Pa mas di 20 aña Telefon pa Hubentud ta brinda servicio na comunidad di Aruba a traves di diferente proyecto cu ta enfoca ariba bienestar di mucha y hoben. Recientemente Shurman Milliard, trahado social di Telefon pa Hubentud, a anuncia cu nan lo ta hibando un di nan proyectonan exitoso, ‘Stop Termento’, pa introduci esaki na Saba y yuda reduci e problematica di termento na scolnan.

Na Aruba, pa hopi aña caba, e proyectonan di Telefon pa Hubentud ta conoci pa nan exito, sobretodo e servicio anonimo cu nan ta brinda na mucha y hoben a traves di e number conoci 131.Door di e proyectonan cu ta exitoso y tambe door di investigacion cu nan mes ta haci pa evalua e kico e efecto di e proyecto, kico nan ta logra, internacionalmente nan ta haya mas y mas pedido pa duna diferente charla cu nan ta duna na comunidad di Aruba, na otro isla- y paisnan tambe.

Segun Milliard a splica a traves di un entrevista cu e medio di comunicacion local Telearuba, esaki no ta prome biaha cu e proyecto di ‘Stop Termento’ ta wordo introduci na nivel internacional. Cinco aña pasa, el a indica, nan a bay Boneiro pa duna e comunidad di scolnan tambe e oportunidad pa introduci e proyecto aki. Na Aruba nan a introduci e proyecto aki bao di diferente scol caba y e cantidad ta keda crece tur aña.

Aworaki Telefon pa Hubentud a haya un peticion for di Saba pa duna e proyecto ‘Stop Termento’ tambe na tur e scol- y traimerdianan di e isla. El a indica cu esaki lo ta un bishita di 12 dia na unda cu mes lo duna charla na seis diferente grupo pa asina nan tambe por bay na nan scol y comunidad pa yuda stop e problematica di termento.

Banda di esey, Milliard a remarca, Telefon pa Hubentud Aruba ta yudando pa casi un aña y mey caba Saba tambe pa cuminsa cu nan mesun Telefon pa Hubentud.

“Nos sa cu e ta un derecho di mucha pa un mucha por expresa su mes, pa por papia, pa por haya informacion y guia di un profesional y di un adulto. P’esey riba un manera anonimo nos ta haciendo esey pa 21 aña caba. Pa e motibo ey ora cu mi ta na Saba tambe nos ta yuda nan pa asina dia 20 di juni nan por lansa nan chat, number 918, pero nan ta den contact cu Aruba”, el a splica.

Na Sint Eustatius tambe algun luna atras a introduci e mesun servicio aki y aworaki Saba ta na turno pa asina haya e servicio cu mucha por yama na un manera anonimo y wordo yuda riba un manera confidencial.

“Nos ta hopi orguyoso cu nos por haci algo asina pasobra no solamente nos t’ey pa nos muchanan aki na Aruba, esey ta nos core business y esey nos ta haci cu hopi amor cu hopi apoyo di comunidad y di e profesionalnan, pero como un trahado social of un psicologo of criminologo mescos cu nos tin den nos team, nos kier tambe yuda nos islanan bisiña den nos reino”, el a agrega.

Pa loke ta trata cifranan di termento na Aruba, Milliard a indica cu na Aruba nan a haci un investigacion ora cu nan a cuminsa cu e proyecto y hunto cu CBS nan a haci un encuesta bao di 8.400 hoben y a traves di esaki nan a descubri cu 54% di hobennan tin problema cu termento. “54% ta halto pasobra nos por compar’e cu otro lugarnan, por ehempel na Hulanda e cifra tabata 11%, ora nos a puntra na Merca e tabata 24%”, el a señala.

Despues cu e proyecto a cuminsa, Telefon pa Hubentud a realisa un otro investigacion durante e prome aña cu a introduci e proyecto caminda nan a wak cu e porcentahe a baha cu 24%. E siguiente aña nan a descubri cu e cifra a baha atrobe cu 11%, locual ta demostra cu den dos aña caba door di un proyecto di Telefon pa Hubentud termento a baha na e scolnan cu 36%.

Door di e investigacion y resultadonan exitoso aki na Aruba, Saba a acerca Telefon pa Hubentud pa bay eynan y duna e charlanan di e proyecto ‘Stop Termento’ pa e muchanan ayanan.

Actualmente, Milliard a remarca, tin hopi proyectonan cu ta bin. Na e momentonan aki nan ta tin e proyecto di ‘Best Dad Ever’ cu ta relaciona cu dia di tata cu ta yegando cerca. El a sigui splica cu aworaki nan ta bezig cu e di dos grupo di tatanan cu ta participando den e proyecto,

E proyecto di ‘Best Dad Ever’ ta un proyecto pa fortalece e rol di e tatanan aki na Aruba. Esey, el a indica, nos a ripara a traves di un investigacion cu Telefon pa Hubentud a haci hunto cu psicologo cu a bin Aruba pa wak kico e situacion ta, cu e situacion tabata zwak. A traves di e proyecto aki nan ta duna e tatanan cu ta participa den e grupo 10 diferente les cu ta yuda nan mehora diferente habilidadnan pa mehora nan rol den bida di nan yiunan.

Otro proyecto cu Milliard a menciona cu nan ta trahando riba dje ta un proyecto conhuntamente cu HIAS cu ta basta leu caba. E proyecto aki ta tocante emancipacion y igualdad. Por ultimo el a menciona tambe cu Telefon pa Hubentud a wordo acerca door di UNICEF, un di e fundacionnan mas grandi na mundo, pa traha un proyecto pa hobennan tocante participacion den comunidad cu lo enfoca ariba kico ta e voz di e hoben y kico e hoben ta pensa di cambionan cu e ta wak rond di dje, den comunidad. “Nos ta hopi orguyoso cu nos por traha conhuntamente cu UNICEF”.