(AP) — Un ingeniero di software ex-trahador di CIA, acusa di causa e robo mas grandi di informacion clasifica den historia di CIA, a defende su mes na comienso di su huicio ayera, bisando e hurado cu el a wordo acusa falsamente y e ta un victima di un ‘witch hunt’ politico.
Joshua Schulte, di 33 aña di edad, a bisa cu a select’e pa investigacion y a arest’e pa spionahe pa motibo di su enfrentamentonan cu management di CIA prome cu e publicacion na 2017 di un cantidad di secreto di CIA riba WikiLeaks. Na un huicio anterior, e hurado no por a yega na un decision riba cargonan di spionahe, pero a conden’e pa cargonan menor di desacato (minachting) y declaracion falso.
Schulte a bisa cu gobierno a construi un caso cu ta ‘literalmente forensicamente imposible’ despues di a select’e pa enhuiciamento como e partido culpable durante un ‘witch hunt politico’ y despues traha patras pa presenta e hurado cu ‘un realidad alternativo, un mundo p’ariba abao, un twilight zone di gobierno’.
Schulte a haci su declaracion di apertura despues cu Fiscal Assistent, David Denton a bisa e hurado cu e evidencia lo proba cu Schulte tabata responsable pa un leak sin precedente, cu a pone compilacion critico di inteligencia rond mundo den full stop.
El a bisa cu añas di trabao y miyones di dollar gasta pa desaroya hermentnan cu ta permiti e detectivenan di CIA pa spiona riba adversarionan stranhero a desvanece mientras Schulte a entrega ‘secretonan precioso di defensa nacional Mericano’ na mundo.
E asina-yama Vault 7 leak a revela con CIA a hack smartphone di Apple y Android den operacionnan di spionahe internacional, y esfuersonan pa converti televisionnan conecta na internet den aparatonan pa scucha.
Prome cu su aresto, Sculte tabata traha como coder na e sede di e agencia na Langley, Virginia.
