Comerciantenan Uni ta di opinion cu tin miho manera pa yuda Gobierno haya su fondonan sin tin mester di masacra pueblo cu introduccion di tarifanan halto di impuesto. Gremionan y comercio ta propone un tarifa di 10% pasobra 14% of mas ta un abuso completo, segun comerciantenan ta expresando ultimamente.

No ta un secreto mas cu Aruba ya caba ta wordo mira manera un isla hopi caro. E realidad ta cu inflacion actual mundialmente ta algo cu nos gobierno no por haya culpa di dje. “Pero tambe e realidad ta cu si bo sa esey, awor no ta momento pa bo bin y masacra nos cu e 14% aki,” segun comerciante Sr. Francis Saladin.

Tur gremio hunto a manda un carta na gobierno adresando cu comercio no ta contra un sistema di BTW, mas bien ta contra e manera cu ta propone pa implementa esaki. Tur gremio a bini hunto y bisa cu
e sistema di BTW ta uno bon pasobra lo stimula miho cumplimento cu impuesto, cual ta hopi necesario. Mester bay cobra tur e placa ey cu tin ariba caya di esnan cu no ta cumpliendo debidamente cu impuesto.

Sinembargo, comerciante y gremionan ta enfatisa cu esaki mester ta un solo tarifa, un tarifa abao, cual IMF tambe a recomenda.

Comerciantenan Uni a dicidi tambe di reacciona riba presentacion recien di minister di Finanzas, unda e mandatario ta pidi comercio pa yuda reduci e 6% cu a bay den prijs pa ora cu BTW wordo introduci. “Ta lastima pa tende ora cu algun aña pasa tur comerciante a bringa pa laga e suma aki afo di e prijs,” segun Sr. Frans Ponson di Comerciantenan Uni.

Proposicion di tarifa di 10%
 Comerciante Francis Saladin ta splica Bon Dia cu e proposicion y sugerencia di comerciantenan ta pa no bin cu un sistema di dos tarifa y laga esaki na un solo tarifa di 10%. Por corda con algun siman atras Departamento di Impuesto a invita comercio pa dos sesion di informacion tocante introduccion di e sistema nobo y sali cu e proposicion di 18%, a splica tur cos y comercio a trece dilanti di no ta di acuerdo cu varios di e puntonan treci pa dilanti. Sr. Saladin ta bisa cu pa comerciantenan ta hopi preocupante tambe ora ta mira por ehempel un minister di Finanzas ta papia di un situacion cu a nace. E situacion precario financiero cu Pais Aruba ta aden actualmente cu a empeora ta bin door di Covid, pero segun Sr. Saladin: “Mi ta kere nos minister di Finanzas ta pretende di haci como si fuera ta gobierno so a pasa den pandemia, mientras cu nos tambe a pasa den e golpi di Covid. Tur comerciante a sufri di un manera of otro mescos cu gobierno y aworaki ta busca un manera of otro pa recupera back.”

“For di unda por sigui saca tanto placa?”
 Comerciantenan ta bisa cu nan tambe a crea debe, nan tambe tin perdida y mester recupera di esey.
E loonsubsidie ricibi, cu ta hopi di aprecia, tabata bon pero awor hopi tin di bay paga un gran parti back di dje, dus un otro golpi extra, “for di unda nos ta saca tanto placa?” segun Sr. Saladin ta expresa. Saliendo cu un solucion pa bin cu 18% aumento den impuesto ta un locura, segun comerciantenan, pasobra esey lo caba cu pueblo y na fin di dia gobierno tambe lo sufri, y awor ta bay over pa papia di 6% cu 14%. “Abo kier nos saca awo e 6%, nos a bisa bo no hink’e, pero abo awo si mag subi bo prijs. E cos ey no ta husto, no por.”

Tur gremio hunto a papia riba mesun liña, duna informacion, feedback y conseho y ta casi manera no ta importa, segun Sr. Saladin, pasobra na fin di dia ta sinta tilda comerciantenan cu ta expresa nan mes como si fuera nan ta partidonan politico.

“Nos tambe tin opinion, tin interes riba e progreso di e Pais aki y tambe ta preocupa pa nos Pais, na fin di dia e ta di nos tur. Cada rato bo ta bisa Hulanda of Gremionan pa bin purba sinta den bo stoel pretendiendo comosifuera nos no mag sali duna nos opinion y comunica cu pueblo,” segun Sr. Saladin.

Comerciantenan ta haya cu tin Departamento di Impuesto por ehempel cu por funciona hopi miho pa colecta placa via varios ehempel. Pakico mester cambia pa un sistema nobo, bin cu dos tarifa pa haci e dificil pa comercio y Departamento di Impuesto, ta locual varios comerciante no ta compronde.

Como un ciudadano, bo gastonan na bo cas ta subi y bo mester mas entrada pa cubri nan, pa un comerciante esaki ta mescos. “Nos tambe mester produci mas pa cubri gastonan cada bes nan subi, anto esey, ta un ciclo vicioso anto e ta fastioso pasobra di un banda nos ta compronde pa saca e 6% for di prijs, pero nos tambe tin cu subi prijs pa cubri e gastonan.”