Aruba ta mira un siman grandi tras di lomba unda cifra ta mustra cu a ricibi 13.000 turista crucero ariba nos dushi isla. E turista nan aki tabata procedente di diferente crucero, entre otro Carnival Horizon, Allure of the Seas y Explorer of the Seas. Ta importante pa nota cu e turista crucero ta hunga un rol importante den e recuperacion y progreso di Aruba su economia, y p’esey Gobierno di Aruba ta traha continuamente pa sigui desaroya e mercado aki.
Minister di Turismo y Salud Publico Sr. Dangui Oduber ta satisfecho di mira un siman caminda hopi turista a yega nos isla. Un siman cu hopi trabao pa nos taxista, tour operators, restaurantnan y tiendanan. Aruba ta recuperando y progresando, y tin tur confianza cu e aña 2022 ta e aña cu Aruba lo recupera turismo back na e nivelnan di aña 2019, segun un comunicado di gobierno.
No obstante cu e “low season” pa turismo crucero nos por mira back un siman exitoso pa nos turismo crucero cu un cantidad substancial di turista. Den luna di november 2022 lo tin yegada di un crucero cu pa promer biha lo sail pa Aruba y dentro di poco lo anuncia esaki. Turismo ta keda e driver principal di nos economia.
