Ayera atardi durante un conferencia di prensa, presidente di fundacion Mi Voz ta Bo Voz, Lisette Gomes, a anuncia oficialmente nan campaña di “Back to School” pa e aña aki y alabes a ricibi un donacion di fondonan cu a wordo recauda durante e careda Kids for Kids, en conexion cu e KLM Marathon cu a tuma luga recientemente.
Gomes a splica durante e conferencia cu fundacion Mi Voz ta Bo Voz a wordo acerca pa KLM Royal Dutch Airlines cu recientemente a organisa nan marathon na Aruba pa asina forma un grupo, “Kids for Kids” pa participa den un careda pa mucha.
Kids for Kids ta un grupo di muchanan cu a cana of core un distancia di cinco kilometer y a traves di esaki nan a recauda fondo pa yuda e muchanan den mas necesidad na Aruba. “Nos ta sumamente contento di anuncia cu siman pasa diasabra e muchanan a logra nan meta y awe KLM lo ta entregando fundacion Mi Voz ta Bo Voz un check di Afl. 4.755 florin cu a wordo recauda entre e muchanan mes y esaki lo bay over na yuda e muchanan den mas necesidad”, Gomes a splica.
Durante e careda aki tabatin participacion di diferente scol na Aruba, Ceque College, Colegio Arubano, De Schakel, International School of Aruba, EduCampus Learing Institute y tambe muchanan cu a participa di manera individual sin representa un scol specifico.
Gomes a remarca cu Kids for Kids a wordo organisa specialmente pa siña e muchanan con nan por brinda un ayudo na e muchanan cu ta den mas necesidad y alabes asina e fundacion por haya mas boluntario den futuro, muchanan cu ya desde jong por wak rond y asina determina con nan por yuda otro mucha cu tin mester di dje. Esaki tambe, el a sigui splica, ta pa promove deporte entre hobennan y pa mayornan encurasha nan yiunan a participa den actividadnan sano.
El a menciona cu e ganador absoluto di e careda di cinco kilometer di Kids for Kids tabata un di e participantenan cu a representa Kids for Kids.
Danilo de Freytas, Sales Manager na Aruba, Bonerio y Corsou di KLM tambe tabata presenta na e conferencia di prensa pa haci entrega di e donacion. “Di parti di KLM nos ta hopi orguyoso di por a participa tambe den e proyecto aki. E muchanan cu a core den Kids for Kids a logra recauda e suma di Afl. 4.755 y KML lo bay match e suma aki y haci donacion na Fundacion Mi Voz ta bo Voz”, De Freytas a expresa.
E fundacion lo ricibi un total di Afl. 9.510 cual lo ta disponibel pa yuda mas muchanan den necesidad. “Mi ta spera cu otro aña nos por sigui y haya mas fondo pa KLM por match atrobe pa e bira mas exitoso”, el a agrega.
De Freytas a splica cu KLM ta contribui na causanan aki pasobra tur cos cu tin di haber cu mucha nan ta haya hopi importante y nan ta haci esaki tambe na Corsou cu Ronald McDonald House cu ta e organisacion cu ta yuda muchanan y nan mayornan. Na Aruba e organisacion a tuma contact cu fundacion Mi Voz ta Bo Voz cu tambe tin un fundacion cu ta enfoca den brinda ayudo na e muchanan den mas necesidad. Esaki ta prome aña cu Kids for Kids ta wordo organisa y ta un evento cu ya tin dos aña tumando luga na Corsou.
El a remarca cu hopi biaha tin hopi organisacion cu ta yuda e muchanan cu mas tin mester di dje, pero e necesidad ta asina grandi cu no ta tur ta yega, y pa e motibo aki KLM ta brinda nan aporte na un bon causa. “Nos ta haya e ta algo positivo y nos ta spera nos por ta un role model pa otro organisacionnan por yuda mas muchanan den necesidad”.
Gomes a splica cu e suma cu e fundacion a ricibi lo yuda nan den e di tres edicion oficial di nan campaña Back to School. Desde ayera oficialmente cualkier persona of famia cu ta interesa pa adopta un mucha pa e campaña aki por inscribi pa haci esaki.
El a sigui splica cu aña pasa e fundacion a logra yuda un tiki mas di 300 mucha. Mester menciona cu tabatin mas o menos 500 mucha inscribi pa e ricibi ayudo, pero lastimamente no por a yuda tur mucha, y manera a mencion caba cu añas e problematica ta crese y actualmente tin por lo menos mil mucha na Aruba cu ta den necesidad. “Ta importante pa tin fundacionnan cu ta haci tipo di trabounan aki pa asina cumpli cu e meta di yuda tur mucha cuminsa scol cu tur nan necesidadnan”, Gomes a enfatisa.
Fundacion Mi Voz ta Bo Voz hunto cu Fundacion pa Nos Comunidad ta realisa un proceso di screening di e muchanan cu tin mester di ayudo. Gomes a señala cu dependiendo di e cantidad di mucha cu inscribi, nan lo yuda e muchanan cu ta den mas necesidad prome.
Gomes a informa cu e suma pa adopta un mucha e aña aki a subi. Segun el a indica aña pasa nan a haci nan maximo esfuerso pa mantene e suma na Afl. 150 pa mucha, pero e aña aki e suma a subi pa Afl. 175.
El a subraya cu cada mucha cu ricibi ayudo di Back to School lo ta ricibiendo uniform, keds, meya, tas y den e tas nan ta haya agenda, schrift, map y tur otro material necesario pa nan por cuminsa e aña escolar nobo.
Gomes a menciona tambe cu aña pasa e fundacion a wordo acerca door di un hoben DJ, Tarrick Ras y cu a bin cu e idea pa pela muchanan y a traves di esaki nan a logra pela riba 50 mucha homber gratis. “Mi ta spera nos por haya cooperacion di e barberonan e aña aki atrobe pa asina nos por bolbe haci esaki”, el a finalisa.
