Den cuadro di diversificacion Minister di Turismo y Salud Publico Sr. Dangui Oduber ta comparti cu e aerolinea Wingo ta aumenta nan vuelonan pa Aruba. Recientemente Wingo a dicidi cu lo bay aumenta su vuelonan entre e luna di juni y augustus pa 3 vuelo semanal for di Bogota, esaki ta un aumento den e capacidad di asiento di 44 porciento.
Wingo a aumenta vuelonan den diferente rutanan existente, internacional y nacional mes, hopi di e vuelonan aki ta conecta cu e vuelo di Bogota pa Aruba. Esaki ta bay haci cu lo bay tin un aumento den e “airlift” di Latino America pa Aruba. Ya caba ta premira cu lo tin un crecemento for di e mercado aki, segun e mandatario.
Minister Dangui Oduber a duna di conoce cu diversificacion di rutanan den Latino America ta cuadra cu e maneho di Gobierno. Minister Oduber ta hopi satisfecho cu e trabou cu e airlift committee ta haciendo. Ban sigui avansa hunto como pais pa como pais nos yega bek na 100 porciento di recuperacion di nos turismo compara cu aña 2019.
Photo Credit: 297 Spotters
