(AP) – Oficialnan Britanico di salud lo cuminsa ofrece vacuna di Monkeypox na algun homber cu ta homosexual of bisexual of tin relacion sexual cu homber, kendenan ta na un riesgo mas halto di ser contagia cu Monkeypox, den un esfuerso di combati e brote mas grandi di e malesa mira fuera di Africa.
Britain Health Seciruty Agency a bisa den un declaracion riba diamars cu dokternan por considera e vacuna pa algun homber cu ta gay of bisexual y hombernan cu tin relacion sexual cu homber na e riesgo mas halto di exposicion, kendenan ta defini como “personanan cu varios pareha cu ta participa den actonan sexual den grupo.”
“Pa medio di expande e grupo eligibel na e personanan cu ta na riesgo halto, nos ta spera di por kibra e cadena di transmision y yuda contene e brote,” director di inmunisacion di e agencia, Dr. Mary Ramsay a bisa.
Luna pasa, un consehero di World Health Organization a bisa cu e brote di Monkeypox fuera di Africa ta hopi probabel di a ser plama pa actividad sexual di hombernan na festivalnan na Spaña y Belgica.
Vacunanan anteriormente tabata disponibel solamente pa empleadonan di cuido di salud cu ta cuida di pashentnan cu tin Monkeypox of pa personanan cu ta limpia y desinfecta areanan contamina pa e virus. E vacuna originalmente a ser desaroya pa Smallpox, un malesa relaciona, pero ta 85 porciento efectivo contra di Monkeypox.
Te cu awo, mas di 99% di e casonan di Monkeypox na Britania ta entre hende homber, cu e mayoria di nan den hende homber cu ta homosexual, bisexual of tin relacion sexual cu hende homber. Scientificonan ta adverti cu cualkier persona cu ta den contacto cercano cu cualkier persona infecta cu Monkeypox, of nan paña of hasta klechi di cama ta na riesgo di contagia cu e malesa, sin importa nan orientacion sexual.
Actualmente tin 793 caso di Monkeypox na U.K, di mas di 2,100 caso den 42 pais globalmente. Te ainda no a reporta ningun morto fuera di esunnan na Africa.
