(EFE) – Presidente di Chile, Gabriel Boric, ayera diaranson a afirma cu su pais “tin loke mundo tin mester awendia” y a anima directivanan empresarial pa inverti den su nacion den sectornan como energia renobabel, lithium y hidrogeno berde.
“E mundo tin mester di Chile y Chile tin mester di e mundo”, el a afirma ora a participa den e prome jornada di un conferencia di empresarionan paralelo na e Cumbre di America cu ta desaroyando den e ciudad di Los Angeles na Merca.
Boric, un lider iskierdista cu a asumi e poder na Chile 11 di maart ultimo, a agrega cu, e crecemento cu por ta uni na aumento di inversion externo mester tuma na cuenta condicionnan como proteccion di medio ambiente y evita indemnisacion di impuesto of “un escasez laboral”.
Den su exposicion el a destaca un postura historico cu Chile a tene den fabor di integracion internacional, multilateralismo y di fomenta e comercio, den cual a agrega cu “ta un di e motornan di desaroyo” cu Chile a tene den ultimo añanan.
Aworaki, ta bibando un “contexto mundial hopi dificil” pa via di pandemia di coronavirus y topiconan como guera na Ucrania of crisis climatico.
Ora a recorda e condicionnan di e pais cu el a hereda ora a tuma posesion, Boric a lamenta e concentracion di rikesa na Chile, cu a califica di ta inhusto “den terminonan moral”, y cu tambe a causa na 2019 “un sociedad fractura cu tin dificultadnan pa crece den largo plaso.”
