Minister di Asuntonan Financiero, Comunicacion y Desaroyo Sostenibel Geoffrey Wever diahuebs ultimo a duna un conferencia di prensa pa asina ey ofrece mas informacion tocante un ley cu a wordo aproba siman pasa na Parlamento di Aruba, e Ley Consumentenkrediet.

Minister Wever a splica cu esaki ta un ley cu ta na bienestar di consumidor, di e personanan cu anteriormente tabata wordo confronta cu prestamo na un suma hopi halto, aworaki segun minister mes a indica lo haya proteccion huridico den sentido cu ora un persona ta fia placa of ta cumpra un producto cu afbetaling riba un propiedad e interes cu ta paga ta maximalisa.

Anteriormente tabatin porcentahenan halto den comunidad y aworaki e minister di Economia a haya e autoridad pa establece e maximo porcentahe “mi ta kere cu esaki ta un bon momento unda nos ta proteha e consumidor y na momento cu un instituto financiero duna un prestamo cu ta mas halto, cu e porcentahe maximo, e tin e proteccion huridico den ley cu posiblemente por manda un carta pa instituto financiero y bis’e cu e no lo paga e interes cu ta excede e maximo”, minister Wever a señala.

Si por ehemplo gobierno ta pone e porcentahe na 18% y un instituto financiero ta cobra 24%, ta solamente 18% e persona tin cu paga, a pesar cu e tin un acuerdo firma pa 24% y si e persona a yega di paga un exceso di 18% e tin e posibilidad di cobra e cifra ey back.

Minister Wever a sigura cu esaki ta un mehoracion na e posicion di nos ciudadanonan y tambe parti di e ley aki ta cu ta bay bin un sistema di registracion di credito caminda cada instituto financiero mester registra y ora un persona ta bay pidi un prestamo, e organisacion aki mester haci un evaluacion pa wak si e persona cu ta pidi e prestamo tin e capacidad financiero pa paga e prestamo back.

“Akinan nos ta mehora e posicion tambe, lo cual bo ta wak pa hopi biaha ta cu tin loke nan ta yama overcrediterin, unda hendenan tin demasiado debe, unda cu nan bay nan tin demasiado prestamo, pero e problema ta e fin di luna ey mes ora cu tur e debenan ta acumula y esaki ta cosnan cu ta trece hopi problema social, ta trece problema den nos hogarnan, e ta origen di problemanan di salud mental, hasta ta yega na adiccion”, minister Wever a sigura.

Cu esaki, tambe el a bisa cu consumidor lo wordo proteha pa motibo cu awor lo bin un evaluacion den e caso si un persona no ta apto pa un prestamo pa mehora asina ey nan posicion y cu nan no lo cay den problemanan financiero asina lihe mas.

Un otro elemento positivo cu minister Wever a trece dilanti ta cu ta bin un obligacion pa institutonan financiero pa haci propaganda corectamente, cu por ehemplo por tin companianan cu ta haci propaganda di tal forma cu no ta transparente y e consumidor cu no ta compronde e materia ta kere cu e tin un deal di e forma ey, pero realmente e ta algo diferente cu consecuencianan financiero mas drastico di lo cual e mes ta pensa.

Esakinan ta puntonan cu minister Wever ta hay’e importante cu e ley aki ta bin cune, asina mes, el a indica cu tin cosnan cu no ta den man di gobierno, cu nan no ta domina, manera e prijs di gasolin caminda el a sigura den un conferencia di prensa dianan pasa cu esey no ta den nan man.

“Pero ora tin posibilidad di yuda mehora e posicion di e ciudadano por ehemplo door di e ley aki, nos a hacie”, el a declara.

Na momento cu pandemia di Covid-19 a drenta na Aruba, hopi hende a hinca nan curpa den debenan cu a haci cu e situacion financiero na cas a bira mas dificil, aparte di esey tambe tin diferente comerciante cu no ta pagando nan empleadonan full nan salario unda cu nan kier cumpra algo of spaar algun tiki placa pero nan ta haya confronta cu nan debenan, ademas di esey tambe tin impuesto cu mester paga por ehemplo e plachi di number di auto, pa cu esaki minister Wever a expresa cu “ora ta papia di debenan atrasa di belasting dienst, e departamento aki semper ta dispuesto pa yega na un areglo di pago y cu personanan mester tuma nan responsabilidad mescos cu tur hende tin nan obligacion pa contribui y e necesidad pa placa pa gobierno ta grandi na e momento aki, sabiendo cu posiblemente e aña ki ainda mester acudi na sosten di likides”, el a bisa.

Tambe, minister Wever a sigura cu manera cu e ley ta keda cla y ta duna e posibilidad pa bin cu un ministeriële regeling cu ta e reglanan di minister ta pone mas facil pa publica esaki, ora e lo keda cla lo yega momento pa ley drenta na vigor y ta bira aplicabel pa institutonan financiero, “di tur manera, na momento cu ley ta bira aplicabel ta wordo aplica y lo tin un campaña di informacion pa institutonan financiero y na e momento ey nan tin e obligacion pa cumpli cu esey, si nan ta viola e articulonan bo ta haya bo cu por ta cu Banco Central lo pone boet”, el a finalisa.