Cuminsando diaranson 15 di juni 2022, Oficina Central di Estadistica (CBS), conhuntamente cu Departamento di Labor y Investigacion (DAO) lo ehecuta e Encuesta di Forsa Laboral Juni 2022 (EFL Juni 2022). E encuesta aki tin como meta pa forma un imagen actual y completo di e mercado laboral di Aruba.

Pa medio di e informacion compila lo determina, entre otro, e cifra di empleo y desempleo na Aruba. E informacion aki, den conhunto cu datonan colecta durante di e añanan anterior, ta wordo usa pa señala tendencianan riba nos mercado laboral y alabes ta yuda gobernantenan y empresarionan refina y mehora nan maneho pa cu e mercado laboral di Aruba.

E EFL Juni 2022 lo wordo haci digitalmente y telefonicamente. Hogarnan cu a participa na Censo 2020 y na e EFL 2021 lo wordo acerca pa participa na e EFL Juni 2022. E hogarnan aki lo ricibi sea un yamada pa haci un entrevista of un e-mail cu lo contene mas informacion di e encuesta como tambe un link pa por yena e cuestionario online. E cuestionario ta contene preguntanan basico pa tur persona den e hogar, pero preguntanan relata na e mercado laboral solamente ta wordo puntra na esnan di 15 aña bay ariba ya cu segun principionan di e Organisacion Internacional di Labor (ILO) personanan 15 aña bay ariba ta wordo considera como parti di e forsa laboral di un pais.

Mester enfatisa cu e ta sumamente importante pa tur persona di 15 aña of mas cu wordo acerca pa yena e cuestionario di e EFL 2022 pa medio di un e-mail of via telefon, coopera pa yena e cuestionario completo.

Den comparacion cu e EFL 2021, e EFL Juni 2022 ta un encuesta sumamente cortico y ta contene solamente preguntanan basico pa haya mas informacion di e mercado laboral di Aruba. Si a añadi 2 pregunta na e cuestionario tocante e uso di e 4 idiomanan principal na Aruba (Papiamento, Ingles, Hulandes y Spaño) ya cu e ta birando cada biaha mas importante pa esnan cu ya caba ta forma parti di nos mercado laboral of ta bay forma parti di esaki, por papia, skirbi y lesa mas cu un idioma.

Durante e periodo di ehecucion di e EFL Juni 2022 lo tin un team disponibel na CBS pa contesta cualkier pregunta of inkietud via telefon of e-mail y pa asisti cu e yenamento di e cuestionario online. E team ta disponibel di dialuna pa diabierna for di 8:00am pa 12:00pm y di 2:00pm pa 8:00pm, y tambe den weekend for di 12:00pm pa 06:00pm. Por tuma contacto via di e siguiente number di telefon: 524 7433 (puntra pa e team di EFL Juni 2022). Tambe por manda un e-mail na LFS2021@cbs.aw pa cualkier pregunta of pa solicita pa un cita pa yena e cuestionario via telefon.

Resultado EFL 2022

Prome cuminsa cu e ehecucion di e EFL Juni 2022, e ta importante pa duna un relato cortico di e resultadonan di e EFL 2021 cu a tuma lugar na november 2021 bao di direccion di CBS conhuntamente cu DAO y Banco Central di Aruba (CBA).

E datonan colecta durante di e EFL 2021 a indica cu na november 2021, un total di 49.998 persona di 15 aña of mas tabata emplea, 4.836 persona tabata desemplea y 24.627 persona no tabata activo riba e mercado laboral. Esnan no activo riba e mercado laboral ta esnan cu no ta trahando ni ta buscando trabao. Mas tanto e grupo aki ta consisti di studiantenan y adultonan mayor cu ya ta pensionado.

Ademas, e datonan colecta durante di e EFL 2021 a indica cu na november 2021 e indice di empleo (55.9%) a mustra un subida den comparacion cu e indice di empleo na october 2020 (50,5%, Censo 2020). Alabes, e indice di desempleo tambe a mustra un subida di 8.6 na 2020 pa 8.8 na 2021. Na su turno, e indice di inactividad a conoce un bahada di 44.7% na 2020 pa 38.6% na 2021.

Den e infografico adhunto por haya un bista mas detaya di e desaroyonan cu a tuma lugar riba e mercado laboral di Aruba entre 2016 y 2021. E resultadonan di e EFL 2021 ta publica riba e website di CBS y lo wordo publica tambe dentro di poco riba e website di DAO.

Tur informacion colecta durante e encuestanan di forsa laboral ta wordo procesa anonimamente y ta publica solamente estadisticanan den forma agrega. E informacion di tur participante na e EFL Juni 2022 ta contribui na mehora e disponibilidad di informacion pa por sigui di cerca e desaroyonan cu ta tuma lugar riba e mercado laboral di Aruba. P’esey e contribucion di tur persona y hogar cu wordo acerca pa participa na e EFL Juni 2022 ta esencial.

Nos ta gradici cada persona di antemano pa nan participacion na e EFL Juni 2022. Pa mas informacion di e EFL Juni 2022, por tuma contacto libremente cu e team di investigacion na CBS entrante 15 di juni na number di telefon 524 7433 (puntra pa e team di EFL Juni 2022) of por manda un e-mail na: LFS2021@cbs.aw