durante e reunion Wever-Croes a informa e sindicatonan cu e no por pon’e por escrito pasobra no ta sigur ainda cu ta asina, cu lo duna back e 5% otro luna. Tin cierto exigencianan cu Aruba tin cu cumpli cune y tanten cu no cumpli cu esakinan, no por duna e placa back.

“Pa nos e ta lastima, pasobra luna pasa, ora cu nos tabatin nos marcha, nos por corda cu gobierno a sali bisa cu tur cos ta regla. Nos ta bisa pakico duna ilusion na trahado, na pueblo, si bo sa cu bo no por cumpli?”, Albertus a expresa.

El a sigui splica cu durante e reunion, e sindicatonan a trece cuater punto di importancia pa dilanti. Un di nan ta cu e 5% cu lo mester paga back na e trahadonan publico y semi-publico mester sali for di e presupuesto di Aruba, pero pa por haya aprobacion pa esey, gobierno a manda esaki pa CAft y ta wardando ainda ariba e contesta di CAft. Por a tuma nota cu e ultimo carta di CAft tabata desastroso pa Aruba riba e parti di finanzas.

E di dos punto, Albertus a menciona, tabata cu e minister- y parlamentarionan tin cu sigui entrega 25%. E di tres punto tabata e top inkomens cu mester baha na 130% compara cu prome minister su entrada. Y e di cuater punto cu nan a trece pa dilanti ta cu na 2023, Gobierno di Aruba mester entrega of duna e trahadonan publico y semi-publico e 12.6% completo back, no por pidi placa mas y mester cumpli cu tur e normanan.

“Eynan nos a keda. Pa nos el a wordo confirma, pasobra ya caba nos a bisa for di luna pasa cu loke gobierno a sali bisa den nos bista no tabata cla, pasobra nos tambe a lesa tur e cartanan di CAft, pero ta lamentabel pa wak”, el a indica.

Albertus a remarca cu nan a ripara cu e gobiernonan di Corsou y Sint Maarten si ta papia y si ta dialoga cu nan sindicatonan, pero na Aruba sindicatonan tin cu tende cada noticia of decision via rueda di prensa. “En todo caso, nos a trece nos puntonan pa dilanti, nos preocupacionnan na unda cu nos a mustra tambe cu nos ta sufri pa loke gobierno no ta cumpli cune y esey no ta husto pasobra dia cu a kita for di nos e tabata pa solidarismo”, el a agrega.

E presidente di SIMAR a subraya cu por mira cu aworaki tur cos ta bayendo back na normalidad y cada siman por tuma nota cuanto turista ta bin y economia ta birando miho, pero ainda e trahadonan publico y semi-publico tin cu entrega.

Por ultimo Albertus a comenta cu aworaki nan mester warda te dia 24 di juni den Rijksministerraad pa wak kico nan ta dicidi y e ora nan lo confirma si en berdad e trahadonan publico y semi-publico lo ricibi e 5% back si of no.