Te ainda investigacion riba maneho financiero na Aruba Huis no ta cla; Si sali algo afo cu no ta bon lo mi tuma accion, Evelyn Wever Croes a sigura

Prome Minister Evelyn Wever Croes no por bay duna splicacion na Parlamento ni na medionan di comunicacion riba investigacion di Departamento di Contraloria Central, CAD riba e maneho financiero na Aruba Huis. Segun Prome Minister, e no por papia di un investigacion cu ainda ta andando.

“Mi sa cu fraccion di MAS a pidi pa e rapport, mientras cu fraccion di AVP kier un reunion publico,” mr. Wever Croes a bisa, enfatisando cu ta e mes a pidi pa un investigacion ora cu el a tuma nota cu cos no ta bayendo bon. “Mi ta wardando e investigacion caba. Pero, entretanto a haya indicacion di e investigacion cu cos no ta bayendo bon y mi a interveni mesora.”

Prome Minister no a bisa con el a interveni y si esaki a conduci cu Minister Plenipotenciario, Guildred Besaril mester a entrega su retiro. “Ta wardando e conseho final y e ora lo tuma decision. Ken cu haci cos robes, mester carga cu responsabilidad. Si tin cos cu a bay fout, lo mester tene responsabilisacion.”

Pero e ta enfatisa cu e no por duna rapport na mita di proceso y “mi no por bay den debate pa daña investigacion . Mi a contesta nan pa splica esaki. Manera mi ta den posibilidad lo mi duna informacion riba esaki.”

Wever Croes no ta kere cu e comparacion cu Alan Howell, lider di fraccion di POR ta igual cu e caso aki. Manera ta conoci, Prome Minister Wever Croes a baha Gobierno despues cu Howell a bira sospechoso di fraude. “E comparacion ta un stap hopi leu. E tempo di Alan Howell, el a bira un sospechoso pero no kier a retira como lider di fraccion di POR.” Ta e postura di Howell pues a forsa Wever Croes baha Gobierno. Den e caso di Aruba Huis no tin ningun sospechoso, ainda. “E investigacion ta uno administrativo. Ta casonan totalmente diferente. Asina cu mi ta den posibilidad, lo mi informa Parlamento di tur cos.”

Evelyn Wever Croes a bisa cu Guilfred Besaril a bisa cu e mes a tuma retiro boluntario y cu e mester tuma su palabranan. Ainda e ta candidato di MEP si. Pero, “ mi no ta bay anticipa. Ora investigacion ta cla y mi lo tuma accion,” Prome Minister a sigura.