Mientrastanto a cuminsa traha riba inkomstenbelasting di aña 2020
E trabaonan na Departamento di Impuesto ta avansando cu pasonan firme y sigur, pa asina por cumpli cu tur e contribuyentenan cu ta cumpliendo debidamente cu nan asuntonan di impuesto. Den e prome kwartaal di aña 2022, a paga un total di 8.7 miyon florin como pago di restitucion na e contribuyentenan cu a paga impuesto di mas.
Restitucion den prome kwartaal di aña 2022
Den e prome 3 lunanan di aña 2022, tabatin 5.163 caso di restitucion cu a keda realisa, pa cual a paga en total 8.7 miyon florin. E pagonan di restitucion ta toca diferente aña, pero e sumanan mas grandi di pagonan haci ta relaciona cu inkomstenbelasting di e añanan 2017, 2018 y 2019.
Inkomstenbelasting di aña 2020
Mientrastanto Departamento di Impuesto a cuminsa saca e cobransanan definitivo di inkomstenbelasting di aña 2020. Pues e contribuyentenan por conta cu den e lunanan venidero nan lo haya nan “definitieve aanslag” di aña 2020 via post. Esnan cu ta sperando un suma di restitucion y no tin debe di otro impuestonan habri, por spera tambe nan placa riba nan cuenta di banco. P’esey ta hopi importante pa percura pa tur debe di impuesto y e informacion di cuenta di banco ta na ordo. Si tin cambio di banco y/of di cuenta, ta recomendabel pa notifica e departamento mesora. Esaki por sosode solamente online via www.impuesto.aw/bankrekeningnummer.
Pa loke ta e cobransanan di aña 2021, ta planea pa cuminsa cu esakinan den di dos mita di aña 2022. Eliminando asina e constante atraso cu e departamento tabatin e ultimo decadanan.
Cumpliendo cu su contribuyentenan
Como un organisacion di gobierno serio y responsabel, Departamento di Impuesto tin como meta pa cumpli cu su contribuyentenan. E contribuyentenan cu a percura pa nan declaracion di inkomstenbelasting wordo entrega na tempo, cu tin gastonan deducibel y cu a paga pues di mas na impuesto, tin derecho riba pago di restitucion si acaso no tin otro debenan di impuesto habri. Esaki ta mas cu un deber pa e departamento. E tin un prioridad halto. P’esey tambe Departamento di Impuesto a implementa diferente plan di accion pa por elimina e atrasonan den e cobransanan aki y e obhecionnan cu tin pendiente. Ta trata principalmente di atrasonan den inkomstenbelasting caminda a logra elimina esakinan den un forma structura y cu un empeño grandi di su funcionarionan publico.
E contribuyentenan por conta cu Departamento di Impuesto no ta para keto y ta keda mehora y digitalisa su procesonan, pa asina ta mucho mas eficiente y eficaz.
