Ayera mainta na Universidad di Aruba a tuma luga un conferencia di prensa pa informa comunidad tocante un encuesta cu ta disponibel via online, pa asina ey mehora e implementacion di Codigo di Proteccion, pero tambe pa preveni abuso di Mucha.

Jullie-Ann Thode, lider di proyecto di Codigo di Proteccion di sector Enseñansa, a expresa cu nan ta cuater sector cu ta bay aplica e ley aki cu ta sector Husticia, Salubridad, Enseñansa y Social.

Efraim Suurendonk, lider di proyecto den area Social, a señala cu nan ta hopi contento cu nan ta bay cuminsa cu un encuesta pa wak con e codigo ta wordo experiencia den e veld. Tambe el a sigura cu nan ta orguyoso cu e ley aki a drenta na vigor, pa motibo cu proteccion di mucha ta hopi importante unda cu esaki ta un topico cu pa hopi tempo caba tabata un tabu y aworaki ta bin mas hende dilanti pa papia di dje.

E investigacion ta consisti di dos pregunta principal, e prome ta: “Kico ta e impacto di Codigo di Proteccion riba e profesionalnan cu ta traha den e cuater sector despues di un aña di implementacion?”
E di dos pregunta ta for di e perspectiva di e desaroyo humano: “Kico ta e aspiracionnan pa e maneho di proteccion di mucha den e sector di Salubridad, Husticia, Enseñansa y Psico-Social y con esaki ta cuadra cu e dies capacidad humano?”

E obhetivo di e encuesta ta pa evalua e experiencianan di e impacto y e nivel di conscientisacion di e profesionalnan cu ta traha den e cuater sector aki pa loke ta trata implementacion di e Codigo di Proteccion, y tambe e meta ta pa identifica e puntonan fuerte, e puntonan debil, e oportunidadnan y tambe e menasanan cu un trahado ta experiencia ora cu e ta implementa e Codigo di Proteccion.

E beneficio di e encuesta aki ta cu e personanan ta bay duna un contribucion positivo pa asina yuda nan pa tuma e miho decisionnan ora ta trata di e Codigo di Proteccion, pa mehora esey y pa preveni abuso di mucha na Aruba.

Di su parti, Sue Ann Ras, ken ta fungi como coordinador nacional di implementacion di Codigo di Mucha y trahado di Ministerio di Asuntonan Social y Husticia, a indica cu nan ta un stap mas leu, unda cu e sectornan involucra ta hopi grandi y un di nan partner mas grandi ta Bureau Sostenemi.

El a informa cu nan a traha tur e añanan aki for di 2019, cu a cuminsa conhuntamente cu UNICEF, pa nan por yega na e implementacion di locual tabata conoci como Meldcode. A base di esaki nan a bin cu un LBham pa asina ey wak con nan por a cuminsa cu e codigo, cu tin cinco paso.

Ras a bisa cu nan ta traha mas den area preventivo pa asina evita di wak tur e muchanan realmente di kico ta sucediendo, pero tambe cu nan por tuma pasonan concreto y mas uniforme di tur e veldnan aki cu ta traha directo of indirectamente cu e muchanan. Di e cinco pasonan el a splica cu gran parti di locual ta trata sector psico-social nan ta bezig ta casi rond af y den sector di Husticia tambe nan a yega hopi leu, cu hasta nan a yega den Cuerpo Policial.

Compara cu Hulanda, Hulanda no ta usa Meldcode den Cuerpo Policial, pero na Aruba si a haya sosten di e instancia aki pa wak un tiki mas leu kico nan ta haya y tambe con pa señala esaki na momento cu nan bin pa sospecho of abuso di mucha.

Den sector di Enseñansa, Ras a bisa cu nan tin cierto partnernan den directivanan di scol cu ya caba nan ta yegando na nan plan di implementacion, incluso SKOA y SPSOA ta aplicando esaki den nan maneho di cuido.

A base di esaki, for di aña pasa, comunidad kier sa con e Codigo di Proteccion di mucha ta bayendo, kico nan por haci miho y unda nan mester empodera pero tambe fortalece e profesionalnan cu ta traha cu esaki. Ta p’esey cu a bin e idea di haci un brainstorm cu Clemencia Eugene, pa asina nan por haci nan prome investigacion cu base pa nan por haya datonan. Pa e mesun motibo Universidad di Aruba a uni pa por haci un investigacion cu lo tin un balor agrega, manera Ras a sigura, traha riba maneho di prevencion di abuso di mucha.

Marceylaine Paskel y Zurainy Arends ta dos studiante di Universidad di Aruba di e prome aña di Organization, Governance and Management y di Social Work and Development, y nan ta dispuesto pa cuminsa cu e investigacion na unda cu nan ta haci un apelacion na e profesionalnan den area aki pa por duna na nan e informacion, pa asina nan por traha cune y asina hay’e como data y wak na unda nan mester sigui bay.

Codigo di Proteccion ta hancra den ley for di 1 di april di 2021, loke ta nifica cu tur e profesionalnan den e cuater sector menciona caba mester traha esaki den aspectonan preventivo riba sospecho di abuso di mucha.

Zurainy Arends, ken ta fungi tambe como assistent di Clemencia Eugene cu e investigacion riba e tematica di implementacion di Codigo di Proteccion ,cu ta dirigi pa proteha y preveni abuso di mucha, a pidi pa profesionalnan cu ta trahando den e cuater sector participa den encuesta aki, “unda cu solamente hunto nos por mehora e beleid pa mehora e proteccion di e mucha”, el a sigura.

Marceylaine Paskel a expresa cu trahado social ta esencial pa comunidad, unda cu nan ta yuda y guia cu pasion nan clientenan pa duna nan e oportunidad di un miho futuro. El a comenta cu e encuesta aki tin un duracion di 20 minuut y a wordo haci den dos idioma cu ta Papiamento y Hulandes. Ee ta disponibel di manera online unda cu personanan por haya e formulario for di ayera riba e website di Codigo di Proteccion www.codigodiproteccion.com y e encuesta lo cera dia 26 di juni.

“Nos muchanan ta nos prioridad na Aruba, esaki ta un stap pa duna na e muchanan e oportunidad di tin un bida miho y proteha nan di tur forma di abuso, ban sea parti di e cambio aki” el a finalisa.