Recientemente por a tuma nota ariba rednan social un situacion cu a tuma luga cu a trata un construccion den bario di Cunucu Abao, cu mester a wordo tira abao pa motibo cu no tabata cumpli cu ley. Dienst Openbare Werken (DOW) a tene un rueda di prensa ayera mainta, caminda a splica den detaye con e situacion a tuma luga y alabes a duna informacion importante pa loke ta trata permisonan di construccion.

Rubin Ponson di DOW a splica cu den e situacion particular aki, na final di 2021 e compania en cuestion tabata bezig cu un construccion cu a wordo para y a atende cune, caminda a pidi e doño di e compania pa cana e proceso corecto pa por yega na un permiso di construccion. DOW a duna persona un tempo pa dun’e oportunidad di pidi e permiso necesario, pero esaki, Ponson a indica, no tabata e caso. “Te dia di awe ainda e construccion aki no a pidi un permiso p’e”, Ponson a bisa.

Despues di un tempo, ariba 17 di maart, Ponson a sigui splica, DOW a constata cu e persona aki, a pesar cu ya caba wordo avisa y a para un construccion cu e tabatin anterior, el a bolbe cuminsa cu un otro construccion. Y den e caso aki e tabata un construccion cu DOW ta yama den e terminologia di construccion “rooilijn”, un zona caminda no por tin construccion. Esaki, Ponson ta remarca, e persona a wordo informa riba dje y cu mester kita e construccion cu e ta haciendo.

Segun Ponson a sigui splica, un carta a sali for di oficina di DOW cu fecha 1 april pa e persona aki, informando cu e tin dos siman pa kita e construccion. Despues di dos siman di tempo cu DOW a dun’e pa kita e construccion, nada no a pasa, y ariba dia 17 di mei Ponson a ricibi un yamada di un representante di e doño di construccion pa puntra tocante e situacion cu ta envolve e construccion ilegal. A duna splicacion amplio na e representante ariba kico por y kico no por dentro di leynan pa construccion.

E siguiente stap cu DOW a tuma, den e caso aki Ponson mes a tuma contacto cu e doño pa papia cune, pa asina convence e persona aki pa e mes kita e construccion prome cu DOW yega na e punto di bay kit’e, pero e doño di construccion a keda riba e punto cu e no lo basha e construccion abao.

Ariba 6 di juni DOW a bay na e sitio di dicho construccion ilegal pa cuminsa prepara locual mester haci pa basha e construccion abao, pa asina dia 7 di juni, e siguiente dia, yega na e luga pa realisa e trabao mes.

Ariba 7 di juni na momento cu personal di DOW a yega, e doño mes a tuma nota di esaki y a tuma e decision pa su mes haci e trabao y kita e construccion.

Ponson a remarca cu na momento cu e trabao ta wordo haci, berdad tabatin disgusto di parti di e doño di compania. Algun discusion tuma luga, pero mirando con lihe e trabao tabata bay, den mas o menos un ora a kita henter e construccion. DOW a evalua e situacion e momento ey y a keda stand-by pa wak con lihe e persona por a haci e trabao, y mirando con lihe el a bay, DOW a tuma e decision pa laga e doño di construccion mes caba di haci e trabao.

Ponson a subraya cu recientemente, den ultimo dos of tres luna nan tabatin cuatro caso mas, kisas hasta mas grandi cu e caso specifico aki, di construccionnan cu a wordo basha abao.

“Por lo general mester bisa cu DOW ta trahando riba e construccionnan ilegal aki y mi ta kere pa hopi tempo caba y lo bay sigui actua tambe riba e construccionnan aki”, Ponson a agrega.

Durante e conferencia, Ponson a tuma e oportunidad pa clarifica cierto informacion pa loke ta trata permisonan pa construccion. El a subraya cu pa ley eigenlijk no ta distingui e tipo di tereno, sea eigendom of erfpacht. Tur tereno cu ta bay construi riba dje mester pidi un permiso di construccion na DOW y ta depende di e tipo di tereno pa determina ki tipo di permiso di construccion e persona por haya, sea ta permiso pa negoshi of permiso pa cas.

DOW ta evalua kico por segun e destinacion di tereno. Na momento cu un persona haya un permiso di construccion, DOW ta controla cu e construccion ta tuma luga segun e permiso cu persona a ricibi, y den caso cu e construccion no bay segun e permiso, DOW ta ofrece guia y ayudo con por cumpli cu ley.

Den dado caso cu e construccion desvia hopi di e permiso cu a ricibi, DOW por para e construccion pa duna oportunidad pa manda otro mapa y cumpli cu demas rekisito pa haya un permiso nobo.

Ponson a enfatisa cu en berdad aworaki e parti di construccionnan ilegal ta hopi. DOW tin algun controladonan cu ta reparti riba e isla, cada un den diferente bario y tin biaha e trabao ta bira hopi pa un solo persona haci esey den un teritorio asina grandi. Pero a pesar di esaki, DOW ta traha pa identifica e construccionnan aki lo mas pronto posibel. “Mi ta kere nos ta purba di haya e construccionnan aki mas lihe posibel, para nan na un momento recien pa no laga sigui haci inversion, y si ta posibel tambe hopi biaha DOW mes lo guia e persona pa e por haya su permiso di construccion. Si e ta algo cu ta ilegal mes, nos ta wak si e ta algo cu por wordo legalisa”, el a indica.

Por ultimo, director di DOW, Marlon Croes, a remarca cu berdad Gobierno di Aruba a declara e aña aki como e aña di inversion y oportunidad. Den esaki DOW su posicion tambe ta pa guia inversionistanan y wak por duna permiso di construccion den un tempo hopi mas cortico pa stimula e economia. Pero esaki, Croes a enfatisa, ta siempre y cuando e ta den margennan di ley.