Reunion publico riba incinerador: CTC ta haya 7.5 miyon florin pa opera incinerador pa cinco aña sin cu ta asumi responsabilidad

Caribbean Trucking Company lo haya 7.5 miyon florin pa opera un incinerador, cu ta propiedad di Gobierno, cumpra pa DOW na un balor di 1.8 miyon florin. Y pa oposicion, e pregunta ta pakico ta CTC ta maneha e ekipo cu ta di Aruba, mientras cu por a duna Serlimar of hasta personal di DOW mes a oportunidad pa haya certificacion pa opera e incinerador. Pero particularmente e fondonan aki lo por a yuda Serlimar, cu pa ley ta encarga cu no solamente e recogemento di sushi na Aruba, pero tambe su procesamento.

Ayera Parlamento tabata den un reunion publico cu Minister Ursell Arends y Prome Minister Evelyn Wever Croes riba e incinerador, despues di a reuni prome cu expertonan di Gobierno y Caribbean Trucking Company den un sesion cera. Durante e sesion cera aki, expertonan di entre otro DOW y representantenan di e compania a duna mas detaye di e operacion na dump y kico tur ta haci pa mitiga impacto riba salud di esnan cu ta biba den cercania.

Tabata fraccionnan Accion21 y AVP a pidi e reunion riba e consecuencianan di e uso di incinerador.

Miembronan di fraccion tabata hopi critico, unda particularmente dr. Ryçond Santos do Nascimento a puntra unda e estudio di impacto riba salud di esnan cu ta biba den cercania di Parkietenbos. Segun Minister Ursell Arends, tin reunion cu e organisacion cu Nivel Research Institute cu ta bay haci e estudio aki.

Pero pa Santos do Nascimento, e ta un pregunta grandi con Gobierno no tin fondo pa procesa sushi, pero si ta paga un compania priva pa haci e trabao. E Parlamentario a recorda e Minister cu maneho di desperdicio rond mundo ta marca pa corupcion y tabata kier sa si e sector aki ta afecta pa corupcion. Segun e Minister, ta wardando e estudio forensico riba Serlimar pa haya un bista. Pero Minister a bisa cu otro siman lo duna mas informacion y esaki pa Santos do Nascimento ta ilustrativo cu e Minister no ta transparente; mescos ta e caso cu e planta di purificacion di awa, esta RWZI. “Pueblo kier sa dicon no tin placa pa nada, no tin placa pa prepara hendenan di Serlimar pero si por paga compania priva. No por kima cadaver den e incinerador, pero si por kima nan den baki habri.”

Di su banda, Miguel Mansur di Accion21 a bisa cu ta kizas e contract cu Caribbean Trucking Company kizas no ta ilegal, pero “ehempel di corupcion ta mas bisto cu nunca. CTC tabatin contract caba pa dera sushi na Ser’i Tijshi. Nan mester a hinca e sushi den ‘bales’ y a haya placa pa esaki. Pero CTC no a cumpli y mester a bay pa Ecotech, cu mester a bolbe saca e sushi y reprocesa nan. Pues Pais Aruba a paga hopi na CTC cu nunca a debolbe un cen. Pero, sorprendentemente, ken ta opera e incinerador? E mesun CTC.”

Pa Mansur ta dificil pa compronde pakico ta CTC ta haya e contract pa 7.5 miyon, despues cu DOW a paga 1.8 miyon pa cumpr’e. “Con Pais Aruba ta cumpra un incinerator pa 1.8 y ta duna un compania cu ya a mustra di no a cumpli, un contract di 7.5 miyon pa opera e incinerator di Aruba. Esey mi no ta compronde.” Mansur a bisa tambe cu e ROPv, e Plan di Ordenanza Teritorial cu regla, ta prohibi un incinerador na e luga unda e ta. Riba e punto aki, Minister Arends a bisa cu netamente Parkietenbos ta e unico luga indica unda por procesa sushi. Pa loke ta e seguridad di aviacion, e kimamento di sludge tambe por crea problema door di atrae parha. Den caso aki, Minister Arends a bisa cu ta e mangelnan na Bucutiweg ta atrae e parhanan y no tin nada di haci cu e incinerador.

