Dia 20 december 2018 e Asamblea General di Nacionnan Uni a adopta resolucion 73/250 proclamando Dia Mundial di Seguridad pa Consumo di Cuminda (World Food Safety Day) pa entrante 2019, cada 7 di juni celebra beneficionan di alimento cu ta conta cu norma di higiena, sanidad y seguridad den nan produccion y preparacion.

Dia Mundial di Seguridad pa Consumo di Cuminda ta un manera importante pa: haci hende consciente di tema cu ta concerni higiena, sanidad y seguridad den produccion y preparacion di cuminda; demostra con pa preveni maleza aplicando medida pa garantisa un produccion y preparacion higienico, sano y sigur di cuminda; discuti enfoke colaborativo pa mehora higiena, sanidad y seguridad den produccion y preparacion di cuminda den tur sector concerni; promove solucion y forma pa haci cuminda mas sigur pa consumo.

Pakico mehora seguridad pa consumo di cuminda ta importante Acceso na cantidad suficiente di cuminda sigur pa consumo y nutritivo ta fundamental pa sostene bida y promove un bon salud. Maleza transmiti pa cuminda mas tanto ta infeccioso of toxico di naturaleza y frecuentemente indetectabel na prome bista y ta causa pa bacteria, virus, parasito of substancia kimico cu ta drenta den curpa di e consumidor a traves di alimento of awa contamina.

Seguridad pa consumo di cuminda ta hunga un papel esencial pa sigura cu cuminda ta keda sigur pa consumo den cada etapa di e cadena alimentario- di produccion pa cosecha, den procesamento, almacenamento, distribucion te na e final di e cadena, den e preparacion y e consumo.

Cu un estimacion anual di 600 miyon caso di maleza transmiti via cuminda, cuminda no apto pa consumo ta un menasa pa salud humano y economia, afectando den un manera desproporcional personanan vulnerabel, marginaliza, specialmente hende muher, mucha, poblacion afecta pa conflicto y migrante. Ta calcula cu alrededor di 420.000 hende mundialmente ta muri cada aña despues di come cuminda contamina y mucha bou 5 aña di edad ta conta pa 40% di e mortalidad pa motibo di maleza transmiti via cuminda, cu 125.000 morto pa aña.

E forma den cual alimento ta ser produci, almacena, manipula y consumi ta afecta nan seguridad pa consumo. Cumplimento cu standard global pa alimento, establece regulacion pa sistema di control di alimento efectivo, incluyendo preparacion y respuesta pa emergencia, acceso na awa potabel limpi, aplica bon practica agricola (pa cultivo, acuacultura y pesca, cria di bestia y horticultura), fortaleciendo e practica di maneho di sistema pa seguridad pa consumo di cuminda dor di negoshi den preparacion y produccion di cuminda y crea e capacidad pa consumidor haci escogencia pa cuminda saludabel ta manera den cual gobierno, organisacion internacional, cientifico, sector priva y sociedad civil por traha pa sigura seguridad pa consumo di cuminda.

Cadena di suministro di alimento ta envolvi producente, procesador, transportador, distribuidor, bendedor di cuminda, kokki y consumidor. Den cada parti di e cadena ta existi peliger cu por causa contaminacion. Tur hende envolvi den e diferente etapa di e cadena tin e deber pa percura pa seguridad pa consumo di cuminda.

E pandemia a aumenta e enfoke riba temanan relaciona cu seguridad pa consumo di cuminda, manera higiena, resistencia antimicrobial, maleza zoonotico (transmiti via animal), cambio climatico fraude alimentario y e potencial beneficio di digitalisacion di sistema alimentario. E tambe a identifica debilidad y vulnerabilidad den sistema pa produccion y control. Pa e inmediato futuro, minimalisa disrupcion den cadena di suministro di alimento ta keda un prioridad halto di tur gobierno, ya cu consumidor mester por conta cu e garantia di acceso na cuminda.

Tema pa 2022: mas sigur pa consumo e cuminda, mihor e salud
Dispone di cuminda sigur pa consumo ta esencial pa salud humano y bienestar. Solamente ora cuminda ta sigur pa consumo, nos por beneficia di su balor nutritivo y e beneficionan mental y social di comparti un cuminda saludabel. Cuminda sigur pa consumo ta un di e elementonan mas fundamental pa garantisa un nivel di salud adecuado.

Alimentonan no sigur pa consumo ta causa di hopi maleza y ta contribui na crea otro condicionnan di salud empeora, manera problema di crecemento y desaroyo fisico, deficiencia di micronutriente, maleza transmisibel y no-transmisibel y enfermedad mental.

Globalmente 1 di cada 10 hende ta ser afecta pa maleza transmiti pa cuminda anualmente. E bon noticia ta cu mayoria di e malesanan transmiti pa cuminda ta prevenibel.

Nos comportacion, e manera di construi sistema alimentario y con ta organisa cadena di suministro di alimento por evita cu peliger infeccioso of toxico, patogeno microbial (bacteria, virus, parasito), residuo kimico, biotoxina of otro substancia dañino of peligroso ta caba riba nos tayo di cuminda.

Nos tin cu transforma sistema alimentario pa garantisa un mihor salud y haci esaki di forma sostenibel, dor di haci esnan encarga cu formulacion di maneho politico, specialista y inversionista relaciona cu sistema alimentario reorienta nan actividad pa insemina e produccion y consumo sostenibel di cuminda sigur pa consumo cu e proposito pa mehora resultado pa salud.

Pa haci cu tur dieta sigur pa consumo y saludabel ta accesibel pa tur hende, maneho politico, agricola, alimentario, comercial y di desaroyo industrial aplicabel mester promove seguridad pa consumo di cuminda. Realisacion di cambio sistemico orienta pa mehora salud lo percura pa alimento mas sigur pa consumo, loke ta un elemento esencial pa permiti desaroyo di ser humano a largo plaso y ta un rekisito previo pa logra e Obhetivonan di Desaroyo Sostenibel (SDGs).

Situacion na Aruba
Na Aruba Departamento di Salud Publico (Dienst Warenkeuring en Hygiene) ta principalmente encarga cu control di produccion y preparacion den sistema alimentario.
Den sector di servicio di cuminda (restaurant, takeaway, snacktruck, catering, servicio di entrega di cuminda) y tur otro persona, empresa encarga cu produccion y preparacion di cuminda ta conta cu mester aplica reglamento estricto stipula pa ley y cu ta controla debidamente.

E crisis global economico ta pone costo di bida bira un preocupacion diario pa ciudadano y consumidor haci escogencia dicta pa un presupuesto limita pa cuminda, pa alimento menos saludabel of cumpra producto cu por resulta menos bon pa salud.
Nos ta depende di producto di cuminda importa y como pais chikito tin menos opcion pa acceso na cuminda pa importacion di cual e fecha di expiracion ta garantisa suficiente tempo pa benta den tienda of consumo promer cu e fecha pa benta vence.

Ademas e aumento di prijs riba mercado internacional por conduci na importador y esnan cu ta bende cuminda den tienda of otro lugar dicidi busca producto mas barata for di pais na unda regulacion y standard pa produccion, procesamento y exportacion di alimento ta menos estricto.

Seguridad pa consumo di cuminda ta bira un tema prioritario pa maneho di salud, prijs pa comestibel y pa canasta basico pa percura cu mucha cu ta bay scol, personanan vulnerabel of marginalisa, y den cas di cuido tin acceso na cuminda sigur pa consumo, nutritivo y pagabel.