Empatia ta e sentimento di identificacion cu algo of cu un hende y e capacidad di identifica su mes cu otro, comparti su sentimentonan. Pero uso di rednan social ta mustra nos cu hopi biaha algun persona no ta capacita pa duna sosten na otro.
E posibilidadnan grandi di relaciona personanan cu otro cu e avancenan riba internet como rednan social por afecta empatia. Abuso di rednan social como Facebook of Twitter por afecta e desaroyo di emocionnan humano di manera corecto, como e compasion of admiracion.
E causa di e disminucion di empatia pa uso di rednan social y tambe pa publicacion di contenido violento den medionan di comunicacion, ta pa motibo di kita e sensibilidad di e personanan pa loke ta trata e sufrimento di otro hende.
Uso y abuso di rednan social como un via mas di comunicacion a afecta e comportamento humano. Varios estudio ta demostra esey, unda cu investigacion di Asociacion pa Ciencia Psicologico a conclui cu “e hobennan di awendia ta aproximadamente 40% menos empatico cu su mayornan compara cu 20 aña pasa”.
Tur loke tin di haci cu rednan social tin dos cara, e mesun herment cu ta aporta beneficionan tambe por tin efectonan negativo riba con por procesa cierto sentimento, deseonan y aspiracion; con e personanan ta proyecta nan personalidad riba rednan social y percibi esun di otro ta afecta empatia.
Ta un contradiccion interesante di nivel di autoestima, humildad y sensibilidad. No tur hende ta wordo afecta di manera igual debi na uso di rednan social, tur ta depende di nan necesidadnan afectivo y e tempo cu ta dedica na dje.
B’a yega di pensa cuanto biaha bo ta check bo rednan social pa dia? Kico lo por pasa si bo ta limita nan uso? E lo por genera ansiedad? Ta tempo pa pensa den ki medida ta desea di biba momentonan agradabel solamente pa asina saca un potret y post e riba rednan social. Si e contesta ta tuma na cuenta un uso profundo di rednan social, e persona mester haci un test profundo di e situacion emocional, segun specialistanan den psicologia.
E rason ta cu probablemente den e caso aki e persona tin “cierto adiccion” na biba den mundo digital aki, y su empatia pa acontecimento- y puntonan di bista di otro ta genera un sensibilidad extra riba e posicion na rednan social y mas sigur, un falta di empatia cu otro.
Generalmente loke ta wordo mustra riba rednan social ta destina pa otro hende gust’e, di mesun forma cu ta scoge un shimis bunita, ta mustra e parti mas atractivo. No semper ta trata di apariencia, por comparti idea of noticia, pero den un porcentahe halto, ta haci esey pa ricibi aprobacion di otronan.
Check ken ta esun cu a duna un ‘like’ y ken no na e post cu b’a caba di post tambe por wordo mira como ken ta esnan cu “di berdad” ta balora bo y ta pending di bo. Mester tin cuidou di e forma aki di aprecia e realidad, debi cu por ta perhudicial na momento di balora loke ta rond di nos socialmente. Si bo ta kere cu esun cu no duna bo un like no ta preocupa pa bo lo suficiente, por ta cu mester evalua te ki punto rednan social ta mas importante cu relacionnan “real”.
Sernan humano por gestiona informacion hopi lihe y nan por contesta den cuestion di seconde e dolor fisico experimenta pa otronan, sinembargo, na momento di enfrenta e denomina emocion social, como compasion of admiracion, e proceso ta tuma mas tempo, segun estudionan realisa pa ekipo di expertonan di neurociencia.
Nan a conclui tambe cu bida real ta e miho luga pa hende por haya oportunidad di sinti empatia, a diferencia di rednan social, cu “por aleha e usuarionan hopi activo di e humanidad mes”.
No ta trata di rednan social mes, sino di e tempo cu ta dedica na nan, pero e impacto di rednan social ta mas chikito compara cu television y weganan online, pa motibo cu por contribui na reflexion emocional.
Ta normal cu ora nos ta check nos Facebook nos ta haya cantidad di comentarionan cu insulto, cu desprecio, falta di respet, entre otro, pero kico ta e motibonan cu un persona ta insulta otro riba rednan social? E prome ta cu ta anonimo, rednan social ta duna espacio pa ‘haters’ sinti protegi ora nan ta crea un ‘fake account’. Ta parce cu esey ta e caminda pa nan scapa di nan mesun frustracion y nan ta sinti hopi sigur di hacie pa motibo cu nan sa cu por ta no lo tin consecuencianan riba nan persona.
Pa combati tur esaki, educacion ta sigui como e piesa fundamental, crea empatia a traves di educacion y pone nos mes den e luga di otro tambe riba rednan social, aunke no ta wak e cara di e otro persona, pero tras di e dispositivo ta existi un persona cu ta sinti.
Den caso cu un persona ta wordo ofendi, rednan social ta ofrece e herment pa denuncia e perfil falso. E hermentnan cu e personanan tin den nan disposicion ta importante pa papia di conscientisacion riba e tema y contribui pa caba cu e fenomeno aki.