“Pero ta e habitantenan ta nos interes primordial. Nan si tin hopi keho. Pakico no por haci un estudio di incidencia di malesa,” Mansur a urgi. Esaki ta unda Minister Ursell Arends a mustra cu Nivel Research Institute lo hunga un papel. Na fin di e prome ronda, Miguel Mansur a puntra mirando cu ta usando e incinerador ta kima sushi medico y sludge, lo no ta miho pa hiba e ekipo mas cerca di e fuente, esta na Bubali. Minister Arends a bisa cu ROPv ta permiti unicamente Parkietenbos pa procesa sushi.

Mike de Meza di su banda no ta kere cu e obhetivo pa cera dump na December 2022 ta realistico, specialmente sin cu tin un plan pa maneho di desperdicio. Su colega di fraccion, Benny Sevinger, ex Minister encarga, a bisa cu tur Gobierno a purba di tuma paso. Pero e no ta kere den e proyecto Trash to Cash y awor ta sinta cu companianan pa nan yuda bin cu un maneho di desperdicio. Pero nan no ta den e negoshi pa perde placa. Gobierno ta paga Ecotech pa hinca sushi den bales. “Ta Gobierno ta paga toch?”

Mas ainda, e solo hecho cu incinerador ta keda riba Parkietenbos, ta ilustra cu dificilmente por kere cu ta bay sera dump na December. Den su concepto, e Minister por sera e dump awe mes, pasobra e solucion ta djis e tiramento di sushi na Ser’i Tijshi.

Gerlien Croes a mustra cu 45 porciento di e sushi di Aruba ta bay Ecogas/Ecotech procesa, 35 porciento ta bay pa dump, 10 porciento ta bay pa companianan cu ta recicla y 10 porciento lo mester bay pa incinerador. “Pero esey no ta realidad. Pasobra e ekipo no ta procesa sushi medico ni carcass. Pues e incinerador no ta procesa e 10 porciento, y esaki a cambio di 1.8 miyon plus 7.5 miyon florin.” E Parlamentario tambe a cuestiona con Trash to Cash lo mester yuda e Minister bin cu su maneho di desperdicio.

Lider di fraccion di AVP Mike Eman a papia di vision cu e ta sinti cu falta. Tur e esfuersonan bao su gobernacion, segun Eman, tabata pa yega na sostenibilidad di energia, cu a inclui e plan pa converti sushedad den energia.

Raymond Kamperveen di fraccion di RAIZ tabatin pregunta specifico riba e problemanan den Serlimar y kico por a conduci na su surseance van betaling. Y tabatin pregunta con ta wak e uso di dump y a haya claridad cu ta Gobierno ta doño di e dump, pero a pasa e maneho bao encargo di Serlimar. El a puntra tambe kico ta bay pasa ora cu cera e dump na December. Manera a mustra caba, Minister Arends a bisa cu entretanto lo pasa e actividad pa Seri Tijshi.

Durante e prome ronda, miembronan di fraccion di MEP, Sr. Ricky Hoek y Marco Berlis tabatin pregunta specifico, entre otro riba kico ta bay pasa cu e sero di sushi, pero den e di dos ronda, particularmente Sr. Hendrik Tevreden a ilustra kico e ta pensa di particularmente e ponencianan di AVP cu no a soluciona e problema di dump y cu mas bien, pa motibo di gasta placa a haci cualkier solucion mas dificil.

Locual tabata yamativo for di e reunion, cu por cierto no a caba ainda, y a keda posponi te na un otro ocasion ta cu Caribbean Trucking Company no ta responsabel pa cualkier problema cu e incinerador por genera of hasta si e kibra, y cu ta DOW ta paga pa e incinerador por opera. E gasto di fuel por ehempel a subi di 28 mil florin te na 50 mil florin pa luna.